၇. မဇ္ဈေသုတ္တံ

၆၁. ဧဝံ မေ သုတံ – ဧကံ သမယံ ဘဂဝါ ဗာရာဏသိယံ ဝိဟရတိ ဣသိပတနေ မိဂဒါယေ. တေန ခေါ ပန သမယေန သမ္ဗဟုလာနံ ထေရာနံ ဘိက္ခူနံ ပစ္ဆာဘတ္တံ ပိဏ္ဍပါတပဋိက္ကန္တာနံ မဏ္ဍလမာဠေ သန္နိသိန္နာနံ သန္နိပတိတာနံ အယမန္တရာကထာ ဥဒပါဒိ – ‘‘ဝုတ္တမိဒံ၊ အာဝုသော၊ ဘဂဝတာ ပါရာယနေ မေတ္တေယျပဉှေ –

[စူဠနိ. တိဿမိတ္တေယျမာဏဝပုစ္ဆာ ၆၇] ‘‘ယော ဥဘောန္တေ ဝိဒိတွာန၊ မဇ္ဈေ မန္တာ န လိပ္ပတိ [န လိမ္ပတိ (က.)]၊

တံ ဗြူမိ မဟာပုရိသောတိ၊ သောဓ သိဗ္ဗိနိ [သိဗ္ဗနိ (သီ. သျာ. ကံ. ပီ.)] မစ္စဂါ’’တိ.

‘‘ကတမော နု ခေါ၊ အာဝုသော၊ ဧကော အန္တော၊ ကတမော ဒုတိယော အန္တော၊ ကိံ မဇ္ဈေ၊ ကာ သိဗ္ဗိနီ’’တိ? ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘ဖဿော ခေါ၊ အာဝုသော၊ ဧကော အန္တော၊ ဖဿသမုဒယော ဒုတိယော အန္တော၊ ဖဿနိရောဓော မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော [အဘိဇာနိတွာ (က.)] ပရိညေယျံ ပရိဇာနန္တော [ပရိဇာနိတွာ (က.)] ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘အတီတံ ခေါ၊ အာဝုသော၊ ဧကော အန္တော၊ အနာဂတံ ဒုတိယော အန္တော၊ ပစ္စုပ္ပန္နံ မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော၊ ပရိညေယျံ ပရိဇာနန္တော ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘သုခါ၊ အာဝုသော၊ ဝေဒနာ ဧကော အန္တော၊ ဒုက္ခာ ဝေဒနာ ဒုတိယော အန္တော၊ အဒုက္ခမသုခါ ဝေဒနာ မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော၊ ပရိညေယျံ ပရိဇာနန္တော ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘နာမံ ခေါ၊ အာဝုသော၊ ဧကော အန္တော၊ ရူပံ ဒုတိယော အန္တော၊ ဝိညာဏံ မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော ပရိညေယျံ ပရိဇာနန္တော ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘ဆ ခေါ၊ အာဝုသော၊ အဇ္ဈတ္တိကာနိ အာယတနာနိ ဧကော အန္တော၊ ဆ ဗာဟိရာနိ အာယတနာနိ ဒုတိယော အန္တော၊ ဝိညာဏံ မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော ပရိညေယျံ ပရိဇာနန္တော ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘သက္ကာယော ခေါ၊ အာဝုသော၊ ဧကော အန္တော၊ သက္ကာယသမုဒယော ဒုတိယော အန္တော၊ သက္ကာယနိရောဓော မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ အာဝုသော၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော ပရိညေယျံ ပရိဇာနန္တော [သဗ္ဗတ္ထပိ ဧဝမေဝ ဒိဿတိ] ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ.

ဧဝံ ဝုတ္တေ အညတရော ဘိက္ခု ထေရေ ဘိက္ခူ ဧတဒဝေါစ – ‘‘ဗျာကတံ ခေါ၊ အာဝုသော၊ အမှေဟိ သဗ္ဗေဟေဝ ယထာသကံ ပဋိဘာနံ. အာယာမာဝုသော၊ ယေန ဘဂဝါ တေနုပသင်္ကမိဿာမ၊ ဥပသင်္ကမိတွာ ဘဂဝတော ဧတမတ္ထံ အာရောစေဿာမ. ယထာ နော ဘဂဝါ ဗျာကရိဿတိ တထာ နံ ဓာရေဿာမာ’’တိ. ‘‘ဧဝမာဝုသော’’တိ ခေါ ထေရာ ဘိက္ခူ တဿ ဘိက္ခုနော ပစ္စဿောသုံ. အထ ခေါ ထေရာ ဘိက္ခူ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. ဧကမန္တံ နိသိန္နာ ခေါ ထေရာ ဘိက္ခူ ယာဝတကော အဟောသိ သဗ္ဗေဟေဝ သဒ္ဓိံ ကထာသလ္လာပေါ၊ တံ သဗ္ဗံ ဘဂဝတော အာရောစေသုံ. ‘‘ကဿ နု ခေါ၊ ဘန္တေ၊ သုဘာသိတ’’န္တိ? ‘‘သဗ္ဗေသံ ဝေါ၊ ဘိက္ခဝေ၊ သုဘာသိတံ ပရိယာယေန၊ အပိ စ ယံ မယာ သန္ဓာယ ဘာသိတံ ပါရာယနေ မေတ္တေယျပဉှေ –

‘‘ယော ဥဘောန္တေ ဝိဒိတွာန၊ မဇ္ဈေ မန္တာ န လိပ္ပတိ၊

တံ ဗြူမိ မဟာပုရိသောတိ၊ သောဓ သိဗ္ဗိနိမစ္စဂါ’’တိ.

‘‘တံ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ ထေရာ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ – ‘‘ဖဿော ခေါ၊ ဘိက္ခဝေ၊ ဧကော အန္တော၊ ဖဿသမုဒယော ဒုတိယော အန္တော၊ ဖဿနိရောဓော မဇ္ဈေ၊ တဏှာ သိဗ္ဗိနီ၊ တဏှာ ဟိ နံ သိဗ္ဗတိ တဿ တဿေဝ ဘဝဿ အဘိနိဗ္ဗတ္တိယာ. ဧတ္တာဝတာ ခေါ၊ ဘိက္ခဝေ၊ ဘိက္ခု အဘိညေယျံ အဘိဇာနာတိ၊ ပရိညေယျံ ပရိဇာနာတိ၊ အဘိညေယျံ အဘိဇာနန္တော ပရိညေယျံ ပရိဇာနန္တော ဒိဋ္ဌေဝ ဓမ္မေ ဒုက္ခဿန္တကရော ဟောတီ’’တိ. သတ္တမံ.