ဆဋ္ဌပရိစ္ဆေဒ

ဝိဇယာဂမနံ

၁. ဝင်္ဂေသု ဝင်္ဂနဂရေ၊ ဝင်္ဂရာဇာ အဟု ပုရေ၊

ကာလိင်္ဂရညော ဓီတာ’သိ၊ မဟေသီ တဿ ရာဇိနော.

၂. သော ရာဇာ ဒေဝိယာ တဿာ၊ ဧကံ အလဘိ ဓီတရံ၊

နေမိတ္တာဗျာကရုံ တဿာ၊ သံဝါသံ မဂရာဇိနာ.

၃. အတီဝ ရူပိနိံ အာသိ၊ အတီဝ ကာမဂိဒ္ဓိနီ၊

ဒေဝေန ဒေဝိယာ’စာပိ၊ လဇ္ဇာယာ’သိ ဇဂုစ္ဆိတာ.

၄. ဧကာကိနီ သာ နိက္ခမ္မ၊ သေရီစာရသုခတ္ထိနီ၊

သတ္ထေန သဟ အညာတာ၊ အဂါ မဂဓဂါမိနာ.

၅. လာဠရဋ္ဌေ အဋဝိယာ၊ သီဟော သတ္ထမဘိဒ္ဓဝိ၊

အညတ္ထ သေသာ ဓာဝိံသု၊ သီဟဂတဒိသန္တုသာ.

၆. ဂဏှိတွာ ဂေါစရံ သီဟော၊ ဂစ္ဆံ ဒိသွာ တမာ’ရတော၊

ရတ္တော ဥပါဂလာလေန္တော၊ လင်္ဂုလံ ပတ္တကဏ္ဏကော.

၇. သာ တံ ဒိသွာ သရိတွာန၊ နေမိတ္တဝစနံ သုတံ၊

အဘီတာ တဿ အင်္ဂါနိ၊ ရဉ္ဇယန္တိ ပရာမသိ.

၈. တဿာ ဖဿေနာ’တိ ရတ္တော၊ ပိဋ္ဌိံ အာရောပိယာ’သုတံ၊

သီဟော သကံ ဂုဟံ နေတွာ၊ တာယ သံဝါသမာစရိ.

၉. တေန သံဝါသမနွာယ၊ ကာလေန ယမကေ ဒုဝေ၊

ပုတ္တဉ္စ ဓီတရဉ္စာတိ၊ ရာဇဓီတာ ဇနေသိ သာ.

၁၀. ပုတ္တဿ ဟတ္ထပါဒါ’သုံ၊ သီဟာကာရာ တတော အကာ၊

နာမေန သီဟဗာဟုံ တံ၊ ဓီတရံ သီဟသီဝလိံ.

၁၁. ပုတ္တော သောဠသဝဿော သော၊ မာတရံ ပုစ္ဆိ သံသယံ၊

တုဝံ ပိတာ စ နော အမ္မ၊ ကသ္မာ ဝိသဒိသာ ဣတိ.

၁၂. သာ သဗ္ဗမဗြဝီ တဿ၊ ကိံနယာမာ’တိ သော’ဗြဝိ၊

ဂုဟံ ထကေတိတာတော တေ၊ ပါသာဏေနာတိ သာ’ဗြဝိ.

၁၃. မဟာဂုဟာယ ထကနံ၊ ခန္ဓေနာ’ဒါယ သော အကာ၊

ဧကာဟေနေ’ဝ ပညာသ-ယောဇနာနိ ဂတာဂတံ.

၁၄. ဂေါစရာယ ဂဟေ သီဟေ၊ ဒက္ခိဏသ္မိဉှိ မာတရံ၊

ဝါမေ ကဏိဋ္ဌိံ ကတွာန၊ တယော သီဃံ အပက္ကမီ.

၁၅. နိဝါသေတွာန သာခံ တေ၊ ပစ္စန္တံ ဂါမမာဂမုံ၊

တတ္ထာသိ ရာဇိဓီတာယ၊ မာတုလဿ သုတော တဒါ.

၁၆. သေနာပတိ ဝင်္ဂရညော၊ ဌိတော ပစ္စန္တ ဂါမကော၊

နိသိန္နောဝဋမူလလေသော၊ ကမ္မန္တံ သံဝိဓာယကံ.

၁၇. ဒိသွာ တေ ပုစ္ဆိတေ’ဝေါစုံ၊ အဋဝီ ဝါသိနော မယံ၊

ဣတိ သော ဒါပယီ တေသံ၊ ဝတ္ထာနိ ဓဇိနီ ပတိ.

၁၈. တာနာ’ဟေသုံ ဥဠာရာနိ၊ ဘတ္တံ ပဏ္ဏေသု ဒါပယိ၊

သောဝဏ္ဏဘာဇနနာ’သုံ၊ တေသံ ပုညေန တာနိ စ.

၁၉. တေန သော ဝိမှိတော ပုစ္ဆိ၊ ကေ တုမှေတိ စမူပတိ၊

တဿ သာ ဇာတိဂေါတ္တာနိ၊ ရာဇဓီတာ နိဝေဒယိ.

၂၀. ပိတုစ္ဆာ ဓီတရံ တံ သော၊ အာဒါယ ဓဇိနီ ပတိ၊

ဂန္တွာန ဝင်္ဂနဂရံ၊ သံဝါသံ တာယ ကပ္ပယိ.

၂၁. သီဟော သီဃံ ဂုဟံ ဂန္တွာ၊ တေ အဒိသွာ တယော ဇနေ၊

အဋ္ဋိတော ပုတ္တသောကေန၊ န စ ခါဒိ န စာ’ပိဝိ.

၂၂. ဒါရကေ တေ ဂဝေသန္တော၊ အဂါ ပစ္စန္တဂါမကေ၊

ဥဗ္ဗာသီယတိ သော သော’ဝ၊ ယံယံ ဂါမမုပေတိ သော.

၂၃. ပစ္စန္တဝါသိနော ဂန္တွာ၊ ရညော တံ ပဋိဝေဒယုံ၊

သီဟော ပိဠေတိ တေ ရဋ္ဌံ၊ တံ ဒေဝ ပဋိသေဓယ.

၂၄. အလကံ နိသေဓကံ တဿ၊ ဟတ္ထိက္ခန္ဓဂတံ ပုရေ၊

အာဒေတု သီဟဒါယီတိ၊ သဟဿံ သော ပစာရယိ.

၂၅. တထေဝ ဒွေသဟဿာနိ၊ တီဏိစာ’ပိ နရိဿရော၊

ဒွီသု ဝါရေသု ဝါရေသိ၊ မာတာ သီဟဘုဇံ ဟိတံ.

၂၆. အဂ္ဂဟိ တတိယေ ဝါရေ၊ သီဟဗာဟု အပုစ္ဆိယ၊

မာတရံ တိသဟဿံ တံ၊ ဃာတေတုံ ပိတရံ သကံ.

၂၇. ရညော ကုမာရံ ဒဿေသုံ၊ တံ ရာဇာ ဣဓ မဗြဝိ၊

ဂဟိတော ယဒိ သီဟော တေ၊ ဒမ္မိ ရဋ္ဌံ တဒေဝ တေ.

၂၈. သော တံ ဂန္တွာ ဂုဟာဒွါရံ၊ သီဟံ ဒိသွာဝ အာရကာ၊

ဧန္တံ ပုတ္တသိနေဟေန၊ ဝိဇ္ဈိတုံ တံ သရံ ခိပိ.

၂၉. သရော နဠာတမာဟစ္စ၊ မေတ္တစိတ္တေန ထဿ တု၊

ကုမာရပါဒမူလေ’ဝ၊ နိဝတ္တော ပတိ ဘူမိယံ.

၃၀. တထာ’သိ ယာဝ တတိယံ၊ တတော ကုဇ္ဈိမိဂါမိပေါ၊

တတော ခိတ္တော သရောတဿ၊ ကာယံ နိဗ္ဗိဇ္ဇ နိက္ခမိ.

၃၁. သကေသရံ သီဟသီသံ၊ အာဒါယ သပုရံ အဂါ၊

မတဿ ဝင်္ဂရာဇဿ၊ သတ္တာဟာနိ တဒါ အဟု.

၃၂. ရညော အပုတ္တကတ္တာ စ၊ ပတီတာ စဿ ကမ္မုနာ၊

သုတွာ စ ရညော နတ္တုတ္တံ၊ သဉ္ဇာနိတွာ စ မာတရံ.

၃၃. အမစ္စာ သန္နိပတိတာ၊ အခိလာ ဧကမာနသာ၊

သီဟဗာဟု ကုမာရဿ၊ ရာဇာ ဟောဟီတိ အဗြဝုံ.

၃၄. သော ရဇ္ဇံ သမ္ပဋိစ္ဆိတွာ၊ ဒတွာ မာတု ပတိဿ တံ၊

သီဟသီဝလိမာဒါယ၊ ဇာတဘူမိံ ဂတော သယံ.

၃၅. နဂရံ တတ္ထ မာပေသိ၊ အဟု သီဟပုရန္တိ တံ၊

အရညေ ယောဇနသတေ၊ ဂါမေ စာပိ နိဝေသယိ.

၃၆. လာဠရဋ္ဌေ ပုရေ တသ္မိံ၊ သီဟဗာဟုနရာဓိပေါ၊

ရဇ္ဇံ ကာရေသိ ကတွာန၊ မဟေသိံ သီဟသီဝလိံ.

၃၇. မဟေသီ သောဠသက္ခတ္တုံ၊ ယမကေ စ ဒုဝေ ဒုဝေ၊

ပုတ္တေ ဇနယိ ကာလေသာ၊ ဝိဇယော နာမ ဇေဋ္ဌကော.

၃၈. သုမိတ္တော နာမ ဒုတိယော၊ သဗ္ဗေ ဒွတ္တိံသ ပုတ္တကာ၊

ကာလေန ဝိဇယံ ရာဇာ၊ ဥပရဇ္ဇေ’ဘိ သေစယိ.

၃၉. ဝိဇယော ဝိသမာစာရော၊ အာသိ တမ္ပရိသာပိ စ၊

သာဟသာနိ အနေကာနိ၊ ဒုဿဟာနိ ကရိံသုတေ.

၄၀. ကုဒ္ဓေါ မဟာဇနော ရညော၊ တမတ္ထံ ပဋိဝေဒယိ၊

ရာဇာ တေ သညပေတွာန၊ ပုတ္တံ ဩဝဒိ သာဓုကံ.

၄၁. သဗ္ဗံ တထေဝ ဒုတိယံ၊ အဟောသိ တတိယံ ပန၊

ကုဒ္ဓေါ မဟာဇနော အာဟ၊ ပုတ္တံ ဃာတေဟိ တေ ဣတိ.

၄၂. ရာဇာ’ထဝိဇယံ တဉ္စ၊ ပရိဝါရဉ္စ တဿ တံ၊

သတ္တသတာနိ ပုရိသေ၊ ကာရေတွာ အဒ္ဓမုဏ္ဏကေ.

၄၃. နာဝါယ ပက္ခိပါပေတွာ၊ ဝိဿဇ္ဇာပေသိ သာဂရေ၊

တထာ တေသံ ဘရိယာယော၊ တထေဝ စ ကုမာရကေ.

၄၄. ဝိသုံ ဝိသုံ တေ ဝိဿဋ္ဌာ၊ ပုရိသိတ္ထိကုမာရကာ၊

ဝိသုံ ဝိသုံ ဒီပကသ္မိံ၊ ဩက္ကမိံသု ဝသိံသု စ.

၄၅. နဂ္ဂဒီပေါတိ ဉာယိတ္ထ၊ ကုမာရောက္ကန္တဒီပကော၊

ဘရိယောက္ကန္တဒီပေါ တု၊ မဟိန္ဒဒီပကော ဣတိ.

၄၆. သုပ္ပါရကေ ပဋ္ဋနမှိ၊ ဝိဇယော ပန ဩက္ကမိ၊

ပရိသာ သာဟသေနေ’တ္ထ၊ ဘီတော နာဝံ ပုနာ’ရုဟိ.

၄၇. လံကာယံ ဝိဇယသနာမကော ကုမာရော၊

ဩတိဏ္ဏော ထိရမတိ တမ္ဗပဏ္ဏိဒီပေ၊

သာလာနံ ယမကဂုဏာနမန္တရသ္မိံ၊

နိဗ္ဗာတုံ သယိတဒိနေ တထာဂတဿ.

သုဇနပသာဒသံဝေ ဂတ္ထာယကတေ မဟာဝံသေ

ဝိဇယာဂမနံနာမ

ဆဋ္ဌာပရိစ္ဆေဒေါ.