၁. ပါတုဘာဝသုတ္တံ

၉၆. ‘‘ဆန္နံ၊ ဘိက္ခဝေ၊ ပါတုဘာဝေါ ဒုလ္လဘော လောကသ္မိံ. ကတမေသံ ဆန္နံ? တထာဂတဿ အရဟတော သမ္မာသမ္ဗုဒ္ဓဿ ပါတုဘာဝေါ ဒုလ္လဘော လောကသ္မိံ၊ တထာဂတပ္ပဝေဒိတဿ ဓမ္မဝိနယဿ ဒေသေတာ ပုဂ္ဂလော ဒုလ္လဘော လောကသ္မိံ၊ အရိယာယတနေ ပစ္စာဇာတိ ဒုလ္လဘာ [ပစ္စာဇာတော ဒုလ္လဘော (သျာ.)] လောကသ္မိံ၊ ဣန္ဒြိယာနံ အဝေကလ္လတာ ဒုလ္လဘာ လောကသ္မိံ၊ အဇဠတာ အနေဠမူဂတာ ဒုလ္လဘာ လောကသ္မိံ၊ ကုသလေ ဓမ္မေ ဆန္ဒော [ကုသလဓမ္မစ္ဆန္ဒော (သီ. သျာ. ပီ.)] ဒုလ္လဘော လောကသ္မိံ. ဣမေသံ ခေါ၊ ဘိက္ခဝေ၊ ဆန္နံ ပါတုဘာဝေါ ဒုလ္လဘော လောကသ္မိ’’န္တိ. ပဌမံ.