၃၂. သတ္တမျာ+ဓာရေ

ကတ္တုကမ္မဋ္ဌာနံ နိသဇ္ဇ+ပစနာဒိကြိယာနံ ယော အာဓာရော၊ တံ အာဓာရကာရကံ နာမ. ကထံ ကဋေ နိသီဒတိ ဒေဝဒတ္တော၊ ထာလိယံ ဩဒနံ ပစတိ၊ ဒေဝဒတ္တ+တဏ္ဍုလာနံ ကတ္တု+ကမ္မာနံ ဓာရဏတော တဒဋ္ဌအာသန+ပစနကြိယံ ကဋ+ထာလိယော ဓာရေန္တိ နာမ၊ တသ္မိံ သတ္တမီဝိဘတ္တိ ဟောတိ.

သော ဗျာပိကော၊ ဩပသိလေသိကော၊ ဝေသယိကော၊ သာမီပိကောတိ စတုဗ္ဗိဓော. တတ္ထ ယော အာဓေယျဿ နိဿေသာဓာရဘူတော၊ သော ဗျာပိကော၊ ယထာ တိလေသု တေလံ အတ္ထိ၊ ခီရေသု ဇလံ၊ ဒဓိမှိ သပ္ပိ. ပစ္စေကသိဒ္ဓါနံ ဘာဝါနံ ယံ အာဓေယျဘာဝေန ဥပသိလေသနံ အလ္လီယနံ အတ္ထိ၊ သော ဩပသိလေသိကော. ယထာ အာသနေ နိသိန္နော သံဃော၊ ထာလိယံ ဩဒနံ ပစတိ၊ ဃဋေ ဥဒက+မတ္ထိ၊ ဒူရေ ဌိတော၊ သမီပေ ဌိတော. ယတ္ထ သမီပေ သမီပီဝေါဟာရံ ကတွာ တဒါယတ္တတာဒီပနတ္ထံ အာဓာရဘာဝေါ ဥပစရီယတိ၊ တံ သာမီပိကံ၊ ယထာ ဂင်္ဂါယံ ဃောသော၊ ဂင်္ဂါယ သမီပေ ဝဇောတျတ္ထော. သာဝတ္ထိယံ ဝိဟရတိ ဇေတဝနေ. ယတ္ထ အညထာဘာဝဝသေန ဒေသန္တရာဝစ္ဆေဒဝသေန ဝါ အာဓာရပရိကပ္ပေါ၊ သော ဝေသယိတော. ယထာ အာကာသေ သကုဏာ စရန္တိ၊ ဘူမိယံ မနုဿာ၊ ဇလေ မစ္ဆာ၊ ပါသာဒေသု ပတိတော၊ ပါပသ္မိံ ရမတီ မနော၊ ပသန္နော ဗုဒ္ဓသာသနေ၊ ပညာယ သာဓု၊ ဝိနယေ နိပုဏော၊ မာတရိ သာဓု၊ ပိတရိ နိပုဏော.

ကိရိယာ ကတ္တု+ကမ္မဋ္ဌာ၊ အာဓာရီယတိ ယေန သော၊

အာဓာရော စတုဓာ ဝုတ္တော၊ ဗျာပကာဒိပ္ပဘေဒတော.

ဗျာပကော တိလခီရာဒိ၊ ကဋော ဩပသိလေသိကော၊

သာမီပိကော တု ဂင်္ဂါဒိ၊ အာကာသော ဝိသယော မတော.