တိသဋ္ဌိမ ပရိစ္ဆေဒ

သေနာပတိဝဓော

၁. နိဇာယုဓဒုတိယဿ၊ နိက္ခမန္တဿ တဿ ဟိ၊

တံ ခဏံ ပုရတော ကော’ပိ၊ သင်္ခသဒ္ဒေါ သမုဂ္ဂတော.

၂. တတော နေကနိမိတ္တညူ၊ ကုမာရော တံ သုဏိ တွ သော၊

နိပ္ဖဇ္ဇိဿတိ သင်္ကပ္ပေါ၊ ခိပ္ပံ ယေဝေတိ မောဒဝါ.

၃. တတ္ထ တတ္ထ နိယုတ္တာနံ၊ ရက္ခကာနမဇာနတံ၊

နိက္ခမိတွာ ပုရာဝီတ-ဘယော သီဟပရက္ကမော.

၄. ဝေဂေန မဂ္ဂံ ဂန္တွာန၊ ပဉ္စဂါဝုတမတ္တကံ၊

ဗဒလတ္ထလဂါမဿ၊ ပဒေသေနာတိ ဒူရကေ.

၅. ဂါမ မေကမုပါဂဉ္စိ၊ ပိလိံ ဝတ္ထူတိ သညိတံ၊

ဇနာနံ သန္နိပါတာယ၊ နိဇာနံ သော ကတာဝဓိ.

၆. နိဇာဂမနတော ပုဗ္ဗံ၊ ပဋိမဂ္ဂေ နိသီဒိတုံ၊

ပဋိလဒ္ဓနိယောဂါနံ၊ ယေစိ ဒေဝါဂတေ တဒါ.

၇. တဟိံ ဌိတေ သော ပဿိတွာ၊ ဧတ္တကာ ကိန္နု အာဂတာ၊

ဣတိ ပုစ္ဆိ ကုမာရောထ၊ တေပိ တံ ဣဒ မဗြဝုံ.

၈. လောကပ္ပဝတ္တိံ သကလံ၊ ဇာနန္တေနာပိ သာမိနာ၊

ကိမေဝ မုစ္စတေ မစ္စု-ဘယံ ကေသံ န ဝိဇ္ဇတိ.

၉. ဗာလာတာနုဂတော သာမိ၊ ဌိတော ဝယသိ ဤဒိသေ၊

အဇ္ဇာပိ ဟိ မုခေ တုယှံ၊ ခီရဂန္ဓော ပဝါယတိ.

၁၀. န ဟေဝတ္ထိ ဝိသုံ ဝိတ္တ-ဇာတံ သင်္ဂဟိတံ တဝ၊

တဒညာ စောပကရဏ-သာမဂ္ဂီ နေဝ ဝိဇ္ဇတေ.

၁၁. စိရမ္ပရိစိတတ္တေဟိ၊ ဒဠှံ သာရုဠဘတ္တိဟိ၊

ဝိနာ’မှေဟိ ဝိသုံ ကေဝါ’နုဂန္တာရော ဇနာတုဝံ.

၁၂. ကိဉ္စာဂတာနမမှာကံ၊ ပိတာ တုယှံ နရိဿရော၊

ကာရေဿတိ ဣဒံ နာမ၊ သဗ္ဗထာ နေဝ ဉာယတေ.

၁၃. အမှာကမန္တရာမဂ္ဂေ၊ သင်္ခေါ နာမ စမူပတိ၊

မဟဗ္ဗလော မဟာဝီရော၊ ရဇ္ဇသီမံ တမာဝသံ.

၁၄. ပစ္စတ္ထိတေ ဌပေတွညေ၊ ဧတေ ကတိပယာ မယံ၊

အညမညမှိ နိယတ-မာသင်္ကီ ဟဒယာ ဘုသံ.

၁၅. အရုဏုဂ္ဂမဝေလာ စ၊ သမာသန္နတရာဓုနာ၊

ဣတိ ဘီတိံ ပကာသေသုံ၊ ပစ္စေကံ ဟဒယဿိတံ.

၁၆. နိသမ္မ တေသံ ဝစနံ၊ ဝိဓာယ မဓုရံ သိတံ၊

ဝီတသင်္ကော ကုမာရော သော၊ မုခါနေ’သံ ဝိလောကိယ.

၁၇. စရိတွာပိ မယာ သဒ္ဓိ-မေတေ’ဟော ကာလမေတ္တကံ၊

န ဇာနိံသု မမံ သဗ္ဗေ၊ ယေသဉှိ ဘယမိဒိသံ.

၁၈. ဣတိ ဝတွာ ဘယံ တေသံ၊ ဝိနောဒေတု မုပဋ္ဌိတံ၊

သီဟနာဒံ တဒါ’ကာသိ၊ မဟန္တံ သီဟဝိက္ကမော.

၁၉. တိဋ္ဌန္တု မာနုသာ သဗ္ဗေ၊ မယိ ဟတ္ထဂတာယုဓေ၊

သက္ကော ဒေဝါနမိန္ဒောပိ၊ ကုပိတော ကိံ ကရိဿတိ.

၂၀. ဗာလောတိ မံ စိန္တယ တံ၊ ဇာတာ ဝေါ ကုမတီဒိသီ၊

ပရိက္ခီယတိ တေ ဇာဏာ၊ နဝယော’တိ န ကိံ သုတံ.

၂၁. အဇ္ဇေဝ ကာတုမေကေန၊ ကမ္မုနာ စိန္တိတေန မေ၊

သဒေသပရ ဒေသဋ္ဌာ၊ ဘယဘတ္တီ ယထာမယိ.

၂၂. ကရိဿန္တိ ယထာ ဝေဒံ၊ ဘယံ တုမှေ ဇဟိဿထ၊

တထာ ရတ္တိယမေတာယ၊ ဝိဘာတာမယ ခဏေန မေ.

၂၃. ဥန္နတေ ဒဿယိဿာမိ၊ ဗုဒ္ဓိ သာဟသဝိက္ကမေ၊

အနုဓာဝတိ မံ တာတ၊ သေတေဟိ ယဒိ ဝေါ ဘယံ.

၂၄. ပုရတော ဟောထ တုမှေဟိ၊ ဝတွာ တေ ဂဟိတာယုဓော၊

သာဟသေကရသော ဝီရော၊ တမှာ နိက္ခမ္မ ဂါမတော.

၂၅. ဥဒယာ’စလသီသဋ္ဌံ၊ ဇေတုမာဒိစ္စမဏ္ဍလံ၊

အပရံ ရဝိ ဗိမ္ဗံဝ၊ ပစ္ဆိမာ သာ မုခေါဒိတံ.

၂၆. တေဇသာ ပသရန္တေန၊ ဇနာနံ ပဝိကာသယံ၊

နေတမ္ဗုဇဝနံ ပါတော၊ ဗဒလတ္ထလိမာဂမိ.

၂၇. ဇဃသင်္ခဿရေနာ’ထ၊ သေနာ နာထော ပဗုဇ္ဈိယ၊

သဉ္ဇာတသမ္ဘမော ဉတွာ၊ ရာဇပုတ္တမုပါဂတံ.

၂၈. သဒ္ဓိံ ဗလေန မဟတာ၊ ပဓုဂ္ဂမ္မကတာဒရော၊

ပဏာမမုစိတံ ကတ္တု-မာနတော ဝသုဓာတလေ.

၂၉. အမှာကမေသဇီဝန္တော၊ ကိံ နာမတ္ထံ ကရိဿတိ၊

မာရေတဗ္ဗော’ဓုနေဝေတိ၊ ပဿန္တေ သမုခံ ဘဋေ.

၃၀. နေဝါ’ဒိဋ္ဌာပရာဓဿ၊ မရဏံ ပုရိသော စိတံ၊

ဝဓော ဝိရောဓေ သက္ကာ’တိ၊ ဣင်္ဂိတေန နိဝါရိယ.

၃၁. သေနာပတိဿ သော ဟတ္ထံ၊ ဂဟေတွာ သီဟသန္နိဘော၊

ဘာသန္တော မဓုရံ ဝါစံ၊ တဿေဝါ’ဂဉ္ဆိ မန္ဒိရံ.

၃၂. အထဿ ဂမနံ ရညော၊ ဘဝိတဗ္ဗမဇာနတာ၊

သရူပံ ယာဝ ဇာနာမိ၊ တာဝဿေတေ သဟာဂတာ.

၃၃. ယထာ န သဟိတာ ဟောန္တိ၊ ဌပေတဗ္ဗာ ဝိသုံ ဝိသုံ၊

ကုမာရော’ဝ မမာဂါရေ၊ ဝသတူ’တိ ဝိစိန္တိယ.

၃၄. တထာ သေနာပတိ ကတွာ၊ ဝဉ္စေတုံ တံ မဟာမတိံ၊

ဒဿေတွာ’တိ ထီသက္ကာရံ၊ ရညော ဒူတေ သ ပေသယိ.

၃၅. ကုမာရော’ထ ဝိဒိတွာန၊ တေန တံ ဝဉ္စနံ ကတံ၊

ကတ္တဗ္ဗမေတ္ထာ’ကတွာဟ၊ မုဒါသီနော ဘဝေ ယဒိ.

၃၆. ဣစ္ဆိတတ္ထဿ နိပ္ဖတ္တိ၊ န မေ ဇာတု ဘဝိဿတိ၊

အယံ တာဝါ’ဓုနာဝဿံ၊ မာရေတဗ္ဗောတိ စိန္တိယ.

၃၇. သဟာဂတံ ပယောဇေတွာ၊ ဃာတာပယိ စမူပတိံ၊

ဟတော သေနာဓိနာထော’တိ၊ မဟန္တံ ခုဘိတံ အဟု.

၃၈. သေနာနာထဘဋော ဧကော၊ သုတွာ သေနာပတိံ ဟတံ၊

မာရဏံ သာမိနော မယှံ၊ ကိံ နိမိတ္တမီတိ ဗြဝိ.

၃၉. နေတ္တိံ သပါဏီ သဟသာ၊ ကုမာရံ ဌိတမေကကံ၊

အဘိဒါဝိ သသာမိဿ၊ ပရိစတ္တတ္တဇီဝိနော.

၄၀. ကုမာရဿ မုခံ ဒိသွာ၊ ဝေဓမာနော ဘယေန သော၊

ပုရေ ဌာတုမသက္ကောန္တော၊ ပါဒမူလေ တတော သယိ.

၄၁. ဂဏှထေ’တန္တိဝစနာ-ကုမာရဿ ပုရေတရံ၊

တဿေဝေကော သဟစရော၊ ဘဋမေတံ ဝိဃာတယိ.

၄၂. နိယောဂံ မေ ဝိနာ တေန၊ ကတံ ကမ္မံ န ယုဇ္ဇတိ၊

ဣတိ ဒဏ္ဍနမေတဿ၊ ကာရာပေသိယထောစိတံ.

၄၃. အထ တံ ကာလယမ္ဘူတ-သင်္ခေါဘမတိဘိံသနံ၊

ဘမုက္ခိပနမတ္တေန၊ ရာဇပုတ္တော သမံ နယိ.

၄၄. ဝီရော ယသောဓရဓနော ဓိတိမာ ကုမာရော၊

ဝီရောပကာရစတုရော ဝရကိတ္တိသာရော၊

သေနိန္ဒသဉ္စိတမနပ္ပဓနံ ဘဋာနံ၊

သဗ္ဗံ ဝိသဇ္ဇယိ ယထာရုစိယာ ဂဟေတုံ.

သုဇနပ္ပသာဒသံဝေဂတ္ထာယ ကတေ မဟာဝံသေ

သေနာပတိဝဓော နာမ

တိသဋ္ဌိမော ပရိစ္ဆေဒေါ.