တေရသမ ပရိစ္ဆေဒ

မဟိန္ဒာဂမနော

၁. မဟာမဟိန္ဒတ္ထေရော သော၊ တဒါ ဒွါဒသဝဿိကော၊

ဥပဇ္ဈာယေန အာဏတ္တော၊ သံဃေန စ မဟာမတီ.

၂. လံကာဒီပံ ပသာဒေတုံ၊

ကာလံ ပေက္ခံ ဝိစိန္တယီ၊

‘‘ဝုဍ္ဎော မုဋသိဝေါ ရာဇာ၊

ရာဇာ ဟောတု သုတော’’ ဣတိ.

၃. တဒန္တရေ ဉာတိဂဏံ၊ ဒဋ္ဌုံ ကတွာန မာနသံ၊

ဥပဇ္ဈာယဉ္စ သံဃဉ္စ၊ ဝန္ဒိတွာ ပုစ္ဆ ဘူပတိံ.

၄. အာဒါယ စတုရော ထေရေ၊ သံဃမိတ္တာယ အတြဇံ၊

သုမနံ သာမဏေရဉ္စ၊ ဆဠာဘိညံ မဟိဒ္ဓိကံ.

၅. ဉာတီနံ သင်္ဂဟံ ကာတုံ၊ အဂမာ ဒက္ခိဏာဂိရိံ၊

တတော တတ္ထ စရန္တဿ၊ ဆမ္မာသာ သမတိက္ကမုံ.

၆. ကမေန ဝေဒိသဂိရိံ၊ နဂရံ မာတုဒေဝိယာ၊

သမ္ပတွာ မတရံ ပဿိ၊ ဒေဝီ ဒိသွာ ပိယံ သုတံ.

၇. ဘောဇယိတွာ သပရိသံ၊ အတ္တနာယေဝ ကာရိတံ၊

ဝိဟာရံ စေတိယဂိရိံ၊ ထေရံ အာရောပယီ သုဘံ.

၈. အဝန္တိရဋ္ဌံ ဘုဉ္ဇန္တော၊ ပိတရာ ဒိန္နမတ္တနော၊

သော အသောက ကုမာရော ဟိ၊ ဥဇ္ဇေနီဂမနာ ပုရာ.

၉. ဝေဒိသေ နဂရေ ဝါသံ၊ ဥပဂန္တွာ တဟိံ သုဘံ၊

ဒေဝိန္နာမ လဘိတွာန၊ ကုမာရိံ သေဋ္ဌိဓီတရံ.

၁၀. သံဝါသံ တာယ ကပ္ပေသိ၊ ဂဗ္ဘံ ဂဏှိယ တေန သာ၊

ဥဇ္ဇေနိယံ ကုမာရံ တံ၊ မဟိန္ဒံ ဇနယီ သုဘံ.

၁၁. ဝဿဒွယမတိက္ကမ္မ၊ သံဃမိတ္တဉ္စ ဓီတရံ၊

တသ္မိံ ကာလေ ဝသတိ သာ၊ ဝေဒိသေ နဂရေ တဟိံ.

၁၂. ထေရော တတ္ထ နိသီဒိတွာ၊ ကာလညူ ဣတိ စိန္တယိ၊

ပိတရာ မေ သမာဏတ္တံ၊ အဘိသေက မဟုဿဝံ.

၁၃. ဒေဝါနံပိယတိဿော သော၊ မဟာရာဇာ’နုဘောတု စ၊

ဝတ္ထုတ္တယဂုဏေ စာပိ၊ သုတွာ ဇာနာတု ဒူဟတော.

၁၄. အာရောဟတု မိဿနဂံ၊ ဇေဋ္ဌမာသဿု’ပေါသထေ၊

တဒဟေဝ ဂမိဿာမ၊ လံကာဒီပဝရံ မယံ.

၁၅. မဟိန္ဒော ဥပသင်္ကမ္မ၊ မဟိန္ဒတ္ထေရ မုတ္တမံ၊

ယာဟိ လံကံ ပသာဒေတုံ၊ သမ္ဗုဒ္ဓေနာ’သိ ဗျာကတော.

၁၆. မယမ္ပိ တတ္ထုပတ္ထမ္ဘာ၊ ဘဝိဿာမာ’တိ အဗြဝိ၊

ဒေဝိယာ ဘဂိနီ ဓီတု-ပုတ္တော ဘဏ္ဍုက နာမကော.

၁၇. ထေရေန ဒေဝိယာ ဓမ္မံ၊ သုတွာ ဒေသိတမေဝ တု၊

အနာဂါမိဖလံ ပတွာ၊ ဝသိ ထေရဿ သန္တိကေ.

၁၈. တတ္ထ မာသံ ဝသိတွာန၊ ဇေဋ္ဌမာသဿု’ ပေါသထေ၊

ထေရော စတူဟိ ထေရေဟိ၊ သုမနေနာ’ထ ဘဏ္ဍုနာ.

၁၉. သဒ္ဓိံ တေန ဂဟဋ္ဌေန၊ န ရတော ဉာတိဟေတုနာ၊

တသ္မာ ဝိဟာရာ အာကာသံ၊ ဥဂ္ဂန္တွာ သော မဟိဒ္ဓိကော.

၂၀. ခဏေနေဝ ဣဓာဂမ္မ၊ ရမ္မေ မိဿက ပဗ္ဗတေ၊

အဋ္ဌာသိ ဝိလုကူဋမှိ၊ ရုစိရမ္ဗတ္ထလေ ဝရေ.

၂၁. လံကာပသာဒ ဂုဏေန ဝိယာကတော သော၊

လံကာဟိတာယ မုနိနာ သယိတေန အန္တေ၊

လံကာယ သတ္ထုသဒိသော ဟိတဟေတု တဿာ၊

လံကာမရူဟိ မဟိတော’ဘိနိသီဒိ တတ္တာတိ.

သုဇနပ္ပသာဒသံဝေဂတ္ထာယ ကတေ မဟာဝံသေ

မဟိန္ဒာဂမနော နာမ

တေရသမော ပရိစ္ဆေဒေါ.