၈. ဗလသုတ္တံ

၇၂. ‘‘ဆဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု အဘဗ္ဗော သမာဓိသ္မိံ [သမာဓိမှိ (က.)] ဗလတံ ပါပုဏိတုံ. ကတမေဟိ ဆဟိ? ဣဓ၊ ဘိက္ခဝေ၊ ဘိက္ခု န သမာဓိဿ သမာပတ္တိကုသလော ဟောတိ၊ န သမာဓိဿ ဌိတိကုသလော ဟောတိ၊ န သမာဓိဿ [န သမာဓိမှာ (က.) ဥပရိသတ္တကနိပါတေ ဒေဝတာဝဂ္ဂေ ပန သဗ္ဗတ္ထပိ ‘‘သမာဓိဿ’’ဣတွေဝ ဒိဿတိ] ဝုဋ္ဌာနကုသလော ဟောတိ၊ အသက္ကစ္စကာရီ စ ဟောတိ၊ အသာတစ္စကာရီ စ၊ အသပ္ပါယကာရီ စ. ဣမေဟိ ခေါ၊ ဘိက္ခဝေ၊ ဆဟိ ဓမ္မေဟိ သမန္နာဂတော ဘိက္ခု အဘဗ္ဗော သမာဓိသ္မိံ ဗလတံ ပါပုဏိတုံ.

‘‘ဆဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဘဗ္ဗော သမာဓိသ္မိံ ဗလတံ ပါပုဏိတုံ. ကတမေဟိ ဆဟိ? ဣဓ၊ ဘိက္ခဝေ၊ ဘိက္ခု သမာဓိဿ သမာပတ္တိကုသလော ဟောတိ၊ သမာဓိဿ ဌိတိကုသလော ဟောတိ၊ သမာဓိဿ ဝုဋ္ဌာနကုသလော ဟောတိ၊ သက္ကစ္စကာရီ စ ဟောတိ၊ သာတစ္စကာရီ စ၊ သပ္ပါယကာရီ စ. ဣမေဟိ ခေါ၊ ဘိက္ခဝေ၊ ဆဟိ ဓမ္မေဟိ သမန္နာဂတော ဘိက္ခု ဘဗ္ဗော သမာဓိသ္မိံ ဗလတံ ပါပုဏိတု’’န္တိ. အဋ္ဌမံ.