ဧကူနတိံသတိမ ပရိစ္ဆေဒ

ထူပါရမ္ဘော

၁. ဧဝံ သမတ္တေ သမ္ဘာရေ၊ ဝေသာခပုဏ္ဏမာသီယံ၊

ပတ္တေ ဝိသာခနက္ခတ္တေ၊ မဟာထူပတ္ထမာရဘိ.

၂. ဟာရေတွာန တဟိံ ထူပံ၊ ထူပဌာနမခါဏယိ၊

သတ္ထဟတ္ထော မဟီပါလော၊ ထိရီ ကာတုံ မနေကဓာ.

၃. ယောဓေဟိ အာဟရာပေတွာ၊ ဂုဠပါသာဏကေ တဟိံ၊

ကူဋေဟိ အာဟနာပေတွာ၊ ပါသာဏေ စုဏ္ဏိတေ အထ.

၄. စမ္မဝနဒ္ဓ ပါဒေဟိ၊ မဟာဟတ္ထီဟိ မဒ္ဒယိ၊

ဘူမိယာ ထိရီဘာဝတ္ထံ၊ အတ္ထာနတ္ထဝိစက္ခဏော.

၅. အာကာသ ဂင်္ဂါပတိတ-ဋ္ဌာနေ သတတတိန္တကေ၊

မတ္တိကာ သုခုမာ တတ္ထ၊ သမန္တာ တိံ သယောဇနေ.

၆. နဝနီတ မတ္တိကာ’တေသာ၊ သုခုမတ္တာ ပပုစ္စတိ၊

ခီဏာသဝါ သာမဏေရာ၊ မတ္တိကာ အာဟရုံ တတော.

၇. မတ္တိကာ အတ္ထရာပေသိ၊ တတ္ထ ပါသာဏကောဋ္ဋိမေ၊

ဣဋ္ဌကာ အတ္ထရာပေသိ၊ မတ္တိကော ပရိဣဿရော.

၈. တဿော ပရိခရသုဓံ၊ ကုရုဝိန္ဒံ တတောပရိ၊

တဿော ပရိအယောဇာလံ၊ မရုမ္ဗန္တု တတောပရံ.

၉. အာဟဋံ သာမဏေရေဟိ၊ ဟိမဝန္တာ သုဂန္ဓကံ၊

သန္ထရာပေသိ ဘူမိန္ဒော၊ ဖဠိကန္တု တတောပရိ.

၁၀. သီလာယော သန္ထရာပေသိစ္ဆ ဖဠိကသန္ထရော ပရိ၊

သဗ္ဗတ္ထ မတ္တိကာကိစ္စေ၊ နဝနီတဝှယာ အဟု.

၁၁. နိယျာသေန ကပိဋ္ဌဿ၊ သန္နိတေန ရသောဒကေ၊

အဋ္ဌင်္ဂုလံ ဗဟလဧတာ၊ လောဟပဋ္ဋံ သီလောပရိ.

၁၂. မနောသိလာယတိလတေ-လသန္နိတာယ တတော ပရိ၊

သတ္တင်္ဂုလံ သဇ္ဇုပဋ္ဋံ၊ သန္ထရေသိ ရထေသဘော.

၁၃. မဟာထူပ ပတိဋ္ဌာန-ဌာနေ ဧဝံ မဟီပတိ၊

ကာရေတွာ ပရိကမ္မာနိ၊ ဝိပ္ပသန္နေန စေတသာ.

၁၄. အာသဠှီ သုက္ကပက္ခဿ၊ ဒိဝသမှိ စတုဒ္ဒသေ၊

ကာရေတွာ ဘိက္ခုသံဃဿ၊ သန္နိပါတမိဒံ ဝဒိ.

၁၅. မဟာစေတိယ မတ္ထာယ၊ ဘဒန္တာမင်္ဂလိဋ္ဌကံ၊

ပတိဋ္ဌာပေဿံ သွေ ဧတ္ထ၊ သဗ္ဗော သံဃော သမေတုနော.

၁၆. ဗုဒ္ဓ ပူဇာ ပယောဂေန၊ မဟာဇနဟီတတ္ထိကော၊

‘‘မဟာဇနော’ ပေါသထိကော၊ ဂန္ဓမာလာဒိဂဏှိယ.

၁၇. မဟာထူပ ပတိဋ္ဌာန-ဌာနံ ယာတု သုဝေ’’ဣတိ၊

စေတိယ ဌာန ဘူသာယ၊ အမစ္စေ စ နိယောဇယိ.

၁၈. အာဏာပိတာ နရိန္ဒေန၊ မုနိနော ပိယဂါရဝါ၊

အနေကေဟိ ပကာရေဟိ၊ တေ တံ ဌာနမလင်္ကရုံ.

၁၉. နဂရံ သကလဉ္စေဝ၊ မဂ္ဂဉ္စေဝ ဣဓာဂတံ၊

အနေကေဟိ ပကာရေဟိ၊ အလင်္ကာရယိ ဘူပတိ.

၂၀. ပဘာတေ စ စတုဒွါရေ၊ နဂရဿ ဌပါပယိ၊

နဟာပိတေ နဟာပကေ စ၊ အပ္ပကေ စ ဗဟူတထာ.

၂၁. ဝတ္ထာနိ ဂန္ဓမာလာ စ၊ အန္နာနိ မဓုရာနိ စ၊

မဟာဇနတ္ထံ ဘူမိန္ဒော၊ မဟာဇနဟိတေ ရတော.

၂၂. ပဋိယတ္တာနိ ဧတာနိ၊ သာဒိယိတွာ ယထာရုစိ၊

ပေါရာဇာနပဒါစေဝ ထူပဌာနမုပါဂမုံ.

၂၃. သုမဏ္ဍိတေဟိ နေကေဟိ၊ ဌာနန္တရ ဝိဓာနတော၊

အာရက္ခိတော အမစ္စေဟိ၊ ယထာဌာနံ မဟီပတိ.

၂၄. သုမဏ္ဍိတာဟိ နေကာဟိ၊ ဒေဝကညူပမာဟိ စ၊

နာဋကီဟိ ပရိဗ္ဗုဠှော၊ သုမဏ္ဍိတ ပဿာဓိတော.

၂၅. စတ္တာလီသ သဟဿေဟိ၊ နရေဟိ ပရိဝါရိတော၊

နာနာ တူရိယ သင်္ဃုဋ္ဌော၊ ဒေဝရာဇ ဝိလာသဝါ.

၂၆. မဟာထူပ ပတိဋ္ဌာနံ၊ ဌာနာဌာန ဝိစက္ခဏော၊

အပရဏှေ ဥပါဂဉ္ဆိ၊ နန္ဒယန္တော မဟာဇနံ.

၂၇. အဋ္ဌုတ္တရသဟဿံ သော၊ သာဋကာနိဋ္ဌပါပိယ၊

ပုဋဗဒ္ဓါနိ မဇ္ဈမှိ၊ စတုပဿေ တတော ပန.

၂၈. ဝတ္ထာနိ ရာသီံကာရေသိ၊ အနေကာနိ မဟီပတိ၊

မဓုသပ္ပိ ဂုဠာဒီဟိ စ၊ မင်္ဂလတ္ထံ ဌပါပယိ.

၂၉. နာနာဒေသေဟိပါ’ဂဉ္ဆုံ၊ ဗဟဝေါ ဘိက္ခဝေါ ဣဓ၊

ဣဓ ဒီပဋ္ဌသံဃဿ၊ ကာ ကထာဝ ဣဓာဂမေ.

၃၀. ထေရော’ သီတိ သဟဿာနိ၊ ဘိက္ခူ အာဒါယ အာဂမာ၊

ရာဇဂဟဿ သာမန္တာ၊ ဣန္ဒဂုတ္တော မဟာဂဏီ.

၃၁. သဟဿာနိ’သိပတနာ၊ ဘိက္ခူနံ ဒွါဒသာ’ဒိယ၊

ဓမ္မသေနော မဟာထေရော၊ စေတိယဌာနမာဂမာ.

၃၂. သဋ္ဌိဘိက္ခုသဟဿာနိ၊ အာဒါယ ဣဓမာဂမာ၊

ပီယဒဿီ မဟာထေရော၊ ဇေတာရာမ ဝိဟာရတော.

၃၃. ဝေသာလီ မဟာဝနတော၊ ထေရောရု ဗုဒ္ဓရက္ခိတော၊

အဋ္ဌာရသ သဟဿာနိ၊ ဘိက္ခူ အာဒါယ အာဂမာ.

၃၄. ကောသမ္ဗီ ဃောသိတာရာမာ၊ ထေရောရု ဓမ္မရက္ခိတော၊

တိံသဘိက္ခုသဟဿာနိ၊ အာဒါယ ဣဓ အာဂမာ.

၃၅. အာဒါယုဇ္ဇေနီယံ ထေရော၊ ဒက္ခိဏ ဂိရိတော ယတိ၊

စတ္တာရီသ သဟဿာနိ၊ အဂေါရု သင်္ဃရက္ခိတော.

၃၆. ဘိက္ခူနံ သတသဟဿံ၊ သဋ္ဌသဟဿာနိ စာ’ဒိယ၊

ပုပ္ဖပုရေ’သောကရာမာ၊ ထေရော မိတ္တိဏ္ဏ နာမကော.

၃၇. ဒုဝေ သတသဟဿာနိ၊ သဟဿာနိ အသီတိ စ၊

ဘိက္ခူ ဂဟေတွာနု’တ္တိဏ္ဏော၊ ထေရော ကသ္မိရမဏ္ဍလာ.

၃၈. စတ္တာရီသတ သဟဿာနိ၊ သဟဿာနိ စ သဋ္ဌိ စ၊

ဘိက္ခူ ပလ္လဝဘောဂမှာ၊ မဟာဒေဝေါ မဟာမတီ.

၃၉. ယောနနဂရာ’လသန္ဒာသော၊ ယောန မဟာဓမ္မရက္ခိတော၊

ထေရော တိံသ သဟဿာနိ၊ ဘိက္ခူ အာဒါယ အာဂမာ.

၄၀. ဝဉ္ဈာဋဝိဝတ္တနိယာ၊ သေနာသနာ တု ဥတ္တရော၊

ထေရော သဋ္ဌိသဟဿာနိ၊ ဘိက္ခူ အာဒါယ အာဂမာ.

၄၁. စိတ္တဂုတ္တော မဟာထေရော၊ ဗောဓိမဏ္ဍဝိဟာရတော၊

တိံသ ဘိက္ခုသဟဿာနိ၊ အာဒိယိတွာ ဣဓာဂမာ.

၄၂. စန္ဒဂုတ္တော မဟာထေရော၊ ဝနဝါသပဒေသတော၊

အာဂါသီတိ သဟဿာနိ၊ အာဒိယိတွာ ယတီ ဣဓ.

၄၃. သူရိယဂုတ္တောမဟာထေရော၊ ကေလာသမှာ ဝိဟာရတော၊

ဆန္နဝုတိ သဟဿာနိ၊ ဘိက္ခူအာဒါယ အာဂမာ.

၄၄. ဘိက္ခူနံ ဒီပဝါသိနံ၊ အာဂတာနဉ္စ သဗ္ဗသော၊

ဂဏနာယ ပရိစ္ဆေဒေါ၊ ပေါရာဏေဟိ န ဘာသိတော.

၄၅. သမာဂတာနံ သဗ္ဗေသံ၊ ဘိက္ခုနံ တံ သမာဂမေ၊

ဝုတ္တာ ခီဏာသဝါယေဝ၊ တေ ဆန္နဝုတိကောဋိယော.

၄၆. တေ မဟာစေတိယဌာနံ၊ ပရိဝါရေတွာ ယထာရဟံ၊

မဇ္ဈေ ဌပေတွာ ဩကာသံ၊ ရညော အဋ္ဌံသု ဘိက္ခဝေါ.

၄၇. ပဝိသိတွာ တဟိံ ရာဇာ၊ ဘိက္ခုသံဃံ တထာ ဌိတံ၊

ဒိသွာ ပသန္နစိတ္တေန၊ ဝန္ဒိတွာ ဟဋ္ဌမာနသော.

၄၈. ဂန္ဓမာလာဟိ ပူဇေတွာ၊ ကတွာန တိပဒက္ခိဏံ၊

မဇ္ဈေ ပုဏ္ဏဃဋဌာနံ၊ ပဝိသိတွာ သမင်္ဂလံ.

၄၉. သုဝဏ္ဏခီလေ ပဋိမုက္ကံ၊ ပရိဗ္ဘမနဒဏ္ဍကံ၊

ရာဇတေန ကတံ သုဒ္ဓံ၊ သုဒ္ဓပီတိ ဗလောဒယော.

၅၀. ဂါဟယိတွာ အမစ္စေန၊ မဏ္ဍိတေန သုဇာတိနာ၊

အဘိမင်္ဂလဘူတေန၊ ဘူတဘူတိပရာယဏော.

၅၁. မဟန္တံ စေတိယာဝဋ္ဋံ၊ ကာရေတုံ ကတနိစ္ဆယော၊

ဘမာပယိတု မာရဒ္ဓေါ၊ ပရိကမ္မိတ ဘူမိယံ.

၅၂. သိဒ္ဓတ္ထော နာမ နာမေန၊ မဟာထေရော မဟိဒ္ဓိကော၊

တထာကရောန္တံ ရာဇာနံ၊ ဒီဃဒဿီ နိဝါရယိ.

၅၃. ‘‘ဧဝံ မဟန္တံ ထူပဉ္စ၊ အယံ ရာဇာ’ရဘိဿတိ၊

ထူပေ အနိဋ္ဌိတေယေဝ၊ မရဏံ အဿ ဟေဿတိ.

၅၄. ဘဝိဿတိ မဟန္တော စ၊ ထူပေါဒုပ္ပဋိသင်္ခရော၊

ဣတိ သော နာဂတံ ပဿံ၊ မဟန္တတ္တံ နိဝါရယိ.

၅၅. သံဃဿ စ အနုညာယ၊ ထေရော သမ္ဘာဝနာယစ၊

မဟန္တံ ကတ္တုကာမော’ပိ၊ ဂဏှိတွာ ထေရဘာသိတံ.

၅၆. ထေရဿ ဥပဒေသေန၊ တဿ ရာဇာ အကာရယိ၊

မဇ္ဈိမံ စေတိယာဝဋ္ဋံ၊ ပတိဋ္ဌာပေတုမိဋ္ဌိကာ.

၅၇. သောဝဏ္ဏရဇတေ စေဝ၊ ဃဋေ မဇ္ဈေဋ္ဌပါပယိ၊

အဋ္ဌဋ္ဌ အဋ္ဌိတုဿာဟော၊ ပရိဝါရိယ တေ ပန.

၅၈. အဋ္ဌုတ္တရသဟဿဉ္စ၊ ဌပါပေသိ နဝေ ဃဋေ၊

အဋ္ဌုတ္တရေ အဋ္ဌုတ္တရေ၊ ဝတ္ထာနံ တု သတေ ပန.

၅၉. ဣဋ္ဌိကာပဝရာ အဋ္ဌ၊ ဌပါပေသိ ဝိသုံ ဝိသုံ၊

သမ္မတေန အမစ္စေန၊ ဘူသိတေန အနေကဓာ.

၆၀. တတော ဧကံ ဂါဟယိတွာ၊ နာနာမင်္ဂလသင်္ခတေ၊

ပုရိတ္ထိမဒိသာဘာဂေ၊ ပဌမံ မင်္ဂလိတ္ထိကံ.

၆၁. ပတိဋ္ဌာပေသိ သက္ကစ္စံ၊ မနုညေ ဂန္ဓကဒ္ဒမေ၊

ဇာတိသုမန ပုပ္ဖေသု၊ ပူဇိတေသု တဟိံ ပန.

၆၂. အဟောသိ ပုထဝီကမ္ပော၊ သေသာ သတ္တာပိ သတ္တဟိ၊

ပတ္တိဋ္ဌာပေသ’ မစ္စေဟိ၊ မင်္ဂလာနိ စ ကာရယိ.

၆၃. ဧဝံ အသာဠှမာသဿ၊ သုက္ကပက္ခေ’ဘိသမ္မတေ၊

ဥပေါသထေ ပန္နရသေ၊ ပတိဋ္ဌာပေသိ ဣဋ္ဌိကာ.

၆၄. စတုဒ္ဒိသံ ဌိတေ တတ္ထ၊ မဟာထေရေ အနာသဝေ၊

ဝန္ဒိတွာ ပူဇယိတွာ စ၊ သုပ္ပတိတော ကမေန သော.

၆၅. ပုဗ္ဗုတ္တရံ ဒိသံ ဂန္တွာ၊ ပိယဒဿိံ အနာသဝံ၊

ဝန္ဒိတွာန မဟာထေရံ၊ အဋ္ဌာသိ တဿ သန္တိကေ.

၆၆. မင်္ဂလံ တတ္ထ ဝဍ္ဎေန္တော၊ တဿ ဓမ္မမဘာသိသော၊

ထေရဿ ဒေသနာ တဿ၊ ဇနဿာ’ဟောသိ သာတ္ထိကာ.

၆၇. စတ္တာလီသသဟဿာနံ၊ ဓမ္မာဘိသမယော အဟု၊

စတ္တာလီသသဟဿာနံ၊ သောတာပတ္တိဖလံ အဟု.

၆၈. သဟဿံ သကဒါဂါမိ၊ အနာဂါမိ စ တတ္တကာ၊

သဟဿံယေဝ အရဟန္တော၊ တတ္ထ’ဟေသုံ ဂိဟီဇနာ.

၆၉. အဋ္ဌာရသသဟဿာနိ၊ ဘိက္ခူဘိက္ခုနိယော ပန၊

စုဒ္ဒသေဝ သဟဿာနိ၊ အရဟတ္တေ ပတိဋ္ဌယုံ.

၇၀. ဧဝမ္ပပသန္နမတိမာ ရတနတ္တယမှိ၊

စာဂါမိမုတ္တမနသာဇနတာဟိ တေန၊

လောကတ္ထသိဒ္ဓိ ပရမာ ဘဝတီတိ ဉတွာ၊

သဒ္ဓါဒိနေကဂုဏယောဂ ရတိံ ကရေယျာတိ.

သုဇနပ္ပသာဒသံ ဝေဂတ္ထာယ ကတေ မဟာဝံသေ

ထူပါရမ္ဘော နာမ

ဧကူနတိံသတိမော ပရိစ္ဆေဒေါ.