သတ္တဝီသတိမ ပရိစ္ဆေဒ
လောဟပါသာဒမဟော
၁. တတော ရာဇာ ဝိစိန္တေသိ၊ ဝိဿုတံ သုဿုတံ သုတံ၊
မဟာပညော သဒါ ပုညော၊ ပညာယ ကတနိစ္ဆယော.
၂. ‘‘ဒီပပ္ပသာဒကော ထေရော၊ ရာဇိနော အယျကဿ မေ၊
ဧဝံ ကိရာဟနတ္တာ တေ၊ ဒုဋ္ဌဂါမဏိဘူပတိ.
၃. မဟာပုညော မဟာထူပံ၊ သောဏ္ဏမာလိံ မနောရမံ၊
ဝီသံဟတ္ထသတံ ဥစ္စံ၊ ကာရေဿတိ အနာဂတေ.
၄. ပုနော ဥပေါသထာဂါရံ၊ နာနာရတနမဏ္ဍိတံ၊
နဝဘူမံ ကရိတွာန၊ လောဟပါသာဒ မေဝ စ.
၅. ဣတိ စိန္တိယ ဘူမိန္ဒော၊ လိခိတွေဝံ ဌပါပိတံ၊
ပေက္ခာပေန္တော ရာဇဂေဟေ၊ ဌိတံ ဧဝ ကရဏ္ဍကေ.
၆. သောဝဏ္ဏပဋ္ဋံ လဒ္ဓါန၊ လေခံ တတ္ထ အဝါစယိ၊
‘‘စတ္တာလီသသတံ ဝဿံ၊ အတိက္ကမ္မ အနာဂတေ.
၇. ကာကဝဏ္ဏသုတော ဒုဋ္ဌ-ဂါမဏိမနုဇာဓိပေါ၊
ဣဒဉ္စိဒဉ္စ ဧဝဉ္စ၊ ကာရေဿတီ’’တိ ဝါစိတံ.
၈. သုတွာ ဟဋ္ဌော ဥဒါနေတွာ၊ အပ္ပေါဋ္ဌေသိ မဟီပတိ၊
တတော ပါတော’ဝ ဂန္တွာန၊ မဟာမေဃဝနံ သုဘံ.
၉. သန္နိပါတံ ကာရယိတွာ၊ ဘိက္ခုသံဃဿ အဗြဝိ၊
‘‘ဝိမာနတုလျံ ပါသာဒံ၊ ကာရယိဿာမိ ဝေါ အဟံ.
၁၀. ဒိဗ္ဗံ ဝိမာနံ ပေသေတွာ၊ တဒါ လေခံ အဒါထ မေ’’၊
ဘိက္ခုသံဃော ဝိသဇ္ဇေသိ၊ အဋ္ဌ ခီဏာသဝေ တဟိံ.
၁၁. ကဿပမုနိနော ကာလေ၊ အသောကော နာမ ဗြာဟ္မဏော၊
အဋ္ဌ သလာကဘတ္တာနိ၊ သံဃဿ ပရိဏာမိယ.
၁၂. ဘရဏိံ နာမ ဒါသိံ သော၊ ‘‘နိစ္စံ ဒေဟီ’’တိ အဗြဝိ၊
ဒတွာ သာ တာနိ သက္ကစ္စံ၊ ယာဝဇီဝံ တတော စုတာ.
၁၃. အာကာသဋ္ဌဝိမာနမှိ၊ နိဗ္ဗတ္တိရုစိရေ သုဘေ၊
အစ္ဆရာနံ သဟဿေန၊ သဒါ’သိ ပရိဝါရိတာ.
၁၄. တဿာ ရတနပါသာဒေါ၊ ဒွါဒသယောဇနုဂ္ဂတော၊
ယောဇနာနံ ပရိက္ခေပေါ၊ စတ္တာလီသဉ္စ အဋ္ဌ စ.
၁၅. ကူဋာဂါရသဟဿေန၊ မဏ္ဍိတော နဝဘူမိကော၊
သဟဿဂဗ္ဘသမ္ပန္နော၊ ရာဇမာနော စတုမ္မုခေါ.
၁၆. သဟဿသင်္ခသံဝုတ္တိ၊ သီဟပဉ္ဇရ နေတ္တဝါ၊
သကိင်္ကဏိကဇာလာယ၊ သဇ္ဇိတော ဝေဒိကာယ စ.
၁၇. အမ္ဗလဋ္ဌိကပါသာဒေါ၊ တဿ မဇ္ဈေ ဌိတော အဟု၊
သန္တမတော ဒိဿမာနော၊ ပဂ္ဂဟိတဓဇာကုလော.
၁၈. တာဝတိံသဉ္စ ဂစ္ဆန္တာ၊ ဒိသွာ ထေရံ တမေဝ တေ၊
ဟိင်္ဂုလေန တဒါ လေခံ၊ လေခယိတွာ ပဋေ တတော.
၁၉. နိဝတ္တိတွာန အာဂန္တွာ၊ ပဋံ သံဃဿ ဒဿယုံ၊
သံဃော ပဋံ ဂဟေတွာ တံ၊ ပါဟေသိ ရာဇသန္တိကံ.
၂၀. တံ ဒိသွာ သုမနော ရာဇာ၊ အာဂမ္မာရာမ မုတ္တမံ၊
အာလေခတုလျံ ကာရေသိ၊ လောဟပါသာဒ မုတ္တမံ.
၂၁. ကမ္မာရမ္ဘနကာလေဝ၊ စတုဒွါရမှိ ဘောဂဝါ၊
အဋ္ဌသတသဟဿာနိ၊ ဟိရညာနိ ဌပါပယိ.
၂၂. ပုဋသဟဿ ဝတ္ထာနိ၊ ဒွါရေ ဒွါရေ ဌပါပယိ၊
ဂုဠ တေလသက္ခရမဓု-ပုရာ စာနေက စာဋိယော.
၂၃. ‘‘အမူလကကမ္မ မေတ္ထ၊ န ကာတဗ္ဗ’’န္တိ ဘာသိယ၊
အဂ္ဃါပေတွာ ကတံ ကမ္မံ၊ တေသံ မူလမဒါပယိ.
၂၄. ဟတ္ထသတံ ဟတ္ထသတံ၊ အာသိ ဧကေက ပဿတော၊
ဥစ္စတော တတ္တကောယေဝ၊ ပါသာဒေါ ဟိ စတုမ္မုခေါ.
၂၅. တသ္မိံ ပါသာဒ သေဋ္ဌသ္မိံ၊ အဟေသုံ နဝဘူမိယော၊
ဧကေကိဿာ ဘူမိယာ စ၊ ကူဋာဂါရသတာနိ စ.
၂၆. ကူဋာဂါရာနိ သဗ္ဗာနိ၊ သဇ္ဈုနာ ခစိတာ န’ယုံ၊
ပဝါလဝေဒိကာ တေသံ၊ နာနာရတန ဘူသိတာ.
၂၇. နာနာရတန စိတ္တာနိ၊ တာသံ ပဒုမကာနိ စ၊
သဇ္ဈကိံကိဏိကာပန္တိ-ပရိက္ခိတ္တာဝ တာ အဟု.
၂၈. သဟဿံ တတ္ထ ပါသာဒေါ၊ ဂဗ္ဘာ အာသုံ သုသင်္ခတာ၊
နာနာရတန ခစိတာ၊ သီဟပဉ္ဇရနေတ္တဝါ.
၂၉. နာရိဝါဟနယာနန္တု၊ သုတွာ ဝေဿဝဏဿ သော၊
တဒါ ကာရမကာရေသိ၊ မဇ္ဈေ ရတနမဏ္ဍပံ.
၃၀. သီဟဗျဂ္ဃါဒိရူပေဟိ၊ ဒေဝတာ ရူပကေဟိ စ၊
အဟု ရတနမယောဟေ’သ၊ ထမ္ဘေဟိ စ ဝိဘူသိတော.
၃၁. မုတ္တာဇာလပရိက္ခေပေါ၊ မဏ္ဍပန္တေ သမန္တတော၊
ပဝါလဝေဒိကာ စေတ္ထ၊ ပုဗ္ဗေ ဝုတ္တဝိဓာ အဟု.
၃၂. သတ္တရတန စိတ္တဿ၊ ဝေမဇ္ဈေ မဏ္ဍပဿ တု၊
ရုစိရော ဒန္တပလ္လင်္ကော၊ ရမ္မော ဖလိကသန္ထရော.
၃၃. ဒန္တမယာပဿယေ’တ္ထ၊ သုဝဏ္ဏမယ သူရိယော၊
သဇ္ဈုမယေ စန္ဒိမာ စ၊ တာရာ စ မုတ္တကာ မယာ.
၃၄. နာနာရတန ပဒုမာနိ၊ တတ္ထ တတ္ထ ယထာရဟံ၊
ဇာတကာနိ စ တတ္ထေဝ၊ အာသုံ သောဏ္ဏလတန္တရေ.
၃၅. မဟဂ္ဃပစ္စတ္ထရဏေ၊ ပလ္လင်္ကေ’တိ မနောရမေ၊
မနောဟရာ’သိဋ္ဌပိတာ၊ ရုစိရံ ဒန္တဗီဇနီ.
၃၆. ပဝါလပါဒုကာ တတ္ထ၊ ဖလိကမှိ ပတိဋ္ဌိတာ၊
သေတစ္ဆတ္တံ သဇ္ဈုဒဏ္ဍံ၊ ပလ္လင်္ကော’ပရိသောဘထ.
၃၇. သတ္တရတန မယာနေတ္ထ၊ အဋ္ဌမင်္ဂလိကာနိ စ၊
စတုပ္ပဒါနံ ပန္တီ စ၊ မဏိမုတ္တန္တရာ အဟုံ.
၃၈. ရဇတာနဉ္စ ဃဏ္ဋာနံ၊ ပန္တီ ဘတ္တန္တလမ္ဗိတာ၊
ပါသာဒဆတ္တပလ္လင်္က-မဏ္ဍပါ’သုံ အနဂ္ဃိကာ.
၃၉. မဟဂ္ဃ ပညပါပေသိ၊ မဉ္စပီဌံ ယထာရဟံ၊
တထေဝ ဘူမတ္ထရဏံ၊ ကမ္ဗလဉ္စ မဟာရဟံ.
၄၀. အာစာမ ကုမ္ဘိသောဝဏ္ဏာ၊ ဥလုင်္ကော စ အဟု တဟိံ၊
ပါသာဒ ပရိဘောဂေသု၊ သေသေသု စ ကထာ’ ဝကာ.
၄၁. စာရုပါကာရ ပရိဝါရော၊
သော စတုဒွါရကောဋ္ဌကော၊
ပါသာဒေါ’လင်္ကတော သောဘိ၊
တာဝတိံသ သဘာ ဝိယ.
၄၂. တမ္ဗ လောဟိဋ္ဌကာဟေ’သော၊
ပါသာဒေါ ဆာဒိတော အဟု၊
လောဟ ပါသာဒ ဝေါဟာရော၊
တေန တဿ အဇာယထ.
၄၃. နဋ္ဌိတေ လောဟပါသာဒေ၊ သော သံဃံ သန္နိပါတယိ၊
ရာဇာ သံဃော သန္နိပတိ၊ မရိစဝဋ္ဋိမဟေ ဝိယ.
၄၄. ပုထုဇ္ဇနာ’ဝ အဋ္ဌံသု၊ ဘိက္ခူ ပဌမဘူမိယံ၊
တေပိဋကာ ဒုတိယာယ၊ သောတာပန္နာဒယော ပန.
၄၅. ဧကေ ကေယေဝ အဋ္ဌံသု၊ တတိယာဒီသု ဘူမိသု၊
အရဟန္တော စ အဋ္ဌံသု၊ ဥဒ္ဓံ စတူသု ဘူမိသု.
၄၆. သံဃဿ ဒတွာ ပါသာဒံ၊ ဒက္ခိဏမ္ဗုပုရဿရံ၊
ရာဇာ’ဒတ္ထ မဟာဒါနံ၊ သတ္တာဟံ ပုဗ္ဗကံ ပိယ.
၄၇. ပါသာဒ မဟစတ္တာနိ၊ မဟာစာဂေန ရာဇိနာ၊
အနဂ္ဃါနိ ဌပေတွာန၊ အဟေသုံ တိံသကောဋိယော.
၄၈. နိဿာရေ ဓနနိစယေ ဝိသေသသာရံ၊
ယေ ဒါနံ ပရိဂဏယန္တိ သာဓုပညာ၊
တေ ဒါနံ ဝိပုလမပေတ စိတ္တသင်္ဂါ၊
သတ္တာနံ ဟိတပရမာ ဒဒန္တိ ဧဝံတိ.
သုဇနပ္ပသာဒသံဝေဂတ္ထာယ ကတေ မဟာဝံသေ
လောကဟပါသာဒမဟော နာမ
သတ္တဝီသတိမော ပရိစ္ဆေဒေါ.