၁. ပဌမဒါနသုတ္တံ

၃၁. [ဒီ. နိ. ၃.၃၃၆] ‘‘အဋ္ဌိမာနိ၊ ဘိက္ခဝေ၊ ဒါနာနိ. ကတမာနိ အဋ္ဌ? အာသဇ္ဇ ဒါနံ ဒေတိ၊ ဘယာ ဒါနံ ဒေတိ၊ ‘အဒါသိ မေ’တိ ဒါနံ ဒေတိ၊ ‘ဒဿတိ မေ’တိ ဒါနံ ဒေတိ၊ ‘သာဟု ဒါန’န္တိ ဒါနံ ဒေတိ၊ ‘အဟံ ပစာမိ၊ ဣမေ န ပစန္တိ၊ နာရဟာမိ ပစန္တော အပစန္တာနံ ဒါနံ အဒါတု’န္တိ ဒါနံ ဒေတိ၊ ‘ဣမံ မေ ဒါနံ ဒဒတော ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတီ’တိ ဒါနံ ဒေတိ၊ စိတ္တာလင်္ကာရစိတ္တပရိက္ခာရတ္ထံ ဒါနံ ဒေတိ. ဣမာနိ ခေါ၊ ဘိက္ခဝေ၊ အဋ္ဌ ဒါနာနီ’’တိ. ပဌမံ.