၈. ဒုတိယဗန္ဓနသုတ္တံ

၁၈. ‘‘အဋ္ဌဟိ၊ ဘိက္ခဝေ၊ အာကာရေဟိ ပုရိသော ဣတ္ထိံ ဗန္ဓတိ. ကတမေဟိ အဋ္ဌဟိ? ရုဏ္ဏေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ဟသိတေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ဘဏိတေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ အာကပ္ပေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ဝနဘင်္ဂေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ဂန္ဓေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ရသေန၊ ဘိက္ခဝေ၊ ပုရိသော ဣတ္ထိံ ဗန္ဓတိ၊ ဖဿေန၊ ဘိက္ခဝေ၊ ပုရိသော ဣတ္ထိံ ဗန္ဓတိ. ဣမေဟိ ခေါ၊ ဘိက္ခဝေ၊ အဋ္ဌဟာကာရေဟိ ပုရိသော ဣတ္ထိံ ဗန္ဓတိ. တေ၊ ဘိက္ခဝေ၊ သတ္တာ သုဗဒ္ဓါ၊ ယေ ဖဿေန ဗဒ္ဓါ’’တိ. အဋ္ဌမံ.