၅. ဒါရုကမ္မိကသုတ္တံ

၅၉. ဧဝံ မေ သုတံ – ဧကံ သမယံ ဘဂဝါ နာတိကေ ဝိဟရတိ ဂိဉ္ဇကာဝသထေ. အထ ခေါ ဒါရုကမ္မိကော ဂဟပတိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ ဒါရုကမ္မိကံ ဂဟပတိံ ဘဂဝါ ဧတဒဝေါစ – ‘‘အပိ နု တေ၊ ဂဟပတိ၊ ကုလေ ဒါနံ ဒီယတီ’’တိ? ‘‘ဒီယတိ မေ၊ ဘန္တေ၊ ကုလေ ဒါနံ. တဉ္စ ခေါ ယေ တေ ဘိက္ခူ အာရညိကာ ပိဏ္ဍပါတိကာ ပံသုကူလိကာ အရဟန္တော ဝါ အရဟတ္တမဂ္ဂံ ဝါ သမာပန္နာ၊ တထာရူပေသု မေ၊ ဘန္တေ၊ ဘိက္ခူသု ဒါနံ ဒီယတီ’’တိ.

‘‘ဒုဇ္ဇာနံ ခေါ ဧတံ၊ ဂဟပတိ၊ တယာ ဂိဟိနာ ကာမဘောဂိနာ ပုတ္တသမ္ဗာဓသယနံ အဇ္ဈာဝသန္တေန၊ ကာသိကစန္ဒနံ ပစ္စနုဘောန္တေန၊ မာလာဂန္ဓဝိလေပနံ ဓာရယန္တေန၊ ဇာတရူပရဇတံ သာဒိယန္တေန ဣမေ ဝါ အရဟန္တော ဣမေ ဝါ အရဟတ္တမဂ္ဂံ သမာပန္နာတိ.

‘‘အာရညိကော စေပိ၊ ဂဟပတိ၊ ဘိက္ခု ဟောတိ ဥဒ္ဓတော ဥန္နဠော စပလော မုခရော ဝိကိဏ္ဏဝါစော မုဋ္ဌဿတိ အသမ္ပဇာနော အသမာဟိတော ဝိဗ္ဘန္တစိတ္တော ပါကတိန္ဒြိယော. ဧဝံ သော တေနင်္ဂေန ဂါရယှော. အာရညိကော စေပိ၊ ဂဟပတိ၊ ဘိက္ခု ဟောတိ အနုဒ္ဓတော အနုန္နဠော အစပလော အမုခရော အဝိကိဏ္ဏဝါစော ဥပဋ္ဌိတဿတိ သမ္ပဇာနော သမာဟိတော ဧကဂ္ဂစိတ္တော သံဝုတိန္ဒြိယော. ဧဝံ သော တေနင်္ဂေန ပါသံသော.

‘‘ဂါမန္တဝိဟာရီ စေပိ၊ ဂဟပတိ၊ ဘိက္ခု ဟောတိ ဥဒ္ဓတော။ပေ။ ဧဝံ သော တေနင်္ဂေန ဂါရယှော. ဂါမန္တဝိဟာရီ စေပိ၊ ဂဟပတိ၊ ဘိက္ခု ဟောတိ အနုဒ္ဓတော။ပေ။ ဧဝံ သော တေနင်္ဂေန ပါသံသော.

‘‘ပိဏ္ဍပါတိကော စေပိ၊ ဂဟပတိ၊ ဘိက္ခု ဟောတိ ဥဒ္ဓတော။ပေ။ ဧဝံ သော တေနင်္ဂေန ဂါရယှော. ပိဏ္ဍပါတိကော စေပိ၊ ဂဟပတိ၊ ဘိက္ခု ဟောတိ အနုဒ္ဓတော။ပေ။ ဧဝံ သော တေနင်္ဂေန ပါသံသော.

‘‘နေမန္တနိကော စေပိ၊ ဂဟပတိ၊ ဘိက္ခု ဟောတိ ဥဒ္ဓတော။ပေ။ ဧဝံ သော တေနင်္ဂေန ဂါရယှော. နေမန္တနိကော စေပိ၊ ဂဟပတိ၊ ဘိက္ခု ဟောတိ အနုဒ္ဓတော။ပေ။ ဧဝံ သော တေနင်္ဂေန ပါသံသော.

‘‘ပံသုကူလိကော စေပိ၊ ဂဟပတိ၊ ဘိက္ခု ဟောတိ ဥဒ္ဓတော။ပေ။ ဧဝံ သော တေနင်္ဂေန ဂါရယှော. ပံသုကူလိကော စေပိ၊ ဂဟပတိ၊ ဘိက္ခု ဟောတိ အနုဒ္ဓတော။ပေ။ ဧဝံ သော တေနင်္ဂေန ပါသံသော.

‘‘ဂဟပတိစီဝရဓရော စေပိ၊ ဂဟပတိ၊ ဘိက္ခု ဟောတိ ဥဒ္ဓတော ဥန္နဠော စပလော မုခရော ဝိကိဏ္ဏဝါစော မုဋ္ဌဿတိ အသမ္ပဇာနော အသမာဟိတော ဝိဗ္ဘန္တစိတ္တော ပါကတိန္ဒြိယော. ဧဝံ သော တေနင်္ဂေန ဂါရယှော. ဂဟပတိစီဝရဓရော စေပိ၊ ဂဟပတိ၊ ဘိက္ခု ဟောတိ အနုဒ္ဓတော အနုန္နဠော အစပလော အမုခရော အဝိကိဏ္ဏဝါစော ဥပဋ္ဌိတဿတိ သမ္ပဇာနော သမာဟိတော ဧကဂ္ဂစိတ္တော သံဝုတိန္ဒြိယော. ဧဝံ သော တေနင်္ဂေန ပါသံသော.

‘‘ဣင်္ဃ တွံ၊ ဂဟပတိ၊ သံဃေ ဒါနံ [ဒါနာနိ (က.)] ဒေဟိ. သံဃေ တေ ဒါနံ ဒဒတော စိတ္တံ ပသီဒိဿတိ. သော တွံ ပသန္နစိတ္တော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿသီ’’တိ. ‘‘ဧသာဟံ၊ ဘန္တေ၊ အဇ္ဇတဂ္ဂေ သံဃေ ဒါနံ ဒဿာမီ’’တိ. ပဉ္စမံ.