၄. ပုဗ္ဗော ရဿော

တေသွေဝ ဒသသု ယေ ဒွေ ဒွေ သဝဏ္ဏာ၊ တေသု ယော ယော ပုဗ္ဗော၊ သော သော ရဿသညော ဟောတိ. ယထာ အ ဣ ဥ ဧ ဩ. တေသု ‘သံယောဂတော ပုဗ္ဗာဝ ဒိဿန္တိ ဒွေ ပနန္တိမာ’တ ဒဿေတုံ တတ္ထ သာဓုတ္တာ တေသမ္ပိ ဣဓ သင်္ဂဟော၊ ယထာ ဧတ္ထ သေယျော ဩဋ္ဌော သောတ္ထိ. ရဿကာလယောဂါ တဗ္ဗန္တတာယ ဝါ ရဿာ. ရဿကာလော နာမ အစ္ဆရာသင်္ဃာတော အက္ခိနိမ္မိလနသင်္ခါတော ဝါ ကာလော၊ တေန ဧကမတ္တော ရဿော၊ ဒွိမတ္တော ဒီဃော၊ အဍ္ဎမတ္တော ဗျဉ္ဇနော. ဆန္ဒသိ ဒိယဍ္ဎမတ္တမ္ပိ ရဿန္တိ ဂဏှန္တိ အာစရိယာ.