သတ္တရသမ ပရိစ္ဆေဒ

ဓာတုအာဂမနော

၁. ဝုတ္ထဝဿော ပဝါရေတွာ၊ ကတ္တိကပုဏ္ဏမာသိယံ၊

အဝေါစေ’ဒံ မဟာရာဇံ၊ မဟာထေရော မဟာမတိ.

၂. စိရဒိဋ္ဌော ဟိ သမ္ဗုဒ္ဓေါ၊ သတ္ထာ နော မနုဇာဓိပ၊

အနာထဝါသံ အဝသိမှ၊ နတ္ထိ နော ပူဇိယံ ဣဓ.

၃. ‘‘ဘာသိတ္ထ နနု ဘန္တေမေ၊ သမ္ဗုဒ္ဓေါ နိဗ္ဗုတော’’ ဣတိ၊

အာဟ ဓာတူသု ဒိဋ္ဌေသု၊ ဒိဋ္ဌော ဟောတိ ဇိနော’’ ဣတိ.

၄. ဝိဒိတော ဝေါ အဓိပ္ပါယော၊ ထူပဿ ကာရဏေ မယာ၊

ကာရေဿာမိ အဟံ ထူပံ၊ တုမှေ ဇာနာထ ဓာတုယော.

၅. မန္တေဟိ သုမနေနာတိ၊ ထေရော ရာဇာနမဗြဝိ၊

ရာဇာ’ဟ သာမဏေရံ တံ၊ ကုတော လစ္ဆာမ ဓာတုယော.

၆. ဝိဘူသယိတွာ နဂရံ၊ မဂ္ဂဉ္စ မနုဇာဓိပ၊

ဥပေါသထီ သပရိသော၊ ဟတ္ထိံ အာရုယှ မင်္ဂလံ.

၇. သေတစ္ဆတ္တံ ဓာရယန္တော၊ တာလာဝစရသံဟိတော၊

မဟာနာဂဝနုယျာနံ၊ သာယနှသမယေ ဝဇ.

၈. ဓာတုဘေဒညုနော ရာဇ၊ ဓာတုယော တတ္ထ လစ္ဆသိ၊

ဣစ္ဆာဟ သာမဏေရော သော၊ သုမနော တံ သုမာနသံ.

၉. ထေရော’ထ ရာဇကုလတော၊ ဂန္တွာ စေတိယပဗ္ဗတံ၊

အာမန္တိယ သာမဏေရံ၊ သုမနံ သုမနော ဂတိံ.

၁၀. ဧဟိ တွံ ဘဒြ သုမန၊ ဂန္တွာ ပုပ္ဖပုရံ ဝရံ၊

အယျကံ တေ မဟာရာဇံ၊ ဧဝံ နော ဝစနံ ဝဒ.

၁၁. သဟာယော တေ မဟာရာဇ၊ မဟာရာဇာ မရုပ္ပိယော၊

ပသန္နော ဗုဒ္ဓသမယေ၊ ထူပံ ကာရေတုမိစ္ဆတိ.

၁၂. မုနိနော ဓာတုယော ဒေဟိ၊ ပတ္တံ ဘုတ္တဉ္စ သတ္ထုနာ၊

သရီရဓာတုယော သန္တိ၊ ဗဟဝေါ ဟိ တဝန္တိကေ.

၁၃. ပတ္တပူရာ ဂဟေတွာ တာ၊ ဂန္တွာ ဒေဝပုရံ ဝရံ၊

သက္ကံ ဒေဝါနမိန္ဒံ တံ၊ ဧဝံ နော ဝစနံ ဝဒ.

၁၄. တိလောကဒက္ခိဏေယျဿ၊ ဒါဌာဓာတု စ ဒက္ခိဏာ၊

တဝန္တိကမှိ ဒေဝိန္ဒ၊ ဒက္ခိဏက္ခကဓာတု စ.

၁၅. ဒါဌံ တွမေဝ ပူဇေဟိ၊ အက္ခကံ ဒေဟိ သတ္ထုနော၊

လံကာဒီပဿ ကိစ္စေသု၊ မာပမဇ္ဇ သုရာဓိပ.

၁၆. ‘‘ဧဝံ ဘန္တေ’’တိ ဝတွာ သော၊ သာမဏေရော မဟိဒ္ဓိကော၊

တင်္ခဏံယေဝ အဂမာ၊ ဓမ္မာသောကဿ သန္တိကံ.

၁၇. သာလမူလမှိ ဌပိတံ၊ မဟာဗောဓိံ တဟိံ သုတံ၊

ကတ္တိကစ္ဆဏပူဇာဟိ၊ ပူဇိယံ တဉ္စ အဒ္ဒသ.

၁၈. ထေရဿ ဝစနံ ဝတွာ၊ ရာဇတော လဒ္ဓဓာတုယော၊

ပတ္တပူရံ ဂဟေတွာန၊ ဟိမဝန္တမုပါဂမိ.

၁၉. ဟိမဝန္တေ ဌပေတွာန၊ သဓာတုံ ပတ္တမုတ္တမံ၊

ဒေဝိန္ဒသန္တိကံ ဂန္တွာ၊ ထေရဿ ဝစနံ ဘဏိ.

၂၀. စူဠာမဏိ စေတိယမှာ၊ ဂဟေတွာ ဒက္ခိဏက္ခကံ၊

သာမဏေရဿ ပါဒါသိ၊ သက္ကော ဒေဝါနမိဿရော.

၂၁. တံ ဓာတုံ ဓာတုပတ္တဉ္စ၊ အာဒါယ သုမနော တတော၊

အာဂမ္မ စေတိယဂိရိံ၊ ထေရဿ’ဒါသိ တံ ယတိ.

၂၂. မဟာနာဂဝနုယျာနံ၊ ဝုတ္တေနာ ဝိဓိနာ’ဂမာ၊

သာယနှာသမယေ ရာဇာ၊ ရာဇသေနာ ပုရက္ခတော.

၂၃. ဌပေသိ ဓာတုယော သဗ္ဗာ၊ ထေရော တတ္ထေဝ ပဗ္ဗတေ၊

မိဿကံ ပဗ္ဗတံ တသ္မာ၊ အာဟု စေတိယ ပဗ္ဗတံ.

၂၄. ဌပေတွာ ဓာတုပတ္တံ တံ၊ ထေရော စေတိယပဗ္ဗတေ၊

ဂဟေတွာ အက္ခကံ ဓာတုံ၊ သင်္ကေတံ သဂဏော’ဂမာ.

၂၅. သစာယံ မုနိနော ဓာတု၊ ဆတ္တံ နမတု မေ သယံ၊

ဇဏ္ဏုကေဟိ ကရီဓာတု၊ ဓာတုစင်္ကောဋကော အယံ.

၂၆. သိရသ္မိံ မေ ပတိဋ္ဌာတု၊ အာဂမ္မ သဟ ဓာတုကော၊

ဣတိ ရာဇာ ဝိစိန္တေသိ၊ စိန္တိတံ တံ တထာ အဟု.

၂၇. အမတေနာ’ဘိသိတ္တောဝ၊ အဟု ဟဋ္ဌော’တိ ဘူပတိ၊

သီသတော တံ ဂဟေတွာန၊ ဟတ္ထိက္ခန္ဓေ ဌပေသိတံ.

၂၈. ဟဋ္ဌော ဟတ္တီ ကုဉ္စနာဒံ၊ အကာ ကမ္ပိတ္ထ မေဒိနီ၊

တတော နာဂေါ နိဝတ္တိတွာ၊ သထေရ ဗလဝါဟနော.

၂၉. ပုရတ္ထိမေန ဒွါရေန၊ ပဝိသိတွာ ပုရံ သုဘံ၊

ဒက္ခိဏေန စ ဒွါရေန၊ နိက္ခမိတွာ တတော ပုန.

၃၀. ထူပါရာမေ စေတိယဿ၊ ဌာနတော ပစ္ဆတော ကတံ၊

ပမောဇဝတ္ထုံ ဂန္တွာန၊ ဗောဓိဌာနေ နိဝတ္တိယ.

၃၁. ပုရတ္ထာဝဒနော အဌာ၊ ထူပဌာနံ တဒါ ဟိတံ၊

ကဒမ္ဗပုပ္ဖအာဒါရိ-ဝလ္လီဟိ စိတကံ အဟု.

၃၂. မနုဿဒေဝေါ ဒေဝေဟိ၊ တံ ဌာနံ ရက္ခိတံ သုစိံ၊

သောဓာပေတွာ ဘူသယိတွာ၊ တင်္ခဏံယေဝ သာဓုကံ.

၃၃. ဓာတုံ ဩရောပနတ္ထာယ၊ အာရဘီ ဟတ္ထိက္ခန္ဓတော၊

နာဂေါ န ဣစ္ဆိတံ ရာဇာ၊ ထေရံ ပုစ္ဆိတ္ထ တံ မနံ.

၃၄. အတ္တနော ခန္ဓသမကေ၊ ဌာနေ ဌပနမိစ္ဆတိ၊

ဓာတုဩရောပနံ တေန၊ န ဣဋ္ဌမီ’တိ သော ဗြဝိ.

၃၅. အာဏာပေတွာ ခဏံယေဝ၊

သုက္ခာတော’ဘယဝါပိတော၊

သုက္ခကဒ္ဒမ ခဏ္ဍေဟိ၊

စိတာ ပေတွာန တံ သမံ.

၃၆. အလင်္ကရိတွာန ဗဟုဓာ၊ ရာဇာ တံ ဌာနမုတ္တမံ၊

ဩရောပေတွာ ဟတ္ထိက္ခန္ဓာ၊ ဓာတုံ တတ္ထ ဌပေသိတံ.

၃၇. ဓာတာရက္ခံ သံဝိဓာယ၊ ဌပေတွာ တတ္ထ ဟတ္ထိနံ၊

ဓာတုထူပဿ ကရဏေ၊ ရာဇာ တုရိတမာနသော.

၃၈. ဗဟူ မနုဿေ ယောဇေတွာ၊ ဣတ္ထိကာကရဏေ လဟုံ၊

ဓာတုကိစ္စံ ဝိစိန္တေန္တော၊ သာမစ္စော ပါဝိသီ ပုရံ.

၃၉. မဟာမဟိန္ဒတ္ထေရော တု၊ မဟာ မေဃဝနံ သုဘံ၊

သဂဏော အဘိဂန္တွာန၊ တတ္ထ ဝါသမကပ္ပယိ.

၄၀. ရတ္တိံ နာဂေါ’နုပရိယာတိ၊ တံ ဌာနံ သော သဓာတု ကံ၊

ဗောဓိဌာနမှိ သာလာယ၊ ဒိဝါဌာတိ သဓာတုကော.

၄၁. ဝတ္ထုဿ တဿော’ပရိတော၊ ထူပံ ထေရမတာနု ဂေါ၊

ဇင်္ဃာမတ္တံ စိတာပေတွာ၊ ကတိပါဟေန ဘူပတိ.

၄၂. တတ္ထ ဓာတုပတိဋ္ဌာနံ၊ ဃောသာပေတွာ ဥပါဂမိ၊

တတော တတော သမန္တော စ၊ သမာဂမိ မဟာဇနော.

၄၃. တသ္မိံ သမာဂမေ ဓာတု၊ ဟတ္ထိက္ခန္ဓာ နဂါဂ္ဂတာ၊

သတ္တတာလပ္ပမာဏမှိ၊ ဒိဿန္တိ နဘသိဋ္ဌိတာ.

၄၄. ဝိမှာပယန္တိ ဇနတံ၊ ယမကံ ပါဋိဟာရိယံ၊

ကဏ္ဏမ္ဗမူလေ ဗုဒ္ဓေါ’ဝ၊ အကရိ လောမဟံသနံ.

၄၅. တတော နိက္ခန္တဇာလာဟိ၊ ဇလဓာရာဟိ စာ’သကိံ၊

အယံ ဩဘာသိတာ’သိတ္တာ၊ သဗ္ဗာလံကာမဟီ မဟု.

၄၆. ပရိနိဗ္ဗာနမဉ္စမှိ၊ နိပန္နေန ဇိနေန ဟိ၊

ကတံ မဟာအဓိဋ္ဌာန-ပဉ္စကံ ပဉ္စစက္ခုနာ.

၄၇. ဂယှမာနာ မဟာဗောဓိ သာခါသောကေန ဒက္ခိဏာ၊

ဆိဇ္ဇိတွာန သယံယေဝ၊ ပတိဋ္ဌာတု ကဋာဟကေ.

၄၈. ပတိဋ္ဌဟိတွာ သာ သာခါ၊ ဆဗ္ဗဏ္ဏရသ္မိယော သုဘာ၊

ရဉ္ဇယန္တီ ဒိသာ သဗ္ဗာ၊ ဖလပတ္တေဟိ မုစ္စတု.

၄၉. သသုဝဏ္ဏကဋာဟာ သာ၊ ဥဂ္ဂန္တွာန မနောရမာ၊

အဒိဿမာနာ သတ္တာဟံ၊ ဟိမဂဗ္ဘမှိ တိဋ္ဌတု.

၅၀. ထူပါရာမေ ပတိဋ္ဌန္တံ၊ မမ ဒက္ခိဏအက္ခကံ၊

ကရောတု နဘမုဂ္ဂန္တွာ၊ ယမယံ ပါဋိဟာရိယံ.

၅၁. လင်္ကာ လင်္ကာရဘူတမှိ၊ ဟေမမာလိကစေတိယေ၊

ပတိဋ္ဌဟန္တိယော ဓာတု၊ ဒေါဏမတ္တာ ပမာဏတော.

၅၂. ဗုဒ္ဓဝေသဓရာ ဟုတွာ၊ ဥဂ္ဂန္တွာ နဘသိဋ္ဌိတာ၊

ပတိဋ္ဌံ တု ကရိတွာန၊ ယမကံ ပါဋိဟာရိယံ.

၅၃. အဓိဋ္ဌာနာနိ ပဉ္စေ’ဝ၊ အဓိဋ္ဌာသိ တထာဂတော၊

အကာသိ တသ္မာ သာ ဓာတု၊ တဒါ တံ ပါဋိဟာရိယံ.

၅၄. အာကာသာ ဩတရိတွာ သာ၊ အဋ္ဌာဘူပဿ မုဒ္ဓနိ၊

အတီဝဟဋ္ဌော တံ ရာဇာ၊ ပတိဋ္ဌာပေသိ စေတိယေ.

၅၅. ပတိဋ္ဌိတာယ တဿာ စ၊ ဓာတုယာ စေတိယေ တဒါ၊

အဟု မဟာဘူမိစာလော၊ အဗ္ဘုတော လောမဟံသနော.

၅၆. ဧဝံ အစိန္တိယာ ဗုဒ္ဓါ၊ ဗုဒ္ဓဓမ္မာ အစိန္တိယာ၊

အစိန္တိယေ ပသန္နာနံ၊ ဝိပါကော ဟောတိ အစိန္တိယော.

၅၇. တံ ပါဋိဟာရိယံ ဒိသွာ၊ ပသီဒိံသု ဇနေ ဇနာ၊

မတ္တာဘယော ရာဇပုတ္တော၊ ကနိဋ္ဌော ရာဇိနော ပန.

၅၈. မုနိဿရေ ပသီဒိတွာ၊ ယာစိတွာန နရိဿရံ၊

ပုရိသာနံ သဟဿေန၊ သဟ ပဗ္ဗဇိသာသနေ.

၅၉. စေတာရိဂါမတော စာပိ၊ ဒွါရမဏ္ဍလတောပိ စ၊

ဝိဟီရဗီဇတော စာပိ၊ တထာ ဂလ္လကပိဋ္ဌိတော.

၆၀. တထော’ပတိဿဂါမာ စ၊ ပဉ္စ ပဉ္စ သတာနိ စ၊

ပဗ္ဗဇုံ ဒါရကာ ဟဋ္ဌာ၊ ဇာတသဒ္ဓါ တထာဂတေ.

၆၁. ဧဝံ ပုရာ ဗာဟိရာ စ၊ သဗ္ဗေ ပဗ္ဗဇိတာ တဒါ၊

တိံသ ဘိက္ခုသဟဿာနိ၊ အဟေသုံ ဇိနသာသနေ.

၆၂. ထူပါရာမေ ထူပဝရံ၊ နိဋ္ဌာပေတွာ မဟီပတိ၊

ရတနာဒီဟိ’နေကေဟိ၊ သဒါ ပူဇမကာရယိ.

၆၃. ရာဇောရောဓာ ခတ္တိယာ စ၊ အမစ္စာ နာဂရာ တထာ၊

သဗ္ဗေ ဇနပဒါ စေဝ၊ ပုဇာ’ကံသု ဝိသုံ ဝိသုံ.

၆၄. ထူပပုဗ္ဗင်္ဂမံ ရာဇာ၊ ဝိဟာရံ တတ္ထ ကာရယိ၊

ထူပါရာမောတိ တေနေ’သ၊ ဝိဟာရော ဝိဿုတော အဟု.

၆၅. သကဓာတုသရီရကေန စေ’ဝံ၊

ပရိနိဗ္ဗာနဂတောပိ လောကနာထော၊

ဇနကာယဟိတံ သုခဉ္စ သမ္မာ၊

ဗဟုဓာ’ကာသိ ဌိတေ ဇိနေ ကထာဝကာတိ.

သုဇနပ္ပသာဒသံဝေဂတ္ထာယ ကတေ မဟာဝံသေ

ဓာတုအဂမနော နာမ

သတ္တရသမော ပရိစ္ဆေဒေါ.