ဧကစတ္တာလီသတိမ ပရိစ္ဆေဒ

ဒွိရာဇကော

၁. မဟာနာဂနရိန္ဒဿ၊ ဘာဂိနေယျော သုဘာဂိယော၊

သော အဂ္ဂဗောဓိရာဇာသိ၊ အဂ္ဂဗောဓိဂတာသယော.

၂. တေဇေန ဗာဟုံ သောမ္မေန၊ စန္ဒံ သမ္ပုဏ္ဏမဏ္ဍလံ၊

သုမေရုမစလန္တေန၊ ဂမ္ဘိရေန မဟောဒဓိံ.

၃. ဝသုန္ဓရာ ပကမ္ပေန၊ မာရုတံ သမ္ပဝုတ္တိယာ၊

ဗုဒ္ဓိယာမရမန္တာရံ၊ သုဒ္ဓိယာ သရဒမ္ဗရံ.

၄. ကာမဘောဂေန ဒေဝိန္ဒ၊ မတ္ထေန စ နရိဿရံ၊

ဓမ္မေန သုဒ္ဓဝါသေဋ္ဌံ၊ ဝိက္ကမေန မိဂါဓိပံ.

၅. ရာဇဓမ္မေဟိ ရဇ္ဇေဟိ၊ စက္ကဝတ္တိနရိဿရံ၊

ဝေဿန္တရဉ္စ ဒါနေန၊ အနုဂန္တွာ ဇနေ သုတော.

၆. မာတုလံ ဥပရာဇဝှေ၊ ဘာတရံ ယုဝရာဇကေ၊

ဘာဂိနေယျဉ္စ မလယ-ရာဇဌာနေ ဌပေသိ သော.

၇. ဌာနန္တရေ ယထာယောဂံ-သေဋ္ဌာမစ္စေ ဌပေသိ စ၊

ဇနံ သင်္ဂဟဝတ္ထူဟီ၊ ရာဇဓမ္မေဟိ စဂ္ဂဟိ.

၈. ဒေသံ သယောဂ္ဂံ ပါဒါသိ၊ ယုဝရာဇဿ ဒက္ခိဏံ၊

ဝသံ တတ္ထ သိရီဝဍ္ဎ-မာနဝါပိံ သဂါဟယိ.

၉. ကတွာ ဂိရိဝိဟာရဉ္စ၊ သံဃိကံ တဿ ဒါပယိ၊

ခေတ္တာနံ ဒွိသတံ သံဃ-ဘောဂတ္ထာယ မဟာမတိ.

၁၀. အဒါ မလယရာဇဿ၊ ဒါဌာနာမံ သဓီတရံ၊

ပရိဝေဏံ သီရိသံဃ-ဗောဓိနာမဉ္စ ကာရယိ.

၁၁. မဟာသိဝဿ ကာရေသိ၊ ပရိဝေဏံ သနာမကံ၊

ပရိဝါရော’ပိ တဿာသိ၊ ဧဝံ ပုညပရာယနော.

၁၂. ကတွာ သာဓုပစာရေန၊ ပေါရာဏံ သင်္ဂဟံ ဝိဓိံ၊

အန္တရာယံ ဝိသောဓေတုံ၊ ဇိဏ္ဏဉ္စ ပဋိသင်္ခရိ.

၁၃. ကဝယော တဿ ရဇ္ဇမှိ၊ သီဟဠာယ နိရုတ္တိယာ၊

ကာဝေယျေ ဗဟုကေ’ကာသုံ၊ ဝိစိတြနယာသာလိနော.

၁၄. ဝိဟာရေ ဒက္ခိဏေ ကာသိ၊ ပါသာဒံ သုမနောဟရံ၊

အကာ နဝဟိ ဝဿေဟိ၊ ဒိပေ ကဏ္ဋကသောဓနံ.

၁၅. ကုရုန္ဒနာမံ ကာရေတွာ၊ ဝိဟာရံ သဗ္ဗသံဃိကံ၊

ဝါပိံ တန္နာမကံ နာဠိ-ကေရာရာမံ တိယောဇနံ.

၁၆. မဟာသိဝဝှယေ စေဝ၊ သဿံ ကာရယိတုံ အဒါ၊

လာဘသက္ကာရသမ္မာန-မာရာမိကသတံ တဒါ.

၁၇. ဝိဟာရံ တံ သမီပမှိ၊ ကတွာ အမ္ဗိလပဿဝံ၊

ဂါမံ တန္နာမကံ စာဒါ၊ ထေရိယာနံ တပဿီနံ.

၁၈. ဥတ္တရဝလ္လိဝိဟာရဿ၊ ရတနံ ဒီဃဝဏ္ဏိတံ၊

ဒတွာ ဂါမံ ပတိဋ္ဌေသိ၊ သတ္ထုဗိမ္ဗံ သိလာမယံ.

၁၉. ကေဠိဝါတေ စ ကာရေသိ၊ သုမနံ နာမ ပဗ္ဗတံ၊

မဟာတေလဝဋံဗောဓိ-ဃရေ ပါသာဏဝေဒိကံ.

၂၀. ကာရေတွာ လောဟပါသာဒံ၊ ပါသာဒမဟနေ အဒါ၊

ဆတ္တိံသာနံ သဟဿာနံ၊ ဘိက္ခူနံ သော တိစီဝရံ.

၂၁. ဂါမံ ဒတွာ နိယောဇေသိ၊ အာရက္ခံ ဓီတု နာမကံ၊

ဟတ္ထိကုစ္ဆိဝိဟာရေပိ၊ ပါသာဒံ ကာသိ ဗုဒ္ဓိမာ.

၂၂. ဒါဌာ သိဝဿ ဌတွာန၊ ဩဝါဒေ သာဓု ဘိက္ခုနော၊

သမာစရန္တော ဓမ္မေန၊ သက္ကစ္စံ တမုပဋ္ဌဟိ.

၂၃. မူဂသေနာပတိံ စာကာ၊ ဝိဟာရံ သော ဝိသာလကံ၊

ဂါမံ လဇ္ဇိကမေတဿ၊ ဒါသ ဘောဂါယ’ဒါသိ စ.

၂၄. မဟာနာဂဿ ပုညတ္ထံ၊ ရညော တံနာမကံ အကာ၊

မဟာထေရဿ တဉ္စာ’ဒါ၊ ရာဇာ တေပိဋကဿ သော.

၂၅. အတ္တနော သဒိသာနဉ္စ၊ ယောဂီနံ ဝိဂတာလယော၊

ဘိက္ခူနံ စတုသဋ္ဌီနံ၊ ဝိဟာရံ တံ တဒါ အဒါ.

၂၆. ကတွာ တဿေဝ မဟာ-ပရိဝေဏနိဝါသိနော၊

ဘိန္နောရုဒီပံ ဒတွာန၊ ဝဋ္ဋကာကာရပိဋ္ဌိတော.

၂၇. ဒက္ခိဏဂီရိဒဠှဝှေ၊ မဟာနာဂေ စ ပဗ္ဗတေ၊

ကာဠဝါပါဒိကေ စာ’ကာ၊ ဝိဟာရေ ပေါသထာလယေ.

၂၈. ဝိဟာရေ အဘယေ’ကာသိ၊ မဟာပေါက္ခရဏိံ တထာ၊

စေတိယပဗ္ဗတေ စာကာ၊ နာဂသောဏ္ဍိံ ထိရောဒိကံ.

၂၉. မဟိန္ဒတဋဝါဝိဉ္စ၊ ကာရာပေတွာန သာဓုကံ၊

ဧတိဿာ မရိယာဒါယ၊ ထေရံ နေတုံ နိယောဇယိ.

၃၀. မဟာမဟိန္ဒ ထေရမှိ၊ တံဌာနသမုပါဂတော၊

တရစ္ဆာ ဧဝ နေတုန္တိ၊ ကတိကဉ္စေဝ ကာရယိ.

၃၁. ဆတ္တံ သောဏ္ဏဉ္စ ကာရေသိ၊ နိကာယေသုပိ တီသု သော၊

သတ္တာဋ္ဌနဝ ဝါရေသု၊ မဟဂ္ဃရတနေဟိ စ.

၃၂. မဟာတူပေ စတုဗ္ဗီသ-ဘာရံ ဆတ္တံ သုဝဏ္ဏယံ၊

တတ္ထ တတ္ထ စ ပူဇေသိ၊ မဟဂ္ဃံ ရတနုတ္တမံ.

၃၃. ဒါဌာဓာတုဃရံ ကတွာ၊ ဝိစိတြရတနုဇ္ဇလံ၊

ကာသိ ဟေမကရဏ္ဍဉ္စ၊ လောဟနာဝဉ္စ ပါဠိယံ.

၃၄. မဏိမေခလနာမဉ္စ၊ ဗန္ဓာပေသိ သဗန္ဓနံ၊

မဟာမာတိဉ္စ ဂဏှေသိ၊ မဏိဟီရကဝါပိယံ.

၃၅. တဒါ ဧကော မဟာထေရော၊ ဇောတိပါလကနာမကော၊

ပရာဇေသိ ဝိဝါဒေန၊ ဒီပေ ဝေတုလ္လဝါဒိနော.

၃၆. ဒါဌာပဘုတိနာမော’ထ၊ အာဒိပါဒေါ’တိလဇ္ဇိတော၊

ဟတ္ထမုက္ခိပ္ပိ တံ ဟန္တုံ၊ ဂဏ္ဍော သဉ္ဇာယိ တံခဏေ.

၃၇. ရာဇာ တသ္မိံ ပသီဒိတွာ၊ ဝိဟာရေယေဝ ဝါသယိ၊

မာနေန တံ အနာဂမ္မ၊ ဒါဌာပဘူမတော ကိရ.

၃၈. ဒတွာ မဟာဒိပါဒတ္တံ၊ ဘာဂိနေယျဂ္ဂဗောဓိနော၊

ရက္ခိတုံ တံ နိယောဇေသိ၊ ထေရံ သောပိ တမာစရိ.

၃၉. နီလဂေဟပရိစ္ဆေဒံ၊ ကတွာ တဿေဝ သော အဒါ၊

ကတွေဝံ ဗဟုဓာ ပုညံ၊ စတုတ္တိံသေ သမေ မတော.

၄၀. အဂ္ဂဗောဓိ တတော အာသိ၊ ရာဇာ ပုဗ္ဗဿ ရာဇိနော၊

မဟလ္လကတ္တာနံ ခုဒ္ဒ-နာမေန ပရိဒီပယုံ.

၄၁. သော ဒီပံ ပရိပါလေသိ၊ ပုဗ္ဗစာရိတ္တကောဝိဒေါ၊

အကာသိ စ မဟေသိံ သော၊ မာတုလဓီတုမတ္တနော.

၄၂. သံဃဘဒ္ဒံ အသိဂ္ဂါဟံ၊ ကာသိ ဗန္ဓုံ မဟေသိယာ၊

ယထာရဟမဒါ စေဝ၊ ဌာနန္တရမနာလယော.

၄၃. ကတွာ ဝေဠုဝနံ ရာဇာ၊ သာဂလီနံ နိယောဇယီ၊

ဇမ္ဗုရန္တရဂလ္လဉ္စ၊ ကာသိ မာတိကပိဋ္ဌိကံ.

၄၄. ရညော တဿေ’ဝ ရဇ္ဇမှိ၊ ကာလိင်္ဂေသု မဟီပတိ၊

သတ္တာနံ မရဏံ ယုဒ္ဓေ၊ ဒိသွာ သံဝိဂ္ဂမာနသော.

၄၅. ဣမံ ဒီပမုပါဂမ္မ၊ ပဗ္ဗဇ္ဇာ ကတနိစ္ဆယော၊

ဇောတိပါလမှိ ပဗ္ဗဇိ၊ ရာဇာ သက္ကာသိ တံ စိရံ.

၄၆. ပဓာနဌာနံ တဿ’ကာ၊ ဝိဟာရေ မတ္တပဗ္ဗတေ၊

တဿာမစ္စော မဟေသီ စ၊ တထေဝါ’ဂမ္မ ပဗ္ဗဇုံ.

၄၇. ရညော မဟေသီ သုတွာန၊ တဿ ပဗ္ဗဇ္ဇမုတ္တမံ၊

သက္ကစ္စံ တမုပဋ္ဌာသိ၊ ရတနဝှဉ္စ ကာရယိ.

၄၈. အဒါ ရာဇာ အမစ္စဿ၊ ပါစီနကဏ္ဍရာဇိယံ၊

ဝေတ္တဝါသဝိဟာရဉ္စ၊ သော’ဒါ သံဃဿ တံ ယတိ.

၄၉. ရာဇတ္ထေရေမတေ ရာဇာ၊ သောစိတွာ ပရိဒေဝိယ၊

ပဓာနဌာနံ ကာရေသိ၊ စူဠဂလ္လဝိဟာရကေ.

၅၀. ပလံနဂရဂဉ္စေဝ၊ တဿ ဌာနဉှိ ကာရယိ၊

ဧဝံ တဒတ္ထံ ပုညာနိ၊ ဗဟူနိ’ပိ မဟီပတိ.

၅၁. ဇောတိပါလိတ ထေရမှိ၊ တူပါရာမမှိ စေတိယံ၊

ဝန္ဒမာနေ ပဘိဇ္ဇိတွာ၊ ဘာဂေါ တံ ပုရတော ပတိ.

၅၂. ပက္ကောသိတွာန ရာဇာနံ၊ ထေရော ဒဿေသိ ဒုက္ခိတော၊

ရာဇာ ဒိသွာဝ သံဝိဂ္ဂေါ၊ ကမ္မံ ပဋ္ဌပိ တံခဏေ.

၅၃. ဒက္ခိဏက္ခကဓာတုံ သော၊ လောဟပါသာဒကုစ္ဆိယံ၊

သာရက္ခံ ဌပယိတွာန၊ ရတ္တိန္ဒိဝမပူဇယိ.

၅၄. နဝကမ္မေ စိရာယန္တေ၊ ထူပါရာမမှိ ဒေဝတာ၊

သုပိနံ တဿ ဒဿေသုံ၊ ရတ္တိမာရာမိကာ ဝိယ.

၅၅. သစေ ရာဇာ ပပဉ္စေတိ၊ ကာတုံ ဓာတုဃရံ မယံ၊

ဓာတုံ ဂဟေတွာ ဂစ္ဆာမ၊ ယတ္ထတတ္ထာ’တိ တံခဏေ.

၅၆. ရာဇာ ပဗုဒ္ဓေါ သံဝိဂ္ဂေါ၊ န စိရေနေဝ ကာရယိ၊

ကမ္မံ ဓာတုဃရေသဗ္ဗံ၊ စိတ္တကမ္မာဒိသညုတ္တံ.

၅၇. စတဿော ပဋိမာယော စ၊ ပလ္လင်္ကေ စ သိလာမယေ၊

ဟေမစ္ဆတ္တံ သိလာဒန္တ-ကမ္မံ ဂေဟမှိ သဗ္ဗသော.

၅၈. မဟာမစ္စာဒယော’ကံသု၊ ကရဏ္ဍာနံ သတံ နဝ၊

ဒေဝါနံပိယတိဿဿ၊ ကမ္မဉ္စ နိခိလံ နဝံ.

၅၉. သဗ္ဗုဿာဟေန ကာရေတွာ၊ မဟာပူဇံ ယထာရဟံ၊

အာနေတွာ လောဟပါသာဒါ၊ ဓာတုံ သဗ္ဗာဒရေန သော.

၆၀. ဇောတိပါလံ မဟာထေရံ၊ သသံဃံ ပရိဝါရိယ၊

ပရိဟာရေန ဝဍ္ဎေသိ၊ ဓာတုံ ဓာတုကရဏ္ဍကေ.

၆၁. ဓာတုဂေဟဿ ပါဒါသိ၊ လင်္ကာဒီပံ သဟတ္တနာ၊

လာဘဂ္ဂါမ-မဒါ တဿာ၊ ရက္ခကာနံ မဟေသိယာ.

၆၂. နာဂဒီပမှိ ဂေဟဉ္စ၊ ရာဇာယတနဓာတုယာ၊

ဥဏ္ဏလောမဃရဉ္စေဝ၊ ဆတ္တမာမလစေတိယေ.

၆၃. တတ္ထ ဂါမံ ဝိဟာရဿ၊ ယာဂုဒါနာယ’ဒါသိ စ၊

ဝိဟာရဿ’ဘယဿာ’ဒါ၊ ဂါမမင်္ဂဏသာလကံ.

၆၄. နာမံ ကတွာန သော’ကာသိ၊ အတ္တနော စ မဟေသိယာ၊

ဒါဌဂ္ဂဗောဓိမာဝါသံ၊ ဝိဟာရေ အတယုတ္တရေ.

၆၅. ဒေဝီ ကပါလနာဂံ သာ၊ ဝိဟာရံ သာဓုကာရိယ၊

တဿေ’ဝါဒါ ဝိဟာရဿ၊ သမ္ပန္နစတုပစ္စယံ.

၆၆. ဂေဟံ ဇေတဝနေ ကာသိ၊ ရာဇာ ရာဇတစုမ္ဗဋံ၊

ဥဒပါနံ မဏာပေသိ၊ သောဝ ဗောဓိဃရန္တိကေ.

၆၇. ဂင်္ဂါတဋံ ဝလာဟဿံ၊ ဝါပိံ ဂိရိတဋဉ္စကာ၊

မဟာပါဠိံပိ ဝဍ္ဎေသိ၊ ဘတနာဝဉ္စ ကာရယိ.

၆၈. ဘိက္ခူနီနံ မဟေသီ စ၊ ဘတ္တဝံသံ သမာဒိသိ၊

ဧဝံ ပုညာနိ ကတွာ သော၊ ဒိဝံ’ဂါ ဒသမေ သမေ.

၆၉. ဧဝံ ပုညရတာ နရာဓိပတယော သမ္ပန္နဘောဂါ ဂမုံ၊

မစ္စုဿေဝ ဝသံ တတောဟိ မတိမာ သမ္မာ ဘဝဿီဒိသံ၊

ပဿန္တော နိယမံ ဝိဟာယ ဝိဓိနာ သဗ္ဗံ ဘဝေ သင်္ဂတိံ၊

နိဗ္ဗာနာဘိမုခေါ စရေယျ ဓိတိမာ ပဗ္ဗဇ္ဇမဇ္ဈူပဂေါ.

သုဇနပ္ပသာဒသံဝေဂတ္ထာယ ကတေ မဟာဝံသေ

ဒွိရာဇကော နာမ

ဧကစတ္တာလီသတိမော ပရိစ္ဆေဒေါ.