၃. မူလကသုတ္တံ

၈၃. [အ. နိ. ၁၀.၅၈ ပဿိတဗ္ဗံ] ‘‘သစေ၊ ဘိက္ခဝေ၊ အညတိတ္ထိယာ ပရိဗ္ဗာဇကာ ဧဝံ ပုစ္ဆေယျုံ – ‘ကိံမူလကာ၊ အာဝုသော၊ သဗ္ဗေ ဓမ္မာ၊ ကိံသမ္ဘဝါ သဗ္ဗေ ဓမ္မာ၊ ကိံသမုဒယာ သဗ္ဗေ ဓမ္မာ၊ ကိံသမောသရဏာ သဗ္ဗေ ဓမ္မာ၊ ကိံပမုခါ သဗ္ဗေ ဓမ္မာ၊ ကိံအဓိပတေယျာ သဗ္ဗေ ဓမ္မာ၊ ကိံဥတ္တရာ သဗ္ဗေ ဓမ္မာ၊ ကိံသာရာ သဗ္ဗေ ဓမ္မာ’တိ၊ ဧဝံ ပုဋ္ဌာ တုမှေ၊ ဘိက္ခဝေ၊ တေသံ အညတိတ္ထိယာနံ ပရိဗ္ဗာဇကာနံ ကိန္တိ ဗျာကရေယျာထာ’’တိ? ‘‘ဘဂဝံမူလကာ နော၊ ဘန္တေ၊ ဓမ္မာ၊ ဘဂဝံနေတ္တိကာ ဘဂဝံပဋိသရဏာ. သာဓု၊ ဘန္တေ၊ ဘဂဝန္တံယေဝ ပဋိဘာတု ဧတဿ ဘာသိတဿ အတ္ထော. ဘဂဝတော သုတွာ ဘိက္ခူ ဓာရေဿန္တီ’’တိ.

‘‘တေန ဟိ၊ ဘိက္ခဝေ၊ ဒေသေဿာမိ. တံ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ – ‘‘သစေ၊ ဘိက္ခဝေ၊ အညတိတ္ထိယာ ပရိဗ္ဗာဇကာ ဧဝံ ပုစ္ဆေယျုံ – ‘ကိံမူလကာ၊ အာဝုသော၊ သဗ္ဗေ ဓမ္မာ၊ ကိံသမ္ဘဝါ သဗ္ဗေ ဓမ္မာ၊ ကိံသမုဒယာ သဗ္ဗေ ဓမ္မာ၊ ကိံသမောသရဏာ သဗ္ဗေ ဓမ္မာ၊ ကိံပမုခါ သဗ္ဗေ ဓမ္မာ၊ ကိံအဓိပတေယျာ သဗ္ဗေ ဓမ္မာ၊ ကိံဥတ္တရာ သဗ္ဗေ ဓမ္မာ၊ ကိံသာရာ သဗ္ဗေ ဓမ္မာ’တိ၊ ဧဝံ ပုဋ္ဌာ တုမှေ၊ ဘိက္ခဝေ၊ တေသံ အညတိတ္ထိယာနံ ပရိဗ္ဗာဇကာနံ ဧဝံ ဗျာကရေယျာထ – ‘ဆန္ဒမူလကာ၊ အာဝုသော၊ သဗ္ဗေ ဓမ္မာ၊ မနသိကာရသမ္ဘဝါ သဗ္ဗေ ဓမ္မာ၊ ဖဿသမုဒယာ သဗ္ဗေ ဓမ္မာ၊ ဝေဒနာသမောသရဏာ သဗ္ဗေ ဓမ္မာ၊ သမာဓိပ္ပမုခါ သဗ္ဗေ ဓမ္မာ၊ သတာဓိပတေယျာ သဗ္ဗေ ဓမ္မာ၊ ပညုတ္တရာ သဗ္ဗေ ဓမ္မာ၊ ဝိမုတ္တိသာရာ သဗ္ဗေ ဓမ္မာ’တိ၊ ဧဝံ ပုဋ္ဌာ တုမှေ၊ ဘိက္ခဝေ၊ တေသံ အညတိတ္ထိယာနံ ပရိဗ္ဗာဇကာနံ ဧဝံ ဗျာကရေယျာထာ’’တိ. တတိယံ.