၁၀. သမ္မာဝတ္တနသုတ္တံ

၉၀. [စူဠဝ. ၂၁၁] ‘‘တဿပါပိယသိကကမ္မကတေန၊ ဘိက္ခဝေ၊ ဘိက္ခုနာ အဋ္ဌသု ဓမ္မေသု သမ္မာ ဝတ္တိတဗ္ဗံ – န ဥပသမ္ပာဒေတဗ္ဗော၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ၊ န ကာစိ သံဃသမ္မုတိ သာဒိတဗ္ဗာ၊ န ကိသ္မိဉ္စိ ပစ္စေကဋ္ဌာနေ ဌပေတဗ္ဗော၊ န စ တေန မူလေန ဝုဋ္ဌာပေတဗ္ဗော. တဿပါပိယသိကကမ္မကတေန၊ ဘိက္ခဝေ၊ ဘိက္ခုနာ ဣမေသု အဋ္ဌသု ဓမ္မေသု သမ္မာ ဝတ္တိတဗ္ဗ’’န္တိ. ဒသမံ.

သတိဝဂ္ဂေါ စတုတ္ထော.