၁၄. တ+မဓီတေ တံ ဇာနာတိ က+ဏိကာ စ

ဒုတိယန္တတော တ+မဓီတေ တံ ဇာနာတီတိ ဧတေသွ+တ္ထေသု ဏော ဟောတိ ကော ဏိကော စ. ဧတ္ထ စသဒ္ဒေါ ကော စဏိကော စ ဟောတီတိ သမုစ္စိနော၊ နော ဏပစ္စယံ. ဗျာကရဏ+မဓီတေ ဇာနာတီတိ ဝါ ဝေယျာကရဏော၊ ဝိ+အာ+ကရဏန္တိ ဝိစ္ဆိဇ္ဇ ကတယာဒေသဿိ+ကာရဿ ‘‘တဒါဒေသာ တဒီဝ ဘဝန္တီ’’တိ ဉာယာ ‘‘သရာန’’မိစ္စာဒိနာ ဧကာရေ ယာဂမဒွိတ္တာနိ. ဧဝံ မောဟုတ္တော၊ နေမိတ္တော၊ အင်္ဂဝိဇ္ဇော၊ ဝတ္ထုဝိဇ္ဇော၊ ဆန္ဒသော၊ ‘‘မနာ၊ ဒီနံ သက’’ ဣတိ သကာဂမော. ကမကော၊ ပဒကော၊ ဝေနယိကော၊ သုတ္တန္တိကော၊ အာဘိဓမ္မိကော. ဒွိတဂ္ဂဟဏံ အဇ္ဈေနဇာနနေ စ ဝိသုံ ဝိသုံ ပစ္စယဝိဓာနတ္ထံ၊ အဇ္ဈေနဝိသယဒဿနတ္ထံ၊ ပသိဒ္ဓုပသံဟရဏတ္ထဉ္စ.