၂၊၂. ကမ္မေ ဒုတိယာ

ကရီယတိ ကတ္တုကိရိယာယ သမ္ဗန္ဓီယတီတိ ကမ္မံ၊ တသ္မိံ ကမ္မကာရကေ ဒုတိယာဝိဘတ္တိ ဟောတိ. တံ တိဝိဓံ နိဗ္ဗတ္တိ၊ ဝိကတိ၊ ပတ္တိ ဘေဒေန၊ တတ္ထ နိဗ္ဗတ္တိကမ္မေ မာတာ ပုတ္တံ ဝိဇာယတိ၊ အာဟာရော သုခံ ဇနယတိ၊ ကဋံ ကရောတိ ဒတ္တော. ဝိကတိယံ ကဋ္ဌ+မင်္ဂါရံ ကရောတိ၊ သုဝဏ္ဏံ ကဋကံ ကရောတိ၊ ဝီဟယော လုနာတိ. ပတ္တိယံ ဒတ္တော ဃရံ ပဝိသတိ၊ အာဒိစ္စံ ပဿတိ၊ ဓမ္မံ သုဏာတိ၊ ပဏ္ဍိတေ ပယိရုပါသတိ.

ဝုတ္တဉ္စ –

နိဗ္ဗတ္တိ+ဝိကတိ+ပတ္တိ-ဘေဒါ ကမ္မံ တိဓာ မတံ၊

ကတ္တုကြိယာဘိဂမ္မန္တံ၊ သုခ+မင်္ဂါရံ+ဃရံ ယထာတိ.

ကဋံ ကရောတိ ဝိပုလံ ဒဿနီယန္တိ အတ္ထေဝ ဂုဏယုတ္တဿ ကမ္မတာ၊ ဝိပုလံ ကရောတိ၊ ဒဿနီယံ ကရောတီတိ ကြိယာယ သမ္ဗန္ဓိယမာနတ္တာ. ဩဒနော ပစ္စတေတိ ဩဒနသဒ္ဒတော ကမ္မတာ နပ္ပတီယတေ၊ ကိဉ္စရဟိ အာချာတတော.

ဣစ္ဆိတကမ္မံ ယထာ-ဂါဝုံ ပယော ဒေါဟတိ၊ ဂေါမန္တံ ဂါဝံ ယာစတိ၊ ဂါဝ+မဝ ရုန္ဓတိ ဝဇံ၊ မာဏဝကံ မဂ္ဂံ ပုစ္ဆတိ၊ ဂေါမန္တံ ဂါဝံ ဘိက္ခတေ၊ ရုက္ခ+မဝစိနာတိ ဖလာနိ၊ ရုက္ခာတျတ္ထော. သိဿံ ဓမ္မံ ဗြူတေ. ဧတ္ထ ပယော၊ ဂါဝံ ဣစ္စာဒိ ဣစ္ဆိတံ၊ ဂါဝုံ၊ ဂေါမန္တ+မိစ္စာဒိ အနိစ္ဆိတံ. ဧဝ+မနိစ္ဆိတေပိ ကဏ္ဋကံ မဒ္ဒတိ၊ ဝိသံ ဂိလတိ. ယံ နေဝိ+စ္ဆိတံ၊ နာပိ အနိစ္ဆိတံ၊ တတြာပိ ဂါမံ ဂစ္ဆန္တော ရုက္ခမူလ+မုပသပ္ပတိ.

အာဓာရေ အဓိသိ+ဌာ+သာနံ ပယောဂေ စ၊ ပထဝိံ အဓိသေဿတိ၊ ဂါမ+မဓိတိဋ္ဌတိ၊ ရုက္ခ+မဇ္ဈာသတေတိ. ဧတ္ထ ပထဝိန္တိ ပထဝိယန္တိ အတ္ထော. ဧဝ+မဘိ၊ နိပုဗ္ဗဝိသဿာပိ၊ ဓမ္မ+မဘိနိဝိသတေ၊ ဓမ္မေ ဝါ. တထာ ဥပ၊ နွ+ဇ္ဈာ+ပုဗ္ဗဝသတိဿ၊ ဂါမ+မုပဝသတိ၊ ဂါမ+မနုဝသတိ၊ ဝိဟာရ+မဓိဝသတိ၊ ဂါမ+မာဝသတိ၊ အဂါရံ အဇ္ဈဝသတိ၊ ဧတ္ထ ဂါမန္တိ ဂါမေတျတ္ထော. တထာ တပ္ပါနာ+စာရေပိ၊ နဒိံ ပိဗတိ၊ ဂါမံ စရတိ၊ နဒိယံတျတ္ထော. သစေ မံ နာလပိဿတီတိ မယာ သဒ္ဓိံတျတ္ထော. ဝိဟိတာဝ ပဋိ-ယောဂေပိ ဒုတိယာ၊ ပဋိဘန္တု တံ စုန္ဒ ဗောဇ္ဈင်္ဂါ၊ တမ္ပဋိ ဗောဇ္ဈင်္ဂါ ဘာသန္တူတိ အတ္ထော. ဥပမာ မံ ပတိဘာတိ၊ ဥပမာ မံ ဥပဋ္ဌာတိတျတ္ထော. ဓာတုနာယုတ္တေ ‘‘တဿ နပ္ပဋိဘာတီ’’တိ ဆဋ္ဌီ.