၃၉. ဆဋ္ဌီ သမ္ဗန္ဓေ

သမ္ဗန္ဓေ ဆဋ္ဌီ ဟောတိ. ရညော ပုရိသောတိ ဝုတ္တေ ယသ္မာ ရာဇာ ဒဒါတိ၊ ပုရိသော ဂဏှာတိ၊ တသ္မာ ရာဇပုရိသောတိ ဝိညာယတိ. ဧဝမေဝ ယော ယဿ အာယတ္တော သေဝကာဒိဘာဝေန ဘဏ္ဍဘာဝေန ဝါ သမီပ+သမူဟာ+ဝယဝ+ဝိကာရ+ကာရိယ+အဝတ္ထာ+ဇာတိ+ဂုဏ+ကြိယာဒိဝသေန ဝါ၊ ဌာနီဝသေန ဝါ၊ အာဂမီဝသေန ဝါ၊ သော တိဝိဓောပိ အတ္ထော သမ္ဗန္ဓော နာမ. ဝုတ္တဉှိ –

ကြိယာကာရကသဉ္ဇာတော၊ အဿေ+ဒံဘာဝဟေတုကော၊

သမ္ဗန္ဓော နာမ သော အတ္ထော၊ တတ္ထ ဆဋ္ဌီ ဝိဓီယတေ.

ပါရတန္တျဉှိ သမ္ဗန္ဓော၊ တတ္ထ ဆဋ္ဌီ ဘဝေ တိတော၊

ဥပါဓိ+ဌာနျာ+ဂမိတော၊ န ဝိသေဿာဒိတော တိတောတိ.

ဥပါဓိသင်္ခါတဝိသေသနတော တာဝ-ရညော ပုရိသော. ဧတ္ထ စ ဗြာဟ္မဏာဒိသာမိတော နိဝတ္တေတီတိ ရာဇာ ဝိသေသနံ၊ ပုရိသော တေန ဝိသေသိယတီတိ ဝိသေဿော. ဘဏ္ဍသမ္ဗန္ဓတော-ပဟုတံ မေ ဓနံ သက္က၊ ဧကဿ ပဋိဝီသော၊ ဘိက္ခုဿ ပတ္တစီဝရံ. သမီပတော-အမ္ဗဝနဿ အဝိဒူရေ၊ နိဗ္ဗာနဿေဝ သန္တိကေ. သမူဟေ-သုဝဏ္ဏဿ ရာသိ၊ ဘိက္ခူနံ သမူဟော. အဝယဝေ-မနုဿဿေဝ တေ သီသံ၊ ရုက္ခဿ သာခါ. ဝိကာရေ-သုဝဏ္ဏဿ ဝိကတိ၊ ဘဋ္ဌဓညာနံ သတ္တု. ကာရိယေ-ယဝဿ အင်္ကုရော၊ မေဃဿ သဒ္ဒေါ၊ ပုတ္တာပိ တဿ ဗဟဝေါ၊ ကမ္မာနံ ဖလံ ဝိပါကော. အဝတ္ထာယံ-ခန္ဓာနံ ပါတုဘာဝေါ၊ ဇရာ၊ ဘေဒေါ ဝါ. ဇာတိယံ-မနုဿဿ ဘာဝေါ၊ မနုဿာနံ ဇာတိ. ဂုဏေ-သုဝဏ္ဏဿ ဝဏ္ဏော၊ ဝဏ္ဏော န ခီယေထ တထာဂတဿ ဗုဒ္ဓဿ ဂုဏဃောသော၊ ပုပ္ဖါနံ ဂန္ဓော၊ ဖလာနံ ရသော၊ စိတ္တဿ ဖုသနာ၊ သိပ္ပိကာနံ သတံ နတ္ထိ၊ တိလာနံ မုဋ္ဌိ၊ တေသံ သမာယောဂေါ၊ သန္ဓိနော ဝိမောက္ခော၊ တထာဂတဿ ပညာပါရမိံ အာရဗ္ဘ၊ သုခံ တေ၊ ဒုက္ခံ တေ၊ စေတသော ပရိဝိတက္ကော ဥဒပါဒိ၊ ပညာယ ပဋုဘာဝေါ၊ ရူပဿ လဟုတာ၊ မုဒုတာ ဝါ၊ ဥပစယော ဝါ. ကြိယာသမ္ဗန္ဓေ-ပါဒဿ ဥက္ခေပနံ၊ အဝက္ခေပနံ ဝါ၊ ဟတ္ထဿ သမိဉ္ဇနံ၊ ဒါနံ၊ ပသာရဏံ၊ ဓာတူနံ ဂမနံ၊ ဌာနံ၊ နိသဇ္ဇာ၊ သယနံ ဝါ၊ တထာဂတဿ နာမဂေါတ္တာဒိ၊ တဿ ကာရဏံ၊ တဿ မာတာပိတရော၊ တဿ ပုရတော ပါတုရဟောသိ၊ နဂရဿ ဒက္ခိဏတော၊ ဝဿာနံ တတိယေ မာသေ၊ န တဿ ဥပမာ၊ ကုဝေရဿ ဗလိ ဣစ္စာဒိ. အပိ စ –

ဂါဝဿ ဇာတိ၊ ဓဝလော၊ ဂတိ၊ သိင်္ဂံ၊ နာမန္တိ+ဓ၊

ဒဗ္ဗဿာပိ စ ဇာတျာဒိ၊ ဝိသေဿာ ဟောန္တိ ကာမတော.

ဂေါတ္တဉ္စ သဗလောဒိဿ၊ ပါက+မန္နဿ သုက္ကတာ၊

ပဋဿ၊ သိင်္ဂံမေဏ္ဍဿ၊ နာ+ညေသံတိ ဝိသေဿတေ.

ဌာနိတော-ယုဝဏ္ဏာန+မေဩ လုတ္တာ. အာဂမိတော-သုဉ သဿ. သာမိယောဂေ-ဒေဝါန+မိန္ဒော၊ မိဂါနံ ရာဇာ. ရုဇာဒိယောဂေ-ဒေဝဒတ္တဿ ရုဇတိ၊ တဿ ရောဂေါ ဥပ္ပဇ္ဇိ၊ မဟာသေနာပတီနံ ဥဇ္ဈာပေတဗ္ဗံ၊ ရဇကဿ ဝတ္ထံ ဒဒါတိ၊ မုသာဝါဒဿ ဩတ္တပ္ပံ ဣစ္စာဒိ. ယဇဿ ယောဂေ-ပုပ္ဖဿ ဗုဒ္ဓဿ ယဇတိ၊ ပုပ္ဖေနာတျတ္ထော. ဧဝံ ဃတဿ အဂ္ဂိံ ဇုဟတိ. သုဟိတတ္ထေ-ပတ္တံ ဩဒနဿ ပူရေတွာ၊ ပူရံ နာနာပကာရဿ အသုစိနော၊ ပူရံ ဟိရညသုဝဏ္ဏဿ၊ ပူရတိ ဗာလော ပါပဿ. ကိတကပ္ပယောဂေ-ဗဟုလံဝိဓာနာ ဆဋ္ဌီ၊ ရညော သမ္မတော၊ ပူဇိတော၊ သက္ကတော၊ အပစိတော၊ မာနိတော ဝါ၊ အမတံ တေသံ ဘိက္ခဝေ အပရိဘုတ္တံ၊ ယေသံ ကာယဂတာ သတိ အပရိဘုတ္တာ၊ သာဓုသမ္မတော ဗဟုဇနဿ၊ သုပ္ပဋိဝိဒ္ဓါ ဗုဒ္ဓါနံ ဓမ္မဓာတု၊ ဓမ္မဿ ဂုတ္တော မေဓာဝီ. ကမ္မတ္ထေ-တဿ ဘဝန္တိ ဝတ္တာရော၊ သဟသာ ကမ္မဿ ကတ္တာရော၊ အမတဿ ဒါတာ၊ ဘိန္နာနံ သန္ဓာတာ၊ သဟိတာနံ အနုပ္ပဒါတာ၊ ဗောဓေတာ ပဇာယ၊ ကမ္မဿ ကာရကော နတ္ထိ၊ ဝိပါကဿ စ ဝေဒကော၊ အဝိသံဝါဒကော လောကဿ၊ စတုန္နံ မဟာဘူတာနံ ဥပါဒါယ ပသာဒေါ. သရတိ+စ္ဆာယောဂေ-မာတု သရတိ၊ န တေသံ ကောစိ သရတိ၊ သတ္တာနံ ကမ္မပစ္စယာ၊ ပုတ္တဿ ဣစ္ဆတိ. ကရောတိဿ (ယောဂေ) – ဥဒကဿ ပတိကုရုတေ၊ ကဏ္ဍဿ ပတိကုရုတေ၊ အဘိသင်္ခရောတီတျတ္ထော. ပဉ္စမိယတ္ထေ ပရိဟာနိဘယတ္ထယောဂေပိ ဆဋ္ဌီ၊ အဿဝနတာယ ဓမ္မဿ ပရိယာယန္တိ၊ ကိန္နု ခေါ အဟံ တဿ သုခဿ ဘာယာမိ၊ သဗ္ဗေ တသန္တိ ဒဏ္ဍဿ၊ သဗ္ဗေ ဘာယန္တိ မစ္စုနော၊ ဘီတော စတုန္နံ အာသီဝိသာနံ ဃောရဝိသာနံ ဣစ္စာဒိ.