၇. သပ္ပုရိသဒါနသုတ္တံ

၃၇. ‘‘အဋ္ဌိမာနိ၊ ဘိက္ခဝေ၊ သပ္ပုရိသဒါနာနိ. ကတမာနိ အဋ္ဌ? သုစိံ ဒေတိ၊ ပဏီတံ ဒေတိ၊ ကာလေန ဒေတိ၊ ကပ္ပိယံ ဒေတိ၊ ဝိစေယျ ဒေတိ၊ အဘိဏှံ ဒေတိ၊ ဒဒံ စိတ္တံ ပသာဒေတိ၊ ဒတွာ အတ္တမနော ဟောတိ. ဣမာနိ ခေါ၊ ဘိက္ခဝေ၊ အဋ္ဌ သပ္ပုရိသဒါနာနီ’’တိ.

‘‘သုစိံ ပဏီတံ ကာလေန၊ ကပ္ပိယံ ပါနဘောဇနံ၊

အဘိဏှံ ဒဒါတိ ဒါနံ၊ သုခေတ္တေသု [သုခေတ္တေ (သီ. ပီ.)] ဗြဟ္မစာရိသု.

‘‘နေဝ [န စ (သီ. ပီ.)] ဝိပ္ပဋိသာရိဿ၊ စဇိတွာ အာမိသံ ဗဟုံ၊

ဧဝံ ဒိန္နာနိ ဒါနာနိ၊ ဝဏ္ဏယန္တိ ဝိပဿိနော.

‘‘ဧဝံ ယဇိတွာ မေဓာဝီ၊ သဒ္ဓေါ မုတ္တေန စေတသာ၊

အဗျာဗဇ္ဈံ [အဗျာပဇ္ဈံ (က.) အ. နိ. ၄.၄၀၊ ၆.၃၇] သုခံ လောကံ၊ ပဏ္ဍိတော ဥပပဇ္ဇတီ’’တိ. သတ္တမံ၊