၃. ဒါနဝတ္ထုသုတ္တံ

၃၃. ‘‘အဋ္ဌိမာနိ၊ ဘိက္ခဝေ၊ ဒါနဝတ္ထူနိ. ကတမာနိ အဋ္ဌ? ဆန္ဒာ ဒါနံ ဒေတိ၊ ဒေါသာ ဒါနံ ဒေတိ၊ မောဟာ ဒါနံ ဒေတိ၊ ဘယာ ဒါနံ ဒေတိ၊ ‘ဒိန္နပုဗ္ဗံ ကတပုဗ္ဗံ ပိတုပိတာမဟေဟိ၊ နာရဟာမိ ပေါရာဏံ ကုလဝံသံ ဟာပေတု’န္တိ ဒါနံ ဒေတိ၊ ‘ဣမာဟံ ဒါနံ ဒတွာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿာမီ’တိ ဒါနံ ဒေတိ၊ ‘ဣမံ မေ ဒါနံ ဒဒတော စိတ္တံ ပသီဒတိ၊ အတ္တမနတာ သောမနဿံ ဥပဇာယတီ’တိ ဒါနံ ဒေတိ၊ စိတ္တာလင်္ကာရစိတ္တပရိက္ခာရတ္ထံ ဒါနံ ဒေတိ. ဣမာနိ ခေါ၊ ဘိက္ခဝေ၊ အဋ္ဌ ဒါနဝတ္ထူနီ’’တိ. တတိယံ.