ဧကပညာသတိမ ပရိစ္ဆေဒ

ပဉ္စရာဇကော နာမ

၁. ယုဝရာဇာ တဒါ ဟုတွာ၊ ရာဇာ ဒပ္ပုဠနာမကော၊

ဌပေသိ ဩပရဇ္ဇမှိ၊ အာဒိပဒံ သနာမကံ.

၂. မရိစဝဋ္ဋိဝိဟာရဿ၊ ဂါမံ ဒတွာ တတော ပုရေ၊

စာရိတ္တံ ပုဗ္ဗရာဇူနံ၊ ရက္ခိတွာန မဟိံ ဣမံ.

၃. အဘုတွာ ဒီဃကာလဉှိ၊ ပုဗ္ဗကမ္မေန အတ္တနော၊

ရာဇာ သော သတ္တမေ မာသေ၊ ပဝိဋ္ဌော ပစ္စုနော မုခံ.

၄. ဥပရာဇာ အဟုရာဇာ၊ ဒပ္ပုဠော တဒနန္တရံ၊

ဥဒယဿာဒိပါဒဿ၊ ယုဝရာဇပဒံ အဒါ.

၅. တဒါ စောဠဘယာ ပဏ္ဍု-ရာဇံ ဇနပဒံ သကံ၊

စဇိတွာ နာဝမာရုယှ၊ မဟာတိတ္ထမုပါဂမိ.

၆. အာဏာပေတွာန တံ ရာဇာ၊ ဒိသွာ သန္တုဋ္ဌမာနသော၊

မဟာဘောဂံ အဒါ တဿ၊ နိဝါသေသိ ပုရာ ဗဟိ.

၇. စောဠရာဇေန ယုဇ္ဈိတွာ၊ ဂဟေတွာ ပဋ္ဋနဒွယံ၊

ပဏ္ဍုရာဇဿ ဒမ္မီတိ၊ သန္နဒ္ဓေ လင်္ကရာဇိနိ.

၈. ကေနာ’ပိ ကရဏီယေန၊ ခတ္တိယာ ဒီပဝါသိနော၊

အကံသု ဝိဂ္ဂဟံ ဃောရံ၊ ပါပကမ္မေန ပဏ္ဍုနော.

၉. ပဏ္ဍုရာဇေ’တ္ထ ဝါသေန၊ ကမ္မံ နတ္ထီတိ စိန္တိယ၊

ဌပေတွာ မကုဋာဒီနိ၊ ဂတော ကေရဠသန္တိကံ.

၁၀. ဝိဂ္ဂဟေ နိဋ္ဌိတေ ရာဇာ၊ မဟာမေဃဝနေ တဒါ၊

မဟာဗောဓိဃရဿာ’ဒါ၊ ဂါမံ နဂရသန္တိကေ.

၁၁. အာဝါသံ ရက္ခကော နာမ၊ တဿ သေနာပတီ အကာ၊

ထူပါရာမသမီပမှိ၊ ဣဠင်္ဂေါ ရာဇနာမကံ.

၁၂. ကတံ တံ ပုဗ္ဗရာဇေဟိ၊ ရာဇာ သော ပရိပါလိယ၊

ပတ္တော ဒွါဒသမံ ဝဿံ၊ ယထာကမ္မမုပါဂမိ.

၁၃. ဥဒယော ယုဝရာဇာ’သိ၊ လံကာဝါသီနမိဿရော၊

သေနနာမာဒိပါဒံ သော၊ ဩပရဇ္ဇေ’ဘိသေစယိ.

၁၄. ရညော ဘီတာ တဒါမစ္စာ၊ ပဝိသိံသု တပေါဝနံ၊

ရာဇောပရာဇာ ဂန္တွာန၊ တေသံ သီသာနိ ဆေဒယုံ.

၁၅. တေန ကမ္မေန နိဗ္ဗိန္နာ၊ ယတယော တန္နိဝါသိနော၊

ဟိတွာ ဇနပဒံ ရညော၊ တဒါဂစ္ဆိံသု ရောဟဏံ.

၁၆. တဒါ ဇာနပဒါ စေဝ၊ နာဂရာ စ ဗလာနိ စ၊

ကုပိတာ စဏ္ဍုဝါတေန၊ သာဂရော ဝိယ ကမ္ပိတော.

၁၇. ရတနပါသာဒမာရုယှ၊ ဝိဟာရေ အဘယုတ္တရေ၊

သန္တာသေတွာန ရာဇာနံ၊ ဒဿေတွာန ဝိဘီသိကံ.

၁၈. ဥပတ္ထမ္ဘကမစ္စာနံ၊ ဝိဂ္ဂဟဿ တပေါဝနေ၊

တဒါ သီသာနိ ဆိန္ဒိတွာ၊ ကဝါတေန နိပါတယုံ.

၁၉. တံ သုတွာ ယုဝရာဇာ စ၊ အာဒိပါဒေါ စ တံ သခါ၊

ဥလ္လင်္ဃိတွာန ပါကာရံ၊ သီဃံ ဂစ္ဆိံသု ရောဟဏံ.

၂၀. ဗလကာယောနုဗန္ဓိတွာ၊ ယာဝ ကဏှနဒီတဋာ၊

အလာဘေန စ နာဝါနံ၊ တိဏ္ဏတ္တာ တေသမာဂမိ.

၂၁. ရာဇပုတ္တာဂတာ တတ္ထ၊ ဝနေ အဘယဘေဒိနော၊

ယတီနံ ပုရတော တေသံ၊ နိပဇ္ဇိတွာ ဥရေန တေ.

၂၂. အလ္လဝတ္ထာ’လ္လကေသာ စ၊ ပရိဒေဝိတ္ထ’နေကဓာ၊

ကန္ဒီတွာ ရောဒနံ ကတွာ၊ ခမာပေသုံ တပဿိနော.

၂၃. ခန္တိမေတ္တာနုဘာဝေန၊ တေသံ သာသနသာမိနံ၊

ပုညောဒယော အဟု တေသံ၊ ဥဘိန္နံ ဒီပသာမိနံ.

၂၄. ယုဝရာဇဗလဉ္စေဝ၊ နိကာယတ္တယဝါသိနော၊

ဂမိံသု တေသမာနေတုံ၊ သန္တိဘူတေ မဟာဗလေ.

၂၅. ရာဇပုတ္တာ ဥဘော ဗျတ္တာ၊ ပဏ္ဍိတာ ပံသုကူလိနော၊

ယာစိတွာ တေသမာဒါယ၊ အဂမံသု သကံ ပုရံ.

၂၆. ဘိက္ခူနံ ပုရတော မဂ္ဂံ၊ ရာဇာဂန္တာ ခမာပယိ၊

အာဒါယ တေ ဝနံ တေသံ၊ နေတွာ ရာဇဃရံ ဂတော.

၂၇. တတော ပဋ္ဌာယ စာရိတ္ထံ၊ ပါလေတွာ ပုဗ္ဗရာဇုနံ၊

ရာဇာ သော တတိယေ ဝဿေ၊ ယထာကမ္မမုပါဂမိ.

၂၈. လံကာဘိသေကံ ပတွာန၊ သေနော သော မတိမာ တတော၊

ဥဒယံ အာဒိပါဒံ တံ၊ ယုဝရာဇံ အကာ သခံ.

၂၉. ကဟာပဏသဟဿံ သော၊ ဒုဂ္ဂတာနံ ဥပေါသထေ၊

ဟောတု’ပေါသထိကော ဒတွာ၊ ယာဝဇီဝံ နရာဓိပေါ.

၃၀. ပဋိမာ ဘတ္တဝတ္ထာနိ၊ ဘိက္ခူနံ ဓရဏီ ပတိ၊

အဒါ ဒဏ္ဍိဿရံ ဒါနံ၊ ယာစကာနဉ္စ သိပ္ပီနံ.

၃၁. ဌာနေ ကတ္ထစိ သိပ္ပီနံ၊ ပါသာဒေသု မနောဟရေ၊

ကာရေတွာ ဘောဂဂါမေ စ၊ အဒါပေသိ မဟာမတိ.

၃၂. ကဟာပဏသဟဿံ ဝါ၊ ဒတွာ ပဉ္စသတာနိ ဝါ၊

လင်္ကာယံ ဇိဏ္ဏကာဝါသေ၊ နဝကမ္မမကာရယီ.

၃၃. စတ္တာလီသသဟဿာနိ၊ အဘယုတ္တရစေတိယေ၊

သိလာပတ္ထရဏတ္ထာယ၊ ဒါပေသိ စ မဟီပတိ.

၃၄. မဟာဝါပီသု လံကာယံ၊ ဇိဏ္ဏနိဒ္ဓမနေ အကာ၊

နဝကမ္မဉ္စ မရိယာဒံ၊ ထိယံ ပါသာဏပံသုနာ.

၃၅. အကာ ရာဇဃရေ ရမ္မံ၊ မာလာဂေဟံ မဟာရဟံ၊

ဌပိတံ ပုနရာဇူဟိ၊ ဒါနံ သမ္မာပဝတ္တယိ.

၃၆. ကတံ မလယရာဇေန၊ အမစ္စေန’ဂ္ဂ ဗောဓိနာ၊

ပရိဝေဏံ နာဂသာလံ၊ ဒိသွာ ဂါမ မဒါ တဒါ.

၃၇. ကတွာ စတုဝိဟာရေသု၊ ရူပကမ္မာနိ သာဓုကံ၊

မဏ္ဍပါနိ စ ရမ္မာနိ၊ ဓာတုပူဇံ အကာ သဒါ.

၃၈. ဧဝမာဒီနိ ပုညာနိ၊ အနေကာနိ အနေကဓာ၊

ကတွာ သော နဝမေ ဝဿေ၊ ယထာကမ္မမုပါဂမိ.

၃၉. လံကာဘိသေကံ ပတွာန၊ ယုဝရာဇောဒယော တတော၊

သေနနာမာဒိပါဒံ သော၊ ဩပရဇ္ဇေ’ဘိ သေစယိ.

၄၀. နိဒ္ဒါလု မဇ္ဇပေါ အာသိ၊ ရာဇာ ပါပေန ဇန္တုနံ၊

စောဠော ပမတ္တတံ တဿ၊ သုတွာ သန္တုဋ္ဌမာနသော.

၄၁. ပဏ္ဍုဒေသာတိသေကံ သော၊ ပတ္တုကာ မေတ္ထ ပေသယိ၊

မကုဋာဒီနမတ္ထာယ၊ ဌပိတာနံဝ ပဏ္ဍုနာ.

၄၂. တာနိ နာဒါသိ သော ရာဇာ၊ တေန စောဠော မဟဗ္ဗလော၊

ဗလံ သန္နယှ ပေသေသိ၊ ဗလက္ကာရေန ဂဏှိတုံ.

၄၃. တဒါ သေနာပတိ ဧတ္ထ၊ ပစ္စန္တေ ကုပိတေ ဂတော၊

အာဏာပေတွာန တံ ရာဇာ၊ ယုဇ္ဈနတ္ထာယ ပေသယိ.

၄၄. ဟတော သေနာပတိ တတ္ထ၊ ယုဇ္ဈိ န ရဏေ မတော၊

ကကူဋာဒီနိ အာဒါယ၊ ရာဇာ သော ရောဟဏံ အဂါ.

၄၅. ဂန္တွာ စောဠဗလံ တတ္ထ၊ အလဘိတွာ ပဝေသနံ၊

နိဝတ္တိတွာ သကံ ရဋ္ဌံ၊ အဂမာသိ ဣဓတာ ဘယာ.

၄၆. တတော သေနာပတိဋ္ဌာနေ၊ ဝိဒုရဂ္ဂံ တု နာယကံ၊

ဌပေသိ ရာဇာ လံကိန္ဒော၊ တေဇဝန္တံ မဟာမတိံ.

၄၇. ပစ္စန္တံ စောဠရာဇဿ၊ ဃာတေတွာ သော စမူပတိ၊

အာဏာပေသိ ဣတော နီတံ၊ ဒဿေတွာန ဝိဘီသိတံ.

၄၈. တတော ဒါပေသိ သော သဗ္ဗ-ပရိက္ခာရံ မဟာရဟံ၊

ပံသုကူလိကဘိက္ခူနံ၊ သဗ္ဗေသံ ဒီပဝါသိနံ.

၄၉. မဟာဝိဟာရေ လံကိန္ဒော၊ ပဋိဗိမ္ဗဿ သတ္ထုနော၊

ဇလန္တံ မဏိရံသီဟိ၊ အကာ စူဠာမဏိံ တဒါ.

၅၀. ဩရောဓာ ဝိဒုရာ တဿ၊ ပါဒဇာလေန ပူဇယိ၊

မဏီဟိ ပဇ္ဇလန္တေဟိ၊ ပဋိမံ တံ သိလာမယံ.

၅၁. ဈာပိတံ စောဠရာဇဿ၊ ဗလေန မဏိနာမကံ၊

ပါသာဒံ ကာတုမာရဒ္ဓေါ၊ စုတော ဝဿမှိ အဋ္ဌမေ.

၅၂. ပဉ္စေတေ ဝသုဓာဓိပါ ဝသုမဟိံ ဧကာတပတ္တင်္ကိတံ၊

ဘုတွာ နိဂ္ဂဟသင်္ဂဟေဟိ သကလံ လောကံ ဝသေ ဝတ္တိယ၊

ယာ တာ မစ္စုဝသံ သပုတ္တဝဏိတာ သာမစ္စမိတ္တာနုဂါ၊

ဣစ္စေဝံ သတတံ သရန္တု သုဇနာ ဟာတုံ ပမာဒံ မဒံ.

သုဇနပ္ပသာဒသံဝေဂတ္ထာယ ကတေ မဟာဝံသေ

ပဉ္စရာဇကော နာမ

ဧကပညာသတိမော ပရိစ္ဆေဒေါ.