ဟတ္ထဝနဂလ္လဝိဟာရ |ဩ၀.၀၀၀၁| ဝံသော
နမော တဿ ဘဂဝတော အရဟတော သမ္မာသမ္ဗုဒ္ဓဿ
၁. သ္နေဟုတ္တရာယ ဟဒယာ မလမလ္လိကာယ၊
ပဇ္ဇာလိတော မတိဒသာယ ဇိနပ္ပဒီပေါ၊
မောဟဏ္ဓကာရမခိလံ မမ နီဟရန္တော၊
နိစ္စံ ဝိဘာဝယတု စာရု ပဒတ္ထရာသိံ.
၂. လင်္ကာဘိသိတ္တဝသုဓာဓိပတီသု ရာဇာ၊
ယော ဗောဓိသတ္တဂုဏဝါ သိရိသံဃဗောဓိ၊
တဿာတိစာရု စရိယာ ရစနာမုခေန၊
ဝက္ကာမိ ဟတ္ထဝနဂလ္လဝိဟာရ ဝံသံ.
၃. ဗြဟ္မနွယေနနုဂတတ္ထမနောမဒဿီ၊
ချာတေန သဗ္ဗယတိရာဇဓုရန္ဓရေန၊
ဝျာပါရိတောဟမိတိဘာနုဂတံ ကထဉ္စ၊
နိဿာယ ပုဗ္ဗလိခိတံဝိဓ ဝါယမာမိ.
၄. အရ္ဏ္ထ သုဂတာဂမသုဓာပဂါနိဒ္ဓေါတကုဒိဋ္ဌိဝိသကလင်္ကာယ လံကာယ ဘဂဝတော အင်္ဂီရသဿမဟာနာဂဝနုယျာနေ သမိတိသမာဂတယက္ခ ရက္ခသလောကဝိဇယာပဒါနဿ သိဒ္ဓက္ခေန္တဘူတော သီဟဠမဟီမဏ္ဍလမဏ္ဍနာယ မာနော ဝိဝိဓရတနာကရောပလက္ခမာနမဟဂ္ဃမဏိ ဘေဒေါ မဏိ ဘေဒေါ နာမ ဇနပဒေါ.
၅. လဒ္ဓါန သတ္ထု ဝရဏင်္ကမနညလဗ္ဘ၊
မာနဏ္ဒိနာ သုမနကူဋသိလုစ္စယေန၊
ဥဿာပိတာ ဝိဇယကေတုမတလ္လိကေဝ၊
သုဒ္ဓေါရုဝါလုကနဒီ ယမလင်္ကရောတိ.
၆. လင်္ကာယ ယက္ခဂဏနီဟရဏေ ဇိနဿ၊
စမ္မာသနုဂ္ဂနဟုနာသနဖဿဒါဟာ၊
သံသာရရက္ခသဝပုဗ္ဘဝဗုဗ္ဗုလံစ၊
ယသ္မိံ ဝိဟာတိ မဟိယင်္ဂဏ ထူပရာဇာ.
၇. |ဩ၀.၀၀၀၂|
သဒါမဟောဃာယ မဟာပဂါယ၊
ပါနီယပါနာယ သမောသဋာနံ၊
သမုစ္စယော သာရဒဝါရိဒါနံ၊
နူနံ ဂတော ထာဝရထူပရူပံ.
၈. တဿာပဂါယ ဝိမလမ္ဗုနိ ဒိဿမာန၊
မာလောလဝိစိတရလံ ပဋိဗိမ္ဗရူပံ၊
ဘောဂေဟိ ဝေဌိယ နိဇံ ဘဝနံ ဖဏီဟိ၊
ပူဇတ္ထိကေဟိ ဝိယ ရာဇတိ နီယမာနံ.
၉. တဿ မဟိယင်္ဂဏ မဟာ ဝိဟာရဿ ပရိယန္တဂါမကေ သေလာဘယော နာမ ခတ္တိယော ပဋိဝသန္တော ပုတ္တံ ပဋိလဘိတွာ အင်္ဂလက္ခဏပါဌကာနံ ဒဿေသိ တေ တဿ ကုမာရဿ အင်္ဂလက္ခဏာနိ ဩလောကေတွာ ‘‘အယံ ကုမာရော ခမကသတ္တော နဟောတိ. ဓညပုညလက္ခဏသမ္ပန္နော၊ သကလမ္ပိ သီဟဠဒီပံ ဧကစ္ဆတ္တံ ကရိတွာ မဟန္တမဟန္တာနိ အစ္ဆရိယဗ္ဘုတာနိ မဟာဝီရစရိတာနိ ဒဿေဿတီ’’တိ ဝျာကရိံသု.
၁၀. တတော သေလာဘယ ခတ္တိယော ပုတ္တဿ အဘိသေကာဒိသမ္ပတ္တိံ သုတွာ ကောဋိပ္ပတ္တပမောဒပရဝသောပိ တသ္မိံ ကာလေ အနုရာဓပုရေ ရဇ္ဇံ ကာရယတာ ‘‘ဝေါဟာရတိဿမဟာရာဇတော ကဒါစိ ကေစိ ဥပဒ္ဒဝေါ ဇာယိဿတီတိ. ဇာတပရိသင်္ကောတံ ကုမာရမာဒါယ မဟိယင်္ဂဏမဟာဝိဟာရေ ဗောဓိ အင်္ဂဏေ ပရိတ္တဂ္ဂေ သန္နိပတိတဿ နဏ္ဒမဟာထေရပမုခဿ မဟာဘိက္ခုသံဃဿ မဇ္ဈေ နိပဇ္ဇာပေတွာ ‘‘ဧသော မေ ဘန္တေ ကုမာရော မဟာသံဃဿ စ မဟာ ဗောဓိပါဒဿ စ သရဏံ ဂစ္ဆတိ တံ သဗ္ဗေပိ ဘဒန္တာ ရက္ခန္တု သံဃဗောဓိ နာမကော စာယံ ဟောတု’’တိ မဟာသံဃဿ စ ဗောဓိ ဒေဝတာယ စ နိယျာဒေတွာ ပဋိဇဂ္ဂန္တော ကုမာရဿ သတ္တဝဿိက ကာလေ ကာလမကာသိ.
၁၁. အထ မာတုလော နဏ္ဒမဟာထေရော ကုမာရကံ ဝိဟာရမာနေတွာ ပဋိဇဂ္ဂန္တော တေပိဋကံ ဗုဒ္ဓဝစနံ ဥဂ္ဂဏှာပေတွာ ဗာဟိရသတ္ထေသု စ ပရမကောစိဒံ ကာရေသိ. သံဃဗောဓိကုမာရောပိ ကတာဓိကာရတ္တာ တိက္ခပညတ္တာ စ ဉာဏဝိညာဏသမ္ပန္နော ဟုတွာ ဝယပ္ပတ္တော လောကဿ လောစနေဟိနိပိယမာနာယ ရူပသမ္ပတ္တိယာ သဝဉ္ဇလိပုဋေဟိ အဿာဒိယမာနသဒါစာရဂုဏ သမ္ပတ္တိယာ စ ပတ္ထ ဋ ယသောဃောသော အဟောသိ.
၁၂. ကိမိဟ ဗဟုနာ?- ကာဒမ္ဗိနီ ကဒမ္ဗတော သိနိဒ္ဓနီလာယတဂုဏံဓမ္မိလ္လကလာပေ၊ ပရိပုဏ္ဏဟရိဏင်္ကမဏ္ဍလတော ဟိလာဒကရပသာဒသောမ္မဂုဏံ မုခမဏ္ဍလေ စာမီကရပိံဇရကမ္ဗုဝရတော မေဒုရောဒါရဗဏ္ဓုရဘာဝံ ဂီဝါဝယဝေ၊ ကလျာဏသိလုစ္စယတော သံဟတ ဝိလာသံ ဥရတ္ထလေ၊ သုရသာဓိသာခတော |ဩ၀.၀၀၀၃| ပီဝရာယတလလိတရူပံ ကာမဒါနပဒါနဒွ ဗာဟုယုဂဠေ၊ သမဒဂန္ဓသိန္ဓုရတော ဂမနလီဠှံ ကရာကာရဒွ ဟတ္ထိယုဂဠေ၊ စာရုတရထရုစိရောစမာနစာမီကရမုကုရတော တဒါကာရံ သဇာဏုမဏ္ဍလေ ဇင်္ဃယုဂဠေ၊ နိစ္စာ သီနကမလာ ကမလတော ရတ္တကောမဠဒလသိရံ စရဏယုဂဠေ အာဒါယ ယောဇယတာ ပါရမိတာဓမ္မသိပ္ပိတာ နိမ္မိတဿ ပရမဒဿနီယဂရူပဝိလာသဿ တဿ အတ္တဘာဝဿ သံဝဏ္ဏနာဂန္ထဂါရဝမာဝဟတိ.
၁၃. ဒေဟေ သုလက္ခဏယုတေ နဝယောဗ္ဗနဍ္ဎေ၊
တဿုဇ္ဇလေ စ ပသမာဟရဏောဒယေန၊
ကာ ဝဏ္ဏနာ ကမလရူပိနိ ဇာတရူပေ၊
လောကုတ္တရံ ပရိမလံ ပရိတော ဝဟန္တေ.
၁၄. ဒေါသာရယော ဟဒယဒုဂ္ဂပုရေ ဝိဇိတွာ၊
တတ္ထာဘိသိစ္စ သုဟဒံ ဝိယ ဓမ္မဘူပံ၊
အတ္ထာနုသာသနိမိမဿ ဝဒံ ဂိရာယ၊
တတ္ထပ္ပဝတ္တယိ သုဓီ နိဇကာယကမ္မံ.
ဣတိ ရာဇကုမာရုပ္ပတ္တိ ပရိစ္ဆေဒေါ ပဌမော.
၁၅. အထေကဒါ မာတုလမဟာထေရာ ဝယပ္ပတ္တံ သိရိသံဃဗောဓိ ကုမာရံ ဓမ္မသဝနာဝသာနေ အာမန္တေတွာ ဧဝမာဟ၊ ‘‘ကုမာရ! မဟာဘာဂဓေယျ! ဣဒါနိ တွမသိ အဓီတသုဂတာဂမော၊ ဝိဒိတသကလ ဗာဟိရသတ္ထော. စတုဗ္ဗိဓပဏ္ဍိစ္စကောဋိပ္ပတ္တော၊ တထာပိ အဘိမာနဓနေ ခတ္တိယကုလေ ဇာတိ၊ သဗ္ဗပတ္ထဝျာပိတာ ယောဗ္ဗနဝိလာသေန သမလင်္ကတံ သရီရံ၊ အပ္ပဋိမာ ရူပသိရိ၊ အမာနုသံ ဗလဉ္စေတိ မဟတီယ ဗလဝနဏ္ထ ပရမ္ပရာ’သဗ္ဗာအဝိနယာန မေကေကမ္ပိ တေသမာယတနံ ကိမုတ သမဝါယော?‘‘ယေဘုယျေန သတ္ထသလိလ ဝိက္ခာလနာတိ နိမ္မလာပိ ကာလုသိယမုပယာနိ ဗုဒ္ဓီ၊ အနုဇ္ဈိတဓဝလတာပိ သရာဂါဧဝ ဘဝတိ နဝယောဗ္ဗနဂဗ္ဗိတာနံ ဒိဋ္ဌိ၊ အပဟရတိ စ ဝါတမဏ္ဍလိ ကေဝ သုက္ခပဏ္ဏံ ဥဗဘုတရဇော ဘန္တိ အတိဒူရမတ္တနော ဣစ္ဆာယ ယောဗ္ဗနသမယေ ပုရိသံ ပကတိ. ဣဏ္ဒြိယဘရိဏဘာရိနီ သတ္တမတိဒုရန္တာယ မုပဘောဂမိဂတဏဟိကာ တသ္မာ အယမေဝါနဿာဒိတ ဝိသယ ရသဿ တေ ကာလော ဂုရုပဒေသဿ. မဒနသရပ္ပဘာရဇဇ္ဇရိတေ ဟဒယေ ဇလမိဝ ဂလတိ ဂုရူနမနုဿာနံ အကာရဏံဆဝတိ ဒုပ္ပကတိ နော ကုလံဝါ သုတံ ဝါ မနယဿ ဝဏ္ဒနပ္ပဘဝေါနဒဟတိ ကိံ ဒဟနော? ကိံဝါပသမဟေတုနာပိ နာတိဝဏ္ဍတရော ဘဝတိ ဝဍဗာနဠော သလိလေန၊ တသ္မာ ဂါဠှတရ မနုသာသီတဗ္ဗောသိ.
၁၆. အပဂတမလေ ဟိ မနသိ ဧလိကမဏိမှိ ဝိယ ရဇနိကရမယုခါပဝိသန္တိ၊ သုခမုပဒေသဂုဏာ၊ ဂုရုဝစနမမလမ္ပိ သလိလမိဝ မဟန္တံ ဇာနိမုပဇနယတိ သဝနဟတံ သူလမိဝ အဘဗ္ဗဿ၊ ဘဗ္ဗဿတု |ဩ၀.၀၀၀၄| ကရိနော ဝိယ သဗ္ဗာဘရဏမာနနသောဘာသမုဒယမဓိကတရ မုပဝဟတိ၊ အနာဒိသိဒ္ဓ တဏှာကသာယိတိဏ္ဒြိယာနုစရဉှိ စိတ္တံ နာဝဟတိ ကန္နာမာနတ္ထံ၊ တသ္မာ ရာဇ ကုမာရာနဉ္စ ယတီနဉ္စ သတိဗလေန ဣဏ္ဒြိယဝိဇယော ဒိဋ္ဌဓမ္မိကသမ္ပရာယိကမ္ဗိလံ ကလျာဏဇာတမုပဇနယတိ၊ ဣဏ္ဒြိယဝိဇယော စ သမ္ဘဝတိ ဂုရုဝုဒ္ဓေါပသေဝါယ တဗ္ဗဝနမဝိရာဓေတွာ ပဋိပဇ္ဇတော၊ တသ္မာ တယာ အာပါဏပရိယန္တံ ဝတ္ထုတ္တယသရဏပရာယဏတာ န ပဟာတဗ္ဗာ.
န ရာဂါပသ္မာရဝိဗောဓနံ ဝိသယဒဟနသလိလ သံသေဝနံ ကာတဗ္ဗံ၊ ပဿတူ ဟိ ကလျာဏာဘိနိဝေသိ စက္ခူဏ္ဒြိယလာဠန ပရဝသဿ သလဘဿ သမုဇ္ဇလိတ ဒီပသိခါပတနံ သောတိဏ္ဒြိယ သုခါနုယုတ္တဿ တရုဏ ဟရီဏဿ ဥသု ပါတသမ္မုခီဘဝနံ ဃာဏိဏ္ဒြိယ ပရဝသဿ မဓုကရဿ မဒဝါရဏကဏ္ဏတာလဘန္နံ ရသနိဏ္ဒြိယတပ္ပဏဝျသနိနော ပုထုလောမဿ ဗလိသာဃာသဝျသနံ ဖဿီဏ္ဒြိယာနုဘဝနလာလသဿမတင်္ဂဇဿဝါရိဏိ ဗဏ္ဓနာပါယံ ဣမေဟိ ဣဏ္ဒြိယေဟိ မိလိတေဟိ ဧကဿ ကာမိနော သဒိဒေဝ ပဉ္စန္နံ၊ ဝိသယရသာနမုပသေဝါယ ပတ္တဗ္ဗံ မဟန္တံ ဒုက္ခဇာလံ ကထမုပဝဏ္ဏယာမ? ဣမာနိ စ သုဘာသိတာနိ ပစ္စဝေက္ခတု အနုက္ခဏံ ဝိစက္ခဏော.
၁၇. နာဂါရိကံ သုခမုဒိက္ခတိ ကိဉ္စိ ဓီရော၊
ဇာနာတိ ဒေဟပဋိဇဂ္ဂနမတ္ထတောဝေ၊
သံသေဝတောပိ ယုဝတိံ ရတိမောဟိတဿ၊
ကဏ္ဍုယနေ ဝိယ ဗနဿ သုခါဘိမာနော.
၁၈. ကော သေဝေယျ ပရံ ပေါသော အဝမာနံ သဟေယျဝဝ၊
န ဝေ ကလတ္တနိဂဠံ ယဒိ ဒုက္ခနိဗဏ္ဓနံ.
၁၉. အာကဍ္ဎမာနာ စိသိခါ သ္မိပံ၊
ပရမ္မုခါယေဝ သဒါ ပဝတ္တာ၊
ဒူရမ္ပိ ဂစ္ဆန္တိ ဂုဏံ ဝိဟာယ၊
ပဝတ္တနံ တာဒိသမေဝ ထီန.
၂၀. အသန္ထုတံ တာ ပုရိသမ္ပိ အန္တော၊
ကရောန္တိ အာဒါယကတာဝ ဘိတ္တိ၊
နေတ္တိံ သဝလ္လီ ဝိယ ဟဏ္ထဂါပိ၊
ဒသာသု သဗ္ဗာသု စ သင်္ကနီယာ.
၂၁. အန္တောရုဒ္ဓါ ဗဟိဒ္ဓါပိ နိဿာသာ ဝိယ နာရိယော၊
ကရောန္တိ နာသမေဝဿ ကောဓီမာတာသု ဝိဿသေ.
၂၂. မာနသ ပါပသံနိန္နံ အပါယာ ဝိဝဋာ နနာ၊
သမန္တာ ပါပမိတ္တာဝ မောက္ခော သဗ္ဗဘယာကထံ.
၂၃. |ဩ၀.၀၀၀၅| အပိ စ ဟဒယတရုကောဋရ ကုဋီရော ကောဓ ကုဏ္ဍလီန ကဒါစိ ဗဟိ ကာတဗ္ဗော. အပိ တု’တိတိက္ခာမန္တေန အစိပ္ဖဏ္ဒန္တံ ဥပနေတဗ္ဗော.
၂၄. သတံ တိတိက္ခာကဝစေ ဝိဂုဏ္ဌိတာ၊
သိယုံ ဒုရာလာပခဂါ ခလာနံ၊
သဘာပသံသာကုသုမတ္တ မေတာ၊
နိဗဇ္ဈရေ တာ ဂုဏ မာလိကာယ.
၂၅. လောကာဓိပစ္စံ ဝိပုလေဓနေ စ၊
မနောနုကူလေ တနယေ စ ဒါရေ၊
လဒ္ဓါပိ ယာယေတိ န ဇာတု တိတတိံ၊
ဗာဓေတု သာတံ န ပပဉ္စ တဏှာ.
၂၆. ဝဏ္ဏပ္ပသာဒါ ယဿာ သုခါဝ၊
ဓနာ စ ဟာယန္တုပ ဇီဝိကာစ၊
ယေနာဘိဘူတာရိပုနေဝ သတ္တာ၊
ဒေါသဂ္ဂိ သော တေ ဟဒယံ ဇဟာတု.
၂၇. ခေဒေါ ဝိပတ္တီသု ပဋိကိရယာ န၊
တသ္မာ န ဒီနပ္ပ ကတိံ ဘဇေယျ၊
ပညာနုယာတံ ဝီရိယံ ဝဒန္တိ၊
သဗ္ဗတ္ထ သိဒ္ဓိဂ္ဂဟဏဂ္ဂဟဏ္ထံ.
၂၈. ဝျာပါရာ သဗ္ဗဘူတာနံ သုခတ္ထာယ ဝိဓီယရေ၊
သုခဉ္စ န ဝိနာ ဓမ္မံ တသ္မာ ဓမ္မပရော ဘဝါ’တိ.
၂၉. ဧဝမာဒိကံ သပ္ပုရိသနီတိပထံ အာဒိသန္တေ မဟာထေရေ တေန ကလျာဏဓမ္မေန အသောတဗ္ဗတာနာဒရိယရစိတဘုကူဋိက မုခေန ဝါ ဒိသာစိက္ခိတ္တစက္ခုနာ စ အဟင်္ကာရပရဝသေန ဂဇနိမိလိတမုဗ္ဘာဝယတာ ဝါ အတ္တနော ပညာဓိက္ခေပမိဝစ အစိန္တယတာ စုဠာဝိနိဟိတကောမဠဉ္ဇလိပုဋေန တန္နိန္နေန၊ တပ္ပေါဏေန သိရသာ စ ပီတိ သမုဒိတ သာဓုဝါဒဝိကသိတကပေါလေနမုခေန စ. သကလာဝယဝစိတ္ထဋရောမဉ္စ ကဉ္စုကိတေန ဒေဟေန စ ဘူမိယံ နိပဇ္ဇိတွာ ဒီဃပ္ပမာဏ ပမာဏ မာဝရတ္တာမဂ္ဂဖလလာဘတောဝိယ ဝိသိဋ္ဌတရံ ပမုဒိတမာဝိကတမာသိ.
ဣတိ အနုသာသန ပရိစ္ဆေဒေါ ဒုတိယော.
၃၀. တတော ပဋ္ဌာယ ယထာဝုတ္တပဋိပဒံ အဝိရာဓေတွာ သမာဝရဏေန သန္တုဋ္ဌော တဿ သံဃဗောဓိ သမညံ ဂေါပေတုကာမော မာတုလမဟာထေရော ဓမ္မိကောတိ ဝေါဟာရံ ပဋ္ဌပေသိ.
၃၁. လက္ခဏပါဌကာနံ ဝစနံ သဒ္ဒဟန္တော ဘာဂိနေယျံ ပဗ္ဗဇိတုကာမမ္ပိ |ဩ၀.၀၀၀၆| အပဗ္ဗာဇေတွာ ‘‘ဣဓ ဝါသတော အနုရာဓပုရေ ဝါသောယေဝ ကုမာရဿ ယောဂက္ခေမာဝဟော၊ ပုညာနုရူပေန ဇာယမာနဿ ဝိပါကဿ စ ဌာနံ ဟောတိ၊ မဟာစေတိယဿ ဝတ္တပဋိဝတ္တသမာစရဏေနစ မဟန္တော ပုညက္ခဏ္ဓော သမ္ပဇိဿတိ’’တိ မညမာနော တံ ကုမာရမာဒါယ ဂစ္ဆန္တော အနုရာဓပုရံ ဂန္တုကာမော နိက္ခမိ. သင်္ဃတိဿောဂေါဌာဘယောတိ စ လမ္ဗကဏ္ဏာ ရာဇ ကုမာရာ အပရေပိ ဒုစေ တဿ ပံသုကီဠနတော ပဋ္ဌာယ သဟာယာတေန ကုမာရေန သဒ္ဓိံ နိက္ခမိံသု တေ တယော ကုမာရေ အာဒါယ ဂစ္ဆန္တော မဟာထေရော ပုရေတရမေဝ အနုရာဓပုရံ ပါဝိသိ. မဟာထေရမနုဂစ္ဆန္တေသု တေသု ကုမာရေသု ဇေဋ္ဌော သင်္ဃတိဿော မဇ္ဈိမော သံဃဗောဓိ ကနိဋ္ဌော ဂေါဌာဘယောတိ တေ ထေရံ ပစ္ဆတော အနုဂစ္ဆန္တာ တယောပိ ပဋိပါဋိ ယာ တိဿဝါပိယာ သေတုမတ္ထကေန ဂစ္ဆန္တိ.
၃၂. တတ္ထ သေတုသာလာယ နိသိန္နော ကောစိ အဏ္ဓောဝိစက္ခဏော တေသံ တိဏ္ဏန္တံ ကုမာရာနံ ပဒဝိညာသဒ္ဒံ သုတွာ လက္ခဏာနုသာရေန ဥပပရိက္ခိပိတွာ ‘‘ဧတေ တယောပိ သီဟဠဒီပေ ပထဝိဿရာ ဘဝိဿန္တီ’’တိ တတ္ထ နိသိန္နာနံ ဝျာကာသိ. တံဝစနံ ပစ္ဆာ ဂစ္ဆန္တော ဂေါဌာဘယော သုတွာ ဣတရေသံ ဂစ္ဆန္တာနံ အနိဝေဒယိတွာ ပစ္စာဂမ္မ ‘‘ကတမော စိရံ ရဇ္ဇံ ကာရေဿတိ? စံသဋ္ဌိတိဉ္စ ကရောတိ’’တိ? ပုစ္ဆိတွာ ပစ္ဆိမောတိ ဝုတ္တေ ဟဋ္ဌပဟဋ္ဌော ဥဒဂ္ဂုဒဂ္ဂေါ သီဃတရံ အာဂမ္မ တေဟိ သဒ္ဓိံ ဂစ္ဆန္တော တိခိဏ မန္တိတာယ ဂမ္ဘီရဘာဝတော စ ကဉ္စိ အဇာနာပေတွာ အန္တောပုရံ ပါဝိသိ. တေ တယောပိ ပတိရူပေ နိဝါသေ ဝါသံ ဂဏှိံသု.
၃၃. အထ ကနိဋ္ဌော ‘‘ဧတေ ဒွေပိ အပ္ပါယုကတ္တာ ရဇ္ဇေ ပတိဋ္ဌိတာပိ န စိရံ ဇီဝန္တိ ကိရ အဟမေဝ တေသံ ရဇ္ဇံ ဒုပေဿာမိ’’တိ တဒနုရူပေန ဥပါယေနပဋိဇ္ဇန္တော တေသံ ရဇ္ဇလာဘာယ ဥပါယံ ဒဿေန္တော အဘိဏှံ မတ္တေတိ. ဇေဋ္ဌောပိ တသ္မိံ အတိပိယာသမာနော တေနောပဒိဋ္ဌမေဝ သမာစရန္တောရာဇာနံ ဒိသွာ လဒ္ဓ သမ္မာနော သဗ္ဗေသု ရာဇကိစ္စေသု ပုဗ္ဗင်္ဂမော ဟုတွာ န စိရဿေဝ ရာဇဝလ္လဘော အဟောသိ? တသ္မိံ ကာလေ ရဇ္ဇံ ကာရေန္တော ဝိဇယ ရာဇာ နာမ ခတ္တိယော တသ္မိံ ပသန္နော သဗ္ဗေသု ရာဇကိစ္စေသု တမမေဝ ပဓာနဘူတံ ကတွာ သေနာပတိံ အကာသိ.
၃၄. ဓမ္မိကော ပန ရဇ္ဇေန အနတ္ထိကတာယ ရဇ္ဇလာဘာယ စိတ္တမ္ပိ အနုပ္ပါဒေတွာ ကေဝလံ မဟာထေရဿ အနုသာသနမတ္တေနေဝ ရာဇုပဋ္ဌာနဝေလာယံ အနုစရဏမတ္တမာစရန္တော ရာဇဂေဟံ ပဝိသိတွာ တတော တေဟိ သဒ္ဓိံ နိက္ခမ္မ သာယံ မဟာ ထေရဿ ဝိဟာရေယေဝ ဝသန္တော အတ္တနော ဓမ္မိကာနုဋ္ဌာနံ အဟာပေတွာ မဟာစေတိယော ပဋ္ဌာနဂိလာနုပဋ္ဌာနာဒိကံ |ဩ၀.၀၀၀၇| အနဝဇ္ဇ ဓမ္မံစရန္တော ကာလံ ဝီတိနာမေတိ.
တဒါ သင်္ဃတိဿော သကလရဇ္ဇဉ္စ ပုရဉ္စ အတ္တနောဟတ္ထဂတံ ကတွာ ဧကသ္မိံ ဒိနေ လဒ္ဓေါကာသော ရာဇာနံ အန္တောဘဝနေယေဝ ဂေါဌာဘယေန မာရာပေတွာ သယံ ရဇ္ဇေ ပတိဋ္ဌတိ.
ဣတိ အနုရာဓပုရပ္ပဝေသပရိစ္ဆေဒေါ တတိယော.
၃၅. အထ ဂေါဌာဘယော ဓမ္မိကံ အနိစ္ဆာမာနမ္ပိ သေနာပတိဋ္ဌာနေ ဌပေတွာ အာယတိံ အပေက္ခမာနော သယံ ဘဏ္ဍာဂါရိကော အဟောသိ. အထ သင်္ဃတိဿော ရာဇာ ဗဟုံ ပုည္စ အပုည္စ ပသဝန္တော ဇမ္ဗုဖလပါကကာလေ သသေနော သာမစ္စော သဘောရောဓော အဘိဏှံ ပါစီန ဒေသံ ဂန္တွာ ဇမ္ဗုဖလာနိ ခါဒတိ. ရညော ယေဘုယျေန ဂမနာ ဂမနေန ဥပဒ္ဒုတာ ရဋ္ဌဝါသိနော ရာဇုပဘောဂါရဟေသု ဇမ္ဗုဖလေသု ဝိသံ ယောဇေသုံ. အထ သော သင်္ဃတိဿော ရာဇာ တေန ဝိသေန တတ္ထေဝ ကာလမကာသိ.
၃၆. အထ ဂေါဌာဘယော အဏ္ဓဝိစက္ခဏဿ ဝစနံ အနုဿရန္တော အနုက္ကမေန ရဇ္ဇံ ဒါပေတွာ ပစ္ဆာ အဟံ သုပ္ပတိဋ္ဌော ဘဝိဿာမိ’တိ မညမာနော သာမစ္စော သသေနော သံဃဗောဓိကုမာရံ ရဇ္ဇေန နိမန္တေသိ. သော တေမိယ မဟာဗောဓိသတ္တေန ဒိဋ္ဌာဒီနဝတ္တာ ရဇ္ဇသုခါပရိစ္စာဂါနုဘူတံ မဟန္တံ ဒုက္ခဇာလံ အနုဿရိတွာ ပုနပ္ပုနံ ယာစိယမာနောပိ ပဋိက္ခိပိယေဝ အဘယော ဂါမနိဂမရာဇဓာနီသု သဗ္ဗေပိ မနုဿေ သန္နိပါတေတွာ တေဟိ သဒ္ဓိံ နာနာပ္ပကာရံ ယာစမာနောပိ သမ္ပဋိစ္ဆာပေတုံ နာသက္ခိ. အထ သဗ္ဗေပိ ရဋ္ဌဝါသိနော သာမစ္စာမဟာဝိဟာရံ ဂန္တွာ မဟာ သံဃံ သန္နိပါတေတွာ သံဃ မဇ္ဈေ သံဃဗောဓိကုမာရော မဟာ သံဃံ ဘူမိယံ နိပဇ္ဇ နမဿိတွာ လဒ္ဓေါကာသော ဧကမန္တံ နိသီဒိတွာ ဧဝံ ဝတ္တုမာရဘီ.
၃၇. အယဉှိ ရာဇလက္ခီနာမ ယထာ ယထာ ဒိပ္ပတေ၊ တထာ တထာ ကပ္ပုရဒီပသိခေဝ ကဇ္ဇိလံမလိနမေဝ ကမ္မဇာတံ ကေဝလမုဗ္ဗမတိ. တထာဟိ အယံ သံဝဓနဝါရိဓာရာ တဏှာဝိသဝလ္လီနံ၊ နေနာဒ မဓုရဘီတိကာ အယံ ဣဏ္ဒြိယမိဂါနံ၊ ပရာမာသဓုမလေခါ သုစရိတ စိတ္တကမ္မဿ ဝိဗ္ဘမသေယျာ မောဟနိဒ္ဒါနံ တိမိရုဂ္ဂတိ ပညာဒိဋ္ဌီနံ၊ ပုရဿရပတာကာ အဝိနယမဟာသေနာယ၊ ဥပ္ပတ္တိနိန္နနာ ကောဓဝေဂ ကုမ္ဘိလာနံ၊ အာပါနဘူမိ မိစ္ဆာဒိဋ္ဌိဝဒနံ. သံဂီတိ သာလာ ဣဿရိယ ဝိကာရနာဋကာနံ အာဝါသဒရီဒေါသာသိဝိသာနံ၊ ဥဿာရဏဝေတ္တလတာ သပ္ပုရိသဝေါဟာရာနံ၊ အကာလဇဒါဂမော သုစရိတ ဟံသာနံ၊ ပတ္ထာဝနာ ကပဋနာဋကာနံ၊ ကဒလိကာ ကာမကရိနော ဝဇ္ဈဝါလာ သာဓုဘာဝဿ၊ ရာဟုမုခံ ဓမ္မစဏ္ဒ |ဩ၀.၀၀၀၈| မဏ္ဍလဿ၊ နဟိ တံ ပဿာမိ ယောဟိ အပရိစိတာယာပိ ဧတာယ နိဗ္ဘရမုပဂုလှော န ဝိပ္ပလဒ္ဓေါ၊ အပိစ၊ အဘိသေကသမယေ ရာဇညာနံ မင်္ဂလကလသဇလေဟိ ဝိယ ဝိက္ခာလနမုပယာတိ ဒက္ခိညံ အဂ္ဂိဟုတတဓုမေနေဝ မလိနီဘဝတိ ဟဒယံ ပုရောဟိတ ကုသဂ္ဂ သမဇ္ဇတေန ဝိယ အပနိယတေ တိတိက္ခာ၊ ဥဏှီသ ပဋ္ဋ ဗဏ္ဓနေန ဝိယ ဆာဒီယတီ ဇရာဂမဒဿနံ၊ အာတပတ္တ မဏ္ဍလေန ဝိယ တိရောကရီယတိ ပရလောကာပေက္ခဏံ၊ စာမရပဝနေန ဝိယ ဒုရမုဒ္ဓုယတေ သစ္စာဒိတာ ဝေတ္တလတာပ္ပဟာရေန ဝိယ ဒုရမပယန္တိ သဂ္ဂုဏာ ဧကေ ရဇ္ဇသိရိ မဒိရာ မဒမတ္တာ သကတ္ထနိပ္ဖါဒနပရေဟိ ဓနပိသိတာဃာသဂိဇ္ဈေဟိ သဟာနလီနီဗကေဟိ ဒူတံ ဝိနောဒနန္တိ၊ ပရဒါရာဘိဂမနံ ဝိဒ္ဓတာတိ၊ မီဂဝန ပရိဿမောတိ၊ သုရာပါနံ ဝိလာသောတိ၊ နိစ္စပ္ပမတ္တတာ၊ သုရဘာဝေါတိ သဒါရပ္ပိစ္စာဂံ အဝျသနိတာနိ၊ ဂုရုဝစနာဝဓီရဏံ အပရပ္ပနေယတ္တမိတိ အဇိတဟစ္စတံ သုခေါပသေဝတ္တမီတိ၊ နစ္စဂီတ ဂဏာကာနုသတ္တိ ရသိကတေဟိ ပရိဘဝသဟတ္တံ ခမေတိ၊ သေရီဘာဝံ ပဏ္ဍိစ္စာမိတိ ဝဏ္ဒိဇန နဝစနံ ယသေံဃောသောတိ တရလတာ ဥဿာဟောတိ. အဝိသေသညုတ္တံ အပက္ခပါတိတ္တမိတိ? ဧဝ ဒေါသဂဏမ္ပိ ဂုဏပက္ခေ အဇ္ဈာရောပယန္တေဟိ သယမ္ပိ အန္တော ဟ သန္တေဟိ ပတာရဏကုသလေဟိ ဓုတ္တေဟိ အမာနုသောစိတာဟိ ထောမာနာဟိ ပတာရိယမာနာ၊ စိတ္တမဒမတ္တ စိတ္တာ နိစ္စေတ န တာယ တထေတိ အတ္တနိ အဇ္ဈာရောပယန္တာ အလိကာဘိမာနံ မစ္စဓမ္မသမာနာပိ ဒိဗ္ဗံ သာဝတိဏ္ဏမိဝ အမာနုသမိဝ အတ္တာန မညမာနာ အာရဓဒိဗ္ဗောစိတကိရယာနု ဘာဝါ သဗ္ဗဇနော ပဘသနီယ ဘာဝမုပယန္တိ. အတ္တ မိလမ္ဗနဉ္စ အနု ဇီဝိဇနေန ကရီယမာနံ အဘိနဏ္ဒန္တိ.
၃၈. မာနသာ ဒေဝတာဇ္ဈာရောပဏပ္ပတာရဏ သမ္ဘူတ သမ္ဘာဝနော ပဟတဉ္စ အန္တော ပဝိဋ္ဌ အပရဘုဇယုဂံ ဝိယ အတ္တနော ဗာဟုယုဂံ သမ္ဘာဝယန္တိ. တစန္တရိတ လောစနံသကလလာဋ မာသံကန္တိ၊ အလိကသမ္ဘာဝနာဘိမာနဘရိတာ န နမဿန္တိ ဒေဝတာယော န ပူဇယန္တိ သမဏ ဗြာဟ္မဏေ န မာနယန္တီ မာနနီယေ၊ န ဥပတိဋ္ဌန္တိ ဂုရုဒဿနေပိ အနတ္ထကာယာ သာန္တရီတ၊ ဝိသယော ပဘောဂသုခါတိ အပဟသန္တိ ယတိနော? ဇရာဘိ ဘဝပလပိမိတိ န သုဏန္တိ ဝုဒ္ဓဇနုပဒေသံ၊ အတ္တနော ပညာ ပရိဘဝေါတိ ဥသုသန္တိ သစိဝေါ ပဟေသဿ၊ကုဉ္ဇန္တိ ဧကန္တ ဟိတဝါဒိနံ ဧဝမာဒိနာ ကာကဏေန ဗဟုန္နံ ဒေါသာနံ မာကရ ဘူတံရဇ္ဇီဝိဘဝံ အယံ န ဣစ္ဆာမီ’တိ အဝေါစ.
၃၉. အထ မဟာဇနေန သာဒရ မဇ္ဈေသိတော မဟာသံဃော ကုမာရဘိမုခေါ ဟုတွာ ‘‘မဟာဘာဂဓေယျ! ထနစုစုကေ လဂ္ဂိတာဇလုက တိက္ခဍသနေနတတ္ထ ဝေဒနုပ္ပါဒယန္တိ လောဟိတမေဝ အာကဍ္ဎတိ၊ ဒါရကော ပန ကောမလေန မုခပုဋေနမာတု သုခသညံ ဥပ္ပါဒယန္တော ခီရမေဝ အဝှေတိ.
၄၀. |ဩ၀.၀၀၀၉| ဧဝမေဝ ရဇ္ဇဝိဘဝံ ပတ္တော အဓီရော ဗာလော ဗဟုံ အပုညမေဝ သဉ္စိဏာနိ၊ မေဓာဝိ ဓိရပုရိသော ပန အာယုသင်္ခါရဿ ဒုဗ္ဗလတ္တဉ္စ ဓနသဉ္စယဿ နိဿာရတ္တဉ္စ ပညာယ ဥပ ပရိက္ခိတွာ ဒသ ကုသလကမ္မာနိ ပူရေန္တော တာဒိသေန မဟတာ ဘောဂက္ခဏ္ဓေန မဟန္တံ ကုသလရာသိံ ဥပစိဏာတိ၊ တွမသိကတာဓိ ကာရော မဟာသတ္တဓုရဏ္ဓရော၊ ဧတာဒိသံ ပုညာယတနဋ္ဌာနံ လဒ္ဓါ ဓမ္မေန သမေန လောကံ ပရိပါလေန္တော သုဂတသာသနံ ပဂ္ဂဏှန္တော ဒါနပါရမိကောဋိပ္ပတ္တံ ကတွာ ပစ္ဆာ အဘိနိက္ခမဏဉ္စ ကရောန္တော ဗောဓိပက္ခိယဓမ္မေ ပရိပါစေဟီ’’တိ အနုသာသိ.
၄၁. အထ သော မဟဇ္ဈာသယော ပုရိသဝရော မဟာသံဃဿ အနုသာသနိံ မဒ္ဒိတု မသမဏ္ထော အဓိဝါသေသီ. အနန္တရဉ္စ မဟာဇနကာယော သံဃဿ အနုညာယ သကလံ သီလဒီပံ ဧကစ္ဆတ္တံ ကတွာ အဘိသိဉ္စိယ ဓမ္မိက သိရိသံဃဗောဓိရာဇာတိ ဝေါဟာရံ ပဋ္ဌပေသိ ဂေါဌာဘယဉ္စ သေနာပတိဋ္ဌာနေ ဌပေသိ.
၄၂. ဒါနံ အဒါ ဓာရယိ နိစ္စသီလံ၊
ဝဟီ တိတိက္ခံ ဘဇိ အပ္ပမာဒံ၊
ပဇာ ဟိတဇ္ဈာသယ သောမ္မရူပေါ၊
ဓမ္မော စ သော ဝိဂ္ဂဘဝါ ဝိရောစီ.
၄၃. ဝိညာယ လောကဿ ဟိ သော သဘာဝံ၊
ပဓာနဝတ္တာနု ဂတိပ္ပဓာနံ၊
နိဓာတုကာမော ဇန္တာသု ဓမ္မံ၊
သယမ္ပိ ဓမ္မာ ဝရဏမှိ သတ္တော.
ဣတိ ရဇ္ဇာဘိသေက ပရိစ္ဆေဒေါ စတုတ္ထော.
၄၄. သော ရာဇာ မဟာ ဝိဟာရေ မဟဂ္ဃ မဟာဝိသာလံ သလာကဂ္ဂံ ကာရာပေတွာ အနေကသဟဿာနံ ဘိက္ခူနံ နိစ္စံ သလာက ဘတ္တံ ပဋ္ဌပေသိ. မာတုလမဟာထေရဿံစ သကနာမ ဓေယျေန မဟန္တံ ပရိဝေဏ ဝိဟာရံ ကာရာပေတွာ အနေကေဟိ ကပ္ပိယဘဏ္ဍေဟိ သဒ္ဓိံ သပရိဝါရ ဝေဏာ ကာနိ ဂါမက္ခေတ္တာနိ သငသပရိဘောဂါရဟာနိ ကတွာ ဒါပေသိ သတ္တမေဝ နိသီထကာလေ ရဟောဂတော မဟာဗောဓိသတ္တဿ ဒုက္ကရစရိတာနိ သလ္လက္ခေန္တော တာဒိသာပဒါနံ အတ္တနိ သမ္ပာဒေတုမာသိံသိ. တထာ ဟိ
၄၅. ဒေဟီတိ ဝတ္ထုမသုကံ ဂဒိတောတ္ထိကေဟိ၊
နာလံ ကထေတုမှ နတ္ထိ န ဒေမိစာတိ၊
စိတ္တေ မဟာကရုဏာယ ပဟဋာဝကာသာဝ၊
ဒုရံဇဂါမ ဝိယ တဿ ဘဝတ္ထု တဏှာ.
ဧဝမမှာကံ |ဩ၀.၀၀၁၀| ဗောဓိသတ္တဿ ဝိယ ဗာဟိရ ဝတ္ထုပရိစ္စာဂမဟုဿဝေါ ကဒါ မေ ဘဝိဿတိတိ စ၊
၄၆. အာနီယတေ နိသိတ သတ္ထနိပါတနေန၊
နိက္ကဍ္ဎတေ စ မုဟု ဒါနှဝါယရတျာ၊
ဧဝံ ပုနပ္ပုန ဂတာဂတဝေဂခိန္နံ၊
ဒုက္ခံ န တဿ ဟဒယံ ဝတ ပီဠယိတ္ထ.
ဧဝံ ကိရဿ မဟာသတ္တဿ မံသ လောဟိတာဒိ အဇ္ဈတ္တိကဝတ္ထုဒါနသမယေ ဒုက္ခဝေဒနာ မနံ န သမ္ဗာဓေသိ. မမာပိ ဤဒိသံ အဇ္ဈတ္တိက ဒါနမဟာမင်္ဂလံ ကဒါ ဘဝိဿတီတိ စ.
၄၇. သော သံခပါလဘူဇဂေါ ဝိသဝေဂဝါပိ၊
သီလဿ ဘေဒနဘယေန အကုပ္ပမာနော၊
ဣစ္ဆံ သဒေဟဟရဝါဘိဇနေ ဒယာယ၊
ဂန္တုံ သယံ အပဒတာယ သုသောစနူနံ.
ဧဝံ သီလ ရက္ခနာပဒါနသိရိံ ကဒါ ဝိန္ဒာမီတိ စ၊
၄၈. ပိဝေယျ ထညံ အမတဉ္စ ဗာလော၊
ဝုဒ္ဓိံ ဂတော သောဝ ဇိဂုစ္ဆိတေ တံ၊
သ ဇာတု ဧဝံ အနုဘူယ ရဇ္ဇံ၊
ဉာဏဿ ပါကေ သတတံ ဇဟာတိ.
ဧဝံ မယာပိ အစိရဿေဝ အဝဿံ အဘိနိက္ခမနံ ကာတဗ္ဗန္တိ စ၊
၄၉. သော သေနကော ဒွိဇပသိဗ္ဗကသာယိသပ္ပံ၊
အညာသိ ဒေါသကလုသာယ ဓိယာဗ္ဘုတံတံ၊
ကာ ဝဏ္ဏနာဿ ခလု ဒေါသဝိနိဂ္ဂတာယ၊
သဗ္ဗညုတာယ ဒသပါရမိသာဓိတာယ.
ဧဝံဝိဓာ ကလျာနဉာဏသမ္ပတ္တိ ကဒါ မေ သမိဇ္ဈိဿတီတိ စ၊
၅၀. ဝါလေန သော ကိသကလဏ္ဒကဇာတိယမ္ပိ၊
ဥဿိဉ္စိတုံ သလိလမုဿဟိ သာဂရဿ၊
တံ မုဒ္ဓတာယ န ဘဝေ မတိယာ မဟနျာ၊
သမ္ပာဒနာယ ဘိမတဿ သမတ္ထတာယ.
ဧဝံ ဝိဓာယ ဝီရိယပါရမိယာ ကဒါ ဘာဇနံ ဘဝိဿာမိတိ စ
၅၁. ကလာဗုရာဇေန ဟိ ခန္တိဝါဒိ၊
ဝဓံ ဝိဓာယာပိ အတိတ္တကေန၊
ဟတေ ပဒေနောရသိ ခန္တိသောဓေ၊
သော ကူဋသဏ္ဓိဂ္ဂဟဏံ ဗုဗောဓ.
ဧဝံ ဝိဓာယ ခတ္တိပါရမိယာ အတ္တာနံ ကဒါ အလံကရိဿာမိတိ စ
၅၂. |ဩ၀.၀၀၁၁|
မိစ္ဆာဘိယောဂံ န သဟိံသု တဿ၊
ရာမာဘိဓာနဿပိ ပါဒုကာယော၊
သစ္စဉ္စယာ နာညမဘာသိဓီရော၊