၈. အတ္တကာရီသုတ္တံ

၃၈. အထ ခေါ အညတရော ဗြာဟ္မဏော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတာ သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ သော ဗြာဟ္မဏော ဘဂဝန္တံ ဧတဒဝေါစ – ‘‘အဟဉှိ၊ ဘော ဂေါတမ၊ ဧဝံဝါဒီ ဧဝံဒိဋ္ဌိ – ‘နတ္ထိ အတ္တကာရော၊ နတ္ထိ ပရကာရော’’’တိ. ‘‘မာဟံ၊ ဗြာဟ္မဏ၊ ဧဝံဝါဒိံ ဧဝံဒိဋ္ဌိံ အဒ္ဒသံ ဝါ အဿောသိံ ဝါ. ကထဉှိ နာမ သယံ အဘိက္ကမန္တော၊ သယံ ပဋိက္ကမန္တော ဧဝံ ဝက္ခတိ – ‘နတ္ထိ အတ္တကာရော၊ နတ္ထိ ပရကာရော’’’တိ!

‘‘တံ ကိံ မညသိ၊ ဗြာဟ္မဏ၊ အတ္ထိ အာရဗ္ဘဓာတူ’’တိ? ‘‘ဧဝံ၊ ဘော’’. ‘‘အာရဗ္ဘဓာတုယာ သတိ အာရဗ္ဘဝန္တော သတ္တာ ပညာယန္တီ’’တိ? ‘‘ဧဝံ၊ ဘော’’. ‘‘ယံ ခေါ၊ ဗြာဟ္မဏ၊ အာရဗ္ဘဓာတုယာ သတိ အာရဗ္ဘဝန္တော သတ္တာ ပညာယန္တိ၊ အယံ သတ္တာနံ အတ္တကာရော အယံ ပရကာရော’’.

‘‘တံ ကိံ မညသိ၊ ဗြာဟ္မဏ၊ အတ္ထိ နိက္ကမဓာတု။ပေ။ အတ္ထိ ပရက္ကမဓာတု။ အတ္ထိ ထာမဓာတု။ အတ္ထိ ဌိတိဓာတု။ အတ္ထိ ဥပက္ကမဓာတူ’’တိ? ‘‘ဧဝံ၊ ဘော’’. ‘‘ဥပက္ကမဓာတုယာ သတိ ဥပက္ကမဝန္တော သတ္တာ ပညာယန္တီ’’တိ? ‘‘ဧဝံ၊ ဘော’’. ‘‘ယံ ခေါ၊ ဗြာဟ္မဏ၊ ဥပက္ကမဓာတုယာ သတိ ဥပက္ကမဝန္တော သတ္တာ ပညာယန္တိ၊ အယံ သတ္တာနံ အတ္တကာရော အယံ ပရကာရော’’.

‘‘မာဟံ၊ ဗြာဟ္မဏ [တံ ကိံ မညသိ ဗြာဟ္မဏ မာဟံ (က.)]၊ ဧဝံဝါဒိံ ဧဝံဒိဋ္ဌိံ အဒ္ဒသံ ဝါ အဿောသိံ ဝါ. ကထဉှိ နာမ သယံ အဘိက္ကမန္တော သယံ ပဋိက္ကမန္တော ဧဝံ ဝက္ခတိ – ‘နတ္ထိ အတ္တကာရော နတ္ထိ ပရကာရော’’’တိ.

‘‘အဘိက္ကန္တံ၊ ဘော ဂေါတမ။ပေ။ အဇ္ဇတဂ္ဂေ ပါဏုပေတံ သရဏံ ဂတ’’န္တိ! အဋ္ဌမံ.