၆. ဒုတိယအာဇာနီယသုတ္တံ

၆. ‘‘ဆဟိ၊ ဘိက္ခဝေ၊ အင်္ဂေဟိ သမန္နာဂတော ရညော ဘဒြော အဿာဇာနီယော ရာဇာရဟော ဟောတိ ရာဇဘောဂ္ဂေါ၊ ရညော အင်္ဂန္တွေဝ သင်္ခံ ဂစ္ဆတိ. ကတမေဟိ ဆဟိ? ဣဓ၊ ဘိက္ခဝေ၊ ရညော ဘဒြော အဿာဇာနီယော ခမော ဟောတိ ရူပါနံ၊ ခမော သဒ္ဒါနံ၊ ခမော ဂန္ဓာနံ၊ ခမော ရသာနံ၊ ခမော ဖောဋ္ဌဗ္ဗာနံ၊ ဗလသမ္ပန္နော စ ဟောတိ. ဣမေဟိ ခေါ၊ ဘိက္ခဝေ၊ ဆဟိ အင်္ဂေဟိ သမန္နာဂတော ရညော ဘဒြော အဿာဇာနီယော ရာဇာရဟော ဟောတိ ရာဇဘောဂ္ဂေါ၊ ရညော အင်္ဂန္တွေဝ သင်္ခံ ဂစ္ဆတိ.

‘‘ဧဝမေဝံ ခေါ၊ ဘိက္ခဝေ၊ ဆဟိ ဓမ္မေဟိ သမန္နာဂတော ဘိက္ခု အာဟုနေယျော။ပေ။ အနုတ္တရံ ပုညက္ခေတ္တံ လောကဿ. ကတမေဟိ ဆဟိ? ဣဓ၊ ဘိက္ခဝေ၊ ဘိက္ခု ခမော ဟောတိ ရူပါနံ ။ပေ။ ခမော ဓမ္မာနံ. ဣမေဟိ ခေါ၊ ဘိက္ခဝေ၊ ဆဟိ ဓမ္မေဟိ သမန္နာဂတော ဘိက္ခု အာဟုနေယျော ဟောတိ။ပေ။ အနုတ္တရံ ပုညက္ခေတ္တံ လောကဿာ’’တိ. ဆဋ္ဌံ.