၅. အပ္ပဟာယသုတ္တံ

၈၉. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော ဒိဋ္ဌိသမ္ပဒံ သစ္ဆိကာတုံ. ကတမေ ဆ? သက္ကာယဒိဋ္ဌိံ၊ ဝိစိကိစ္ဆံ၊ သီလဗ္ဗတပရာမာသံ၊ အပါယဂမနီယံ ရာဂံ၊ အပါယဂမနီယံ ဒေါသံ၊ အပါယဂမနီယံ မောဟံ. ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော ဒိဋ္ဌိသမ္ပဒံ သစ္ဆိကာတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော ဒိဋ္ဌိသမ္ပဒံ သစ္ဆိကာတုံ. ကတမေ ဆ? သက္ကာယဒိဋ္ဌိံ၊ ဝိစိကိစ္ဆံ၊ သီလဗ္ဗတပရာမာသံ၊ အပါယဂမနီယံ ရာဂံ၊ အပါယဂမနီယံ ဒေါသံ၊ အပါယဂမနီယံ မောဟံ. ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော ဒိဋ္ဌိသမ္ပဒံ သစ္ဆိကာတု’’န္တိ. ပဉ္စမံ.