ဒါဌာဝံသော |ဩ၀.၀၀၀၁|
နမော တဿ ဘဂဝတော အရဟတော သမ္မာသမ္ဗုဒ္ဓဿ
၁. ဝိသာရဒံ ဝါဒပထာတိ ဝတ္တိနံ၊
တိလောကပဇ္ဇောတမသယှသာဟိနံ၊
အသေသ ဉေယျာဝရဏပ္ပဟာယိနံ၊
နမာမိ သတ္ထာရမနန္တဂေါစရံ.
၂. |ဩ၀.၀၀၀၂|
တိလောက နာထပ္ပဘဝံ ဘယာပဟံ၊
ဝိသုဒ္ဓဝိဇ္ဇာစရဏေဟိ သေဝိတံ၊
ပပဉ္စ သံယောဇနဗန္ဓနစ္ဆိဒံ၊
နမာမိ ဓမ္မံ နိပုဏံ သုဒုဒ္ဒသံ.
၃. ပသာဒမတ္တေန’ပိ ယတ္ထ ပါဏိနော၊
ဖူသန္တိ ဒုက္ခက္ခယမစ္စုတံ ပဒံ၊
တမာဟုဏေယျံ သုသမာဟိတိန္ဒြိယံ၊
နမာမိ သံဃံ မုနိရာဇသာဝကံ.
၄. ဝိဘုသယံ ကာဠကနာဂရနွ ယံ၊
ပရက္ကမော ကာရုဏိကော စမူပတိ၊
ဂဝေသမာနော ဇိနသာသနဿ ယော၊
ဝိရူဠှိမတ္ထဉ္စ ဇနဿ ပတ္ထယံ.
၅. |ဩ၀.၀၀၀၃|
သုဓာမယူခါမလ ပဏ္ဍုဝံသဇံ၊
ဝိရူဠှသဒ္ဓံ မုနိရာဇသာသနေ၊
ပိယံ ဝဒံ နီတိပထာနုဝတ္တိနိံ၊
သဒါ ပဇာနံ ဇနိကံ’ဝ မာတရံ.
၆. ပိယံ ပရက္ကန္တိဘုဇဿ ရာဇိနော၊
မဟေသိ မစ္စုန္နတခုဒ္ဓိသမ္ပဒံ၊
ဝိဓာယ လီလာဝတိမိစ္ဆိတတ္ထဒံ၊
အသေသ လင်္ကာတလရဇ္ဇလက္ခိယံ.
၇. ကုမာရမာရာဓိတသာဓုမန္တိနံ၊
မဟာဒယံ ပဏ္ဍုနရိန္ဒ ဝံသဇံ၊
ဝိဓာယ သဒ္ဓံ မဓုရိန္ဒနာမကံ၊
သုသိက္ခီတံ ပါဝစနေ ကလာသု စ.
၈. |ဩ၀.၀၀၀၄|
နရိန္ဒသုညံ သုစိရံ တိသီဟဠံ၊
ဣတိပ္ပတီတံ အယသံ အပါနုဒိ၊
စိရံ ပဏီတေန စ စိဝရာဒိနာ၊
သုသညတေ သံယမိနော အတပ္ပယိ.
၉. စိရဋ္ဌိတိံ ပါဝစနဿ ဣစ္ဆတာ၊
ကတညုနာ ဝိက္ကမ ဗုဒ္ဒိသာလိနာ၊
သတီမတာ စန္ဒိမ ဗန္ဓုကိတ္တိနာ၊
သဂါရဝံ တေန’ဘီယာစိတော အဟံ.
၁၀. သဒေသ ဘာသာယ ကဝီဟိ သီဟဠေ၊
ကတမ္ပိ ဝံသံ ဇိနဒန္တဓာတုယာ၊
နိရုတ္တိယာ မာဂဓိကာယ ဝုဒ္ဓိယာ၊
ကရောမိ ဒီပန္တရဝါသိနံ အပိ.
၁၁. |ဩ၀.၀၀၀၅|
ဇီနော’ယမိဒ္ဓေ အမရဝှယေ ပုရေ၊
ကဒါစိ ဟုတွာန သုမေဓနာမကော၊
သဝေဒဝေဒင်္ဂဝိဘာဂကောဝိဒေါ၊
မဟဒ္ဓနေ ဝိပ္ပကုလမှိ မာဏဝေါ.
၁၂. အဟဉှိ ဇာတိဗျသနေန ပီဠိတော၊
ဇရာဘိဘုတော မရဏေန ဩတ္ထဋော၊
သိဝံ ပဒံ ဇာတိဇရာဒိနိဿဋံ၊
ဂဝေသယိဿံ’တိ ရဟော ဝိစိန္တိယ.
၁၃. အနေကသင်္ခံ ဓနဓညသမ္ပဒံ၊
ပတိဋ္ဌပေတွာ ကပဏေသိ ဒုစ္စဇံ၊
အနပ္ပကေ ပေမဘရာနုဗန္ဓိနော၊
ဝိဟာယ မိတ္တေ စ သုတေစ ဗန္ဓဝေ.
၁၄. |ဩ၀.၀၀၀၆|
ပဟာယ ကာမေ နိခိလေ မနောရမေ၊
ဃရာဘိနိက္ခမ္မ ဟိမာစလန္တိကေ၊
မဟီဓရံ ဓမ္မိကနာမ ဝိဿုတံ၊
ဥပေစ္စ နာနာတရုရာဇိဘုသိတံ.
၁၅. မနောနုကူလေ သုရရာဇနိမ္မီတေ၊
အသမ္မိဂါနံ အဂတိမှိ အဿမေ၊
နိဝတ္တစီရော အဇိနက္ခိပံ ဝဟံ၊
ဇဋာဓရော တာပသ ဝေသမဂ္ဂဟီ.
၁၆. သုသညတတ္တောပရိဝါရိ တိန္ဒြိယော၊
ဖလာဖလာဒီဟိ ပဝတ္တယံ တနုံ၊
ဂတော အဘိဉ္ဂ္ဉာသု စ ပါရမိံ ဝသီ၊
တဟိံ သမာပတ္တိ သုခံ အဝိန္ဒိ သော.
၁၇. |ဩ၀.၀၀၀၇|
သုသဇ္ဇိတေ ရမ္မပုရာဓိဝါသိနာ၊
မဟာဇနေန’တ္တမနေန အဉ္ဇသေ၊
ပထပ္ပဒေသေ အဘိယန္တမတ္တနော၊
အနိဋ္ဌိတေယေဝ သုမေဓ တာပသော.
၁၈. အဂါဓဉေယျောဒဓီပါရဒဿိနံ၊
ဘဝန္တဂုံ နိဗ္ဗနထံ ဝိနာယကံ၊
အနေကခီဏာသဝလက္ခသေဝိတံ၊
ကဒါ စိ ဒီပင်္ကရဗုဒ္ဓမဒ္ဒသ.
၁၉. တတော သသံဃဿ တိလောကဘတ္တုနော၊
ပရိစ္စဇိတွာန တနုမ္ပိ ဇီဝိတံ၊
ပသာရယိတွာန ဇဋာဇိနာဒိကံ၊
ဝိဓာယ သေတုံ တနုမေဝ ပလ္လလေ.
၂၀. |ဩ၀.၀၀၀၈|
အနက္ကမိတွာ ကလလံ မဟာဒယေ၊
သဘိက္ခုကော ဂစ္စတု ပိဋ္ဌိယာ ဣတိ၊
အဓိဋ္ဌဟိတွာန နိပန္နကော တဟိံ၊
အနာထ မေတံ တိဘဝံ သမေက္ခိယ.
၂၁. ဒယာယ သဉ္စောဒိတမာနသော ဇနေ၊
ဘဝဏ္ဏဝါ ဥဒ္ဓရိတုံ ဒုခဒ္ဒိတေ၊
အကာသိ သမ္ဗောဓိပဒဿ ပတ္တိယာ၊
မဟာဘိနီဟာရမုဒဂ္ဂဝိက္ကမော.
၂၂. |ဩ၀.၀၀၀၉|
အထော ဝိဒိတွာ ဝသိနော တမာသယံ၊
အဒါသိ သော ဝျာကရဏံ မဟာမုနိ၊
တတော ပုရံ တမှိ တထာဂတေ ဂတေ၊
သယံဝသီ သမ္မသိ ပါရမိဂုဏေ.
၂၃. တတော စ ကပ္ပါနမလီနဝိက္ကမော၊
အသံခိယေ သော စတုရော သလက္ခကေ၊
တဟိံ တဟိံ ဇာတိသု ဗောဓိပါစနေ၊
ဝိသုဒ္ဓသမ္ဘာရဂုဏေ အပူရယိ၊
အထာဘိဇာတော တုသိတေ မဟာယသော၊
ဝိသုဒ္ဓသမ္ဗောဓိပဒေါပလဒ္ဓိယာ၊
ဥဒိက္ခမာနော သမယံ ဒယာဓနော၊
စိရံ ဝိဘုတိံ အနုဘောသိ သဗ္ဗသော.
၂၅. |ဩ၀.၀၀၁၀|
သဟဿသင်္ခါ ဒသစက္ကဝါလတော၊
သမာဂတာနေကသုရာဓိပါဒိဟိ၊
ဥဒဂ္ဂုဒဂ္ဂေဟိ ဇိနတ္တပတ္တိယာ၊
သဂါရဝံ သော အဘိဂမ္မ ယာစိတော.
၂၆. တတော စဝိတွာ ကပိဠဝှယေ ပုရေ၊
သဒါ သတော သကျကုလေကကေတုနော၊
အဟောသိ သုဒ္ဓေါဒနဘုမိဘတ္တုနော၊
မဟာဒိမာယာယ မဟေသိယာ သုတော.
၂၇. |ဩ၀.၀၀၁၁|
ဝိဇာတမတ္တော’ဝ ဝသုန္ဓရာယ သော၊
ပတိဋ္ဌဟိတွာန ဒိသာ ဝိလောကယီ၊
တဒါ အဟေသုံ ဝိဝဋင်္ဂနာ ဒိသာ၊
အပူဇယုံ တတ္ထ စ ဒေဝမာနုသာ.
၂၈. အာဓာရယုံ အာတပဝါရဏာဒိကံ၊
အဒိဿမာနာဝ နဘမ္ဘိ ဒေဝတာ၊
ပဒါနိ သော သတ္တ စ ဥတ္တရာမုခေါ၊
ဥပေစ္စ နိစ္ဆာရယိ ဝါစမာသဘိံ.
၂၉. ယထတ္ထသိဒ္ဓတ္တကုမာရနာမကော၊
မဟဗ္ဗလော ယောဗ္ဗနဟာရိဝိဂ္ဂဟော၊
ဥတုတ္တယာနုစ္ဆဝိကေသု တီသု သော၊
နုဘောသိ ပါသာဒဝရေသု သမ္ပဒံ.
၃၀. |ဩ၀.၀၀၁၂|
ကဒါစိ ဥယျာနပထေ ဇရာဟတံ၊
တထာတုရံ ကာလကတဉ္စ သံယမိံ၊
ကမေန ဒိသွာန ဝိရတ္တမာနသော၊
ဘဝေသု သော ပဗ္ဗဇိတုံ အကာမယိ.
၃၁. သပုပ္ဖဒီပါဒီကရေဟိ ရတ္တိယံ၊
ပုရက္ခတော သော တိဒိဝါဓိဝါသိဟိ၊
သဆန္နကော ကန္တကဝါဇိယာနတော၊
တတော မဟာကာရုဏိကော’ဘိနိက္ခမိ.
၃၂. ကမေန ပတွာန အနောမမာပဂံ၊
သုဓောတမုတ္တာဖလဟာရိသေကတေ၊
ပတိဋ္ဌဟိတွာ ဝရမောဠိဗန္ဓနံ၊
သိတာသိလူနံ ဂဂနေ သမုက္ခိပီ.
၃၃. |ဩ၀.၀၀၁၃|
ပဋိဂ္ဂဟေတွာ တိဒသာနမိဿရော၊
သုဝဏ္နစင်္ဂေါဋဝရေန တံ တဒါ၊
တိယောဇနံ နီလမဏီဟိ စေတိယံ၊
အကာသိ စူဠာမဏိမတ္တနော ပုရေ.
၃၄. တတော ဃဋီကာရသရောဇယောနိနာ၊
သမာဟဋံ ဓာရယီ စီဝရာဒိကံ၊
အထော သကံ ဝတ္ထယုဂံ နဘတ္ထလေ၊
ပသတ္ထဝေသဂ္ဂဟဏော သမုက္ခိပီ.