၁၀. ဒုတိယတဇ္ဈာနသုတ္တံ

၇၄. ‘‘ဆ၊ ဘိက္ခဝေ၊ ဓမ္မေ အပ္ပဟာယ အဘဗ္ဗော ပဌမံ ဈာနံ ဥပသမ္ပဇ္ဇ ဝိဟရိတုံ. ကတမေ ဆ? ကာမဝိတက္ကံ၊ ဗျာပါဒဝိတက္ကံ၊ ဝိဟိံသာဝိတက္ကံ၊ ကာမသညံ၊ ဗျာပါဒသညံ၊ ဝိဟိံသာသညံ – ဣမေ ခေါ၊ ဘိက္ခဝေ၊ ဆ ဓမ္မေ အပ္ပဟာယ အဘဗ္ဗော ပဌမံ ဈာနံ ဥပသမ္ပဇ္ဇ ဝိဟရိတုံ.

‘‘ဆ၊ ဘိက္ခဝေ၊ ဓမ္မေ ပဟာယ ဘဗ္ဗော ပဌမံ ဈာနံ ဥပသမ္ပဇ္ဇ ဝိဟရိတုံ. ကတမေ ဆ? ကာမဝိတက္ကံ၊ ဗျာပါဒဝိတက္ကံ၊ ဝိဟိံသာဝိတက္ကံ၊ ကာမသညံ၊ ဗျာပါဒသညံ၊ ဝိဟိံသာသညံ – ဣမေ ခေါ၊ ဘိက္ခဝေ၊ ဆ ဓမ္မေ ပဟာယ ဘဗ္ဗော ပဌမံ ဈာနံ ဥပသမ္ပဇ္ဇ ဝိဟရိတု’’န္တိ. ဒသမံ.

ဒေဝတာဝဂ္ဂေါ သတ္တမော. [ဒုတိယော (သျာ. က.)]