၁. သောဏသုတ္တံ

၁၉၁. ‘‘ပဉ္စိမေ၊ ဘိက္ခဝေ၊ ပေါရာဏာ ဗြာဟ္မဏဓမ္မာ ဧတရဟိ သုနခေသု သန္ဒိဿန္တိ၊ နော ဗြာဟ္မဏေသု. ကတမေ ပဉ္စ? ပုဗ္ဗေ သုဒံ [ပုဗ္ဗဿုဒံ (က.)]၊ ဘိက္ခဝေ၊ ဗြာဟ္မဏာ ဗြာဟ္မဏိံယေဝ ဂစ္ဆန္တိ၊ နော အဗြာဟ္မဏိံ. ဧတရဟိ၊ ဘိက္ခဝေ၊ ဗြာဟ္မဏာ ဗြာဟ္မဏိမ္ပိ ဂစ္ဆန္တိ၊ အဗြာဟ္မဏိမ္ပိ ဂစ္ဆန္တိ. ဧတရဟိ၊ ဘိက္ခဝေ၊ သုနခါ သုနခိံယေဝ ဂစ္ဆန္တိ၊ နော အသုနခိံ. အယံ၊ ဘိက္ခဝေ၊ ပဌမော ပေါရာဏော ဗြာဟ္မဏဓမ္မော ဧတရဟိ သုနခေသု သန္ဒိဿတိ၊ နော ဗြာဟ္မဏေသု.

‘‘ပုဗ္ဗေ သုဒံ၊ ဘိက္ခဝေ၊ ဗြာဟ္မဏာ ဗြာဟ္မဏိံ ဥတုနိံယေဝ ဂစ္ဆန္တိ၊ နော အနုတုနိံ. ဧတရဟိ၊ ဘိက္ခဝေ၊ ဗြာဟ္မဏာ ဗြာဟ္မဏိံ ဥတုနိမ္ပိ ဂစ္ဆန္တိ၊ အနုတုနိမ္ပိ ဂစ္ဆန္တိ. ဧတရဟိ၊ ဘိက္ခဝေ၊ သုနခါ သုနခိံ ဥတုနိံယေဝ ဂစ္ဆန္တိ၊ နော အနုတုနိံ. အယံ၊ ဘိက္ခဝေ၊ ဒုတိယော ပေါရာဏော ဗြာဟ္မဏဓမ္မော ဧတရဟိ သုနခေသု သန္ဒိဿတိ၊ နော ဗြာဟ္မဏေသု.

‘‘ပုဗ္ဗေ သုဒံ၊ ဘိက္ခဝေ၊ ဗြာဟ္မဏာ ဗြာဟ္မဏိံ နေဝ ကိဏန္တိ နော ဝိက္ကိဏန္တိ၊ သမ္ပိယေနေဝ သံဝါသံ သံဗန္ဓာယ [သံသဂ္ဂတ္ထာယ (သီ. ပီ.)] သံပဝတ္တေန္တိ. ဧတရဟိ၊ ဘိက္ခဝေ၊ ဗြာဟ္မဏာ ဗြာဟ္မဏိံ ကိဏန္တိပိ ဝိက္ကိဏန္တိပိ၊ သမ္ပိယေနပိ သံဝါသံ သံဗန္ဓာယ သံပဝတ္တေန္တိ. ဧတရဟိ၊ ဘိက္ခဝေ၊ သုနခါ သုနခိံ နေဝ ကိဏန္တိ နော ဝိက္ကိဏန္တိ၊ သမ္ပိယေနေဝ သံဝါသံ သံဗန္ဓာယ သံပဝတ္တေန္တိ. အယံ၊ ဘိက္ခဝေ၊ တတိယော ပေါရာဏော ဗြာဟ္မဏဓမ္မော ဧတရဟိ သုနခေသု သန္ဒိဿတိ၊ နော ဗြာဟ္မဏေသု.

‘‘ပုဗ္ဗေ သုဒံ၊ ဘိက္ခဝေ၊ ဗြာဟ္မဏာ န သန္နိဓိံ ကရောန္တိ ဓနဿပိ ဓညဿပိ ရဇတဿပိ ဇာတရူပဿပိ. ဧတရဟိ၊ ဘိက္ခဝေ၊ ဗြာဟ္မဏာ သန္နိဓိံ ကရောန္တိ ဓနဿပိ ဓညဿပိ ရဇတဿပိ ဇာတရူပဿပိ. ဧတရဟိ၊ ဘိက္ခဝေ၊ သုနခါ န သန္နိဓိံ ကရောန္တိ ဓနဿပိ ဓညဿပိ ရဇတဿပိ ဇာတရူပဿပိ. အယံ၊ ဘိက္ခဝေ၊ စတုတ္ထော ပေါရာဏော ဗြာဟ္မဏဓမ္မော ဧတရဟိ သုနခေသု သန္ဒိဿတိ၊ နော ဗြာဟ္မဏေသု.

‘‘ပုဗ္ဗေ သုဒံ၊ ဘိက္ခဝေ၊ ဗြာဟ္မဏာ သာယံ သာယမာသာယ ပါတော ပါတရာသာယ ဘိက္ခံ ပရိယေသန္တိ. ဧတရဟိ၊ ဘိက္ခဝေ၊ ဗြာဟ္မဏာ ယာဝဒတ္ထံ ဥဒရာဝဒေဟကံ ဘုဉ္ဇိတွာ အဝသေသံ အာဒါယ ပက္ကမန္တိ. ဧတရဟိ၊ ဘိက္ခဝေ၊ သုနခါ သာယံ သာယမာသာယ ပါတော ပါတရာသာယ ဘိက္ခံ ပရိယေသန္တိ. အယံ၊ ဘိက္ခဝေ၊ ပဉ္စမော ပေါရာဏော ဗြာဟ္မဏဓမ္မော ဧတရဟိ သုနခေသု သန္ဒိဿတိ၊ နော ဗြာဟ္မဏေသု. ဣမေ ခေါ၊ ဘိက္ခဝေ၊ ပဉ္စ ပေါရာဏာ ဗြာဟ္မဏဓမ္မာ ဧတရဟိ သုနခေသု သန္ဒိဿန္တိ၊ နော ဗြာဟ္မဏေသူ’’တိ. ပဌမံ.