၃. ဥတ္တရိမနုဿဓမ္မသုတ္တံ

၇၇. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော ဥတ္တရိမနုဿဓမ္မံ အလမရိယဉာဏဒဿနဝိသေသံ သစ္ဆိကာတုံ. ကတမေ ဆ? မုဋ္ဌဿစ္စံ၊ အသမ္ပဇညံ၊ ဣန္ဒြိယေသု အဂုတ္တဒွါရတံ၊ ဘောဇနေ အမတ္တညုတံ၊ ကုဟနံ၊ လပနံ. ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော ဥတ္တရိမနုဿဓမ္မံ အလမရိယဉာဏဒဿနဝိသေသံ သစ္ဆိကာတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော ဥတ္တရိမနုဿဓမ္မံ အလမရိယဉာဏဒဿနဝိသေသံ သစ္ဆိကာတုံ. ကတမေ ဆ? မုဋ္ဌဿစ္စံ၊ အသမ္ပဇညံ၊ ဣန္ဒြိယေသု အဂုတ္တဒွါရတံ၊ ဘောဇနေ အမတ္တညုတံ၊ ကုဟနံ၊ လပနံ. ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော ဥတ္တရိမနုဿဓမ္မံ အလမရိယဉာဏဒဿနဝိသေသံ သစ္ဆိကာတု’’န္တိ. တတိယံ.