၂၉. တေန ကတံ ကီတံ ဗဒ္ဓ+မဘိသင်္ခတံ သံသဋ္ဌံ ဟတံ ဟန္တိ ဇိတံ ဇယတိ ဒိဗ္ဗတိ ခနတိ တရတိ စရတိ ဝဟတိ ဇီဝတိတိ

ကတာဒီသွ+တ္ထေသု ဏိကော. ကာယေန ကတံ ကာယိကံ၊ ဝါစသိကံ၊ မာနသိကံတိ သကာဂမော. ဝါတေန ကတော အာဗာဓော ဝါတိတော၊ သေမှိကော၊ ပိတ္တိကော. သတေန ကီတံ သာတိကံ၊ သာဟဿိကံ၊ ဝတ္ထေန ကီတံ ဝတ္ထိကံ၊ ကုမ္ဘိကံ၊ သောဝဏ္ဏိကံ၊ ဃာတိကံ. မူလတောဝ ပစ္စယော၊ အမူလဝါစိတ္တာ ဒေဝဒတ္တေန ကီတောတိ န ဟောတိ၊ တဒတ္ထာပ္ပတီတိယာ. ဝရတ္ထာယ ဗဒ္ဓေါ ဝါရတ္တိကော၊ အာယသိကော၊ ပါသိကော၊ သုတ္တိကော. ဃတေန အဘိသင်္ခတံ သံသဋ္ဌံ ဝါ ဃာတိကံ၊ ဂေါဠိကံ၊ ဒဓိကံ၊ မာရီစိကံ. ဇာလေန ဟတော ဟန္တီတိ ဝါ ဇာလိကော၊ ဗာလိသိကော. အက္ခေဟိ ဇိတံ အက္ခိကံ ဓနံ၊ သာလာကိကံ၊ တိန္ဒုကိကော၊ အမ္ဗဖလိကော. အက္ခေဟိ ဇယတိ ဒိဗ္ဗတိ ဝါ အက္ခိကော. ခဏိတ္တိယာ ခနတီတိ ခါဏိတ္တိကော၊ ကုဒ္ဒါလိကော. ဒေဝဒတ္တေန ဇိတံ၊ အင်္ဂုလျာ ခနတီတိ န ဟောတိ၊ တဒတ္ထာနဝဂမာ. ဥဠုမ္ပေန တရတီတိ ဩဠုမ္ပိကော၊ ဥဠုမ္ပိကောတိ ဣကော. ကုလ္လိကော၊ ဂေါပုစ္ဆိကော၊ နာဝိကော. သကဋေန စရတီတိ သာကဋိကော၊ ရထိကော. ပရပ္ပိကောတိ ဣကော. ခန္ဓေန ဝဟတီတိ ခန္ဓိကော. အံသိကော၊ သီသိကောတိ ဣကော. ဝေတနေန ဇီဝတီတိ ဝေတနိကော၊ ဘတိကော၊ ကယိကော၊ ဝိက္ကယိကော၊ ကယဝိက္ကယိကောတိ ဣကော.