၃. တပုဿသုတ္တံ

၁၁၉. ‘‘ဆဟိ၊ ဘိက္ခဝေ၊ ဓမ္မေဟိ သမန္နာဂတော တပုဿော [တပဿော (ပီ.) အ. နိ. ၁.၂၄၈] ဂဟပတိ တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတိ. ကတမေဟိ ဆဟိ? ဗုဒ္ဓေ အဝေစ္စပ္ပသာဒေန၊ ဓမ္မေ အဝေစ္စပ္ပသာဒေန၊ သံဃေ အဝေစ္စပ္ပသာဒေန၊ အရိယေန သီလေန၊ အရိယေန ဉာဏေန၊ အရိယာယ ဝိမုတ္တိယာ. ဣမေဟိ ခေါ၊ ဘိက္ခဝေ၊ ဆဟိ ဓမ္မေဟိ သမန္နာဂတော တပုဿော ဂဟပတိ တထာဂတေ နိဋ္ဌင်္ဂတော အမတဒ္ဒသော အမတံ သစ္ဆိကတွာ ဣရိယတီ’’တိ. တတိယံ.