၅. မလသုတ္တံ

၁၅. ‘‘အဋ္ဌိမာနိ၊ ဘိက္ခဝေ၊ မလာနိ. ကတမာနိ အဋ္ဌ? အသဇ္ဈာယမလာ၊ ဘိက္ခဝေ၊ မန္တာ၊ အနုဋ္ဌာနမလာ၊ ဘိက္ခဝေ၊ ဃရာ၊ မလံ၊ ဘိက္ခဝေ၊ ဝဏ္ဏဿ ကောသဇ္ဇံ၊ ပမာဒေါ၊ ဘိက္ခဝေ၊ ရက္ခတော မလံ၊ မလံ၊ ဘိက္ခဝေ၊ ဣတ္ထိယာ ဒုစ္စရိတံ၊ မစ္ဆေရံ၊ ဘိက္ခဝေ၊ ဒဒတော မလံ၊ မလာ၊ ဘိက္ခဝေ၊ ပါပကာ အကုသလာ ဓမ္မာ အသ္မိံ လောကေ ပရမှိ စ၊ တတော [တတော စ (သျာ. ပီ.)]၊ ဘိက္ခဝေ၊ မလာ မလတရံ အဝိဇ္ဇာ ပရမံ မလံ. ဣမာနိ ခေါ၊ ဘိက္ခဝေ၊ အဋ္ဌ မလာနီ’’တိ.

‘‘အသဇ္ဈာယမလာ မန္တာ၊ အနုဋ္ဌာနမလာ ဃရာ၊

မလံ ဝဏ္ဏဿ ကောသဇ္ဇံ၊ ပမာဒေါ ရက္ခတော မလံ.

‘‘မလိတ္ထိယာ ဒုစ္စရိတံ၊ မစ္ဆေရံ ဒဒတော မလံ၊

မလာ ဝေ ပါပကာ ဓမ္မာ၊ အသ္မိံ လောကေ ပရမှိ စ၊

တတော မလာ မလတရံ၊ အဝိဇ္ဇာ ပရမံ မလ’’န္တိ. ပဉ္စမံ၊