၆. ပီတိသုတ္တံ

၁၇၆. အထ ခေါ အနာထပိဏ္ဍိကော ဂဟပတိ ပဉ္စမတ္တေဟိ ဥပါသကသတေဟိ ပရိဝုတော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အနာထပိဏ္ဍိကံ ဂဟပတိံ ဘဂဝါ ဧတဒဝေါစ –

‘‘တုမှေ ခေါ၊ ဂဟပတိ၊ ဘိက္ခုသံဃံ ပစ္စုပဋ္ဌိတာ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေန. န ခေါ၊ ဂဟပတိ၊ တာဝတကေနေဝ တုဋ္ဌိ ကရဏီယာ – ‘မယံ ဘိက္ခုသံဃံ ပစ္စုပဋ္ဌိတာ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေနာ’တိ. တသ္မာတိဟ၊ ဂဟပတိ၊ ဧဝံ သိက္ခိတဗ္ဗံ – ‘ကိန္တိ မယံ ကာလေန ကာလံ ပဝိဝေကံ ပီတိံ ဥပသမ္ပဇ္ဇ ဝိဟရေယျာမာ’တိ! ဧဝဉှိ ဝေါ၊ ဂဟပတိ၊ သိက္ခိတဗ္ဗ’’န္တိ.

ဧဝံ ဝုတ္တေ အာယသ္မာ သာရိပုတ္တော ဘဂဝန္တံ ဧတဒဝေါစ – ‘‘အစ္ဆရိယံ၊ ဘန္တေ၊ အဗ္ဘုတံ၊ ဘန္တေ! ယာဝ သုဘာသိတံ စိဒံ၊ ဘန္တေ၊ ဘဂဝတာ – ‘တုမှေ ခေါ၊ ဂဟပတိ၊ ဘိက္ခုသံဃံ ပစ္စုပဋ္ဌိတာ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေန. န ခေါ၊ ဂဟပတိ၊ တာဝတကေနေဝ တုဋ္ဌိ ကရဏီယာ – မယံ ဘိက္ခုသံဃံ ပစ္စုပဋ္ဌိတာ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေနာတိ. တသ္မာတိဟ၊ ဂဟပတိ၊ ဧဝံ သိက္ခိတဗ္ဗံ – ကိန္တိ မယံ ကာလေန ကာလံ ပဝိဝေကံ ပီတိံ ဥပသမ္ပဇ္ဇ ဝိဟရေယျာမာတိ! ဧဝဉှိ ဝေါ၊ ဂဟပတိ၊ သိက္ခိတဗ္ဗ’န္တိ. ယသ္မိံ၊ ဘန္တေ၊ သမယေ အရိယသာဝကော ပဝိဝေကံ ပီတိံ ဥပသမ္ပဇ္ဇ ဝိဟရတိ၊ ပဉ္စဿ ဌာနာနိ တသ္မိံ သမယေ န ဟောန္တိ. ယမ္ပိဿ ကာမူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ ကာမူပသံဟိတံ သုခံ သောမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ အကုသလူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ အကုသလူပသံဟိတံ သုခံ သောမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ ကုသလူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယသ္မိံ၊ ဘန္တေ၊ သမယေ အရိယသာဝကော ပဝိဝေကံ ပီတိံ ဥပသမ္ပဇ္ဇ ဝိဟရတိ၊ ဣမာနိဿ ပဉ္စ [ဣမာနိ ပဉ္စဿ (သျာ. ကံ.)] ဌာနာနိ တသ္မိံ သမယေ န ဟောန္တီ’’တိ.

‘‘သာဓု သာဓု၊ သာရိပုတ္တ! ယသ္မိံ၊ သာရိပုတ္တ၊ သမယေ အရိယသာဝကော ပဝိဝေကံ ပီတိံ ဥပသမ္ပဇ္ဇ ဝိဟရတိ၊ ပဉ္စဿ ဌာနာနိ တသ္မိံ သမယေ န ဟောန္တိ. ယမ္ပိဿ ကာမူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ ကာမူပသံဟိတံ သုခံ သောမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ အကုသလူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ အကုသလူပသံဟိတံ သုခံ သောမနဿံ၊ တမ္ပိဿ တသ္မိံ သမယေ န ဟောတိ. ယမ္ပိဿ ကုသလူပသံဟိတံ ဒုက္ခံ ဒေါမနဿံ၊ တမ္ပိဿ တသ္မိံ သမယေ န ဟောတိ. ယသ္မိံ၊ သာရိပုတ္တ၊ သမယေ အရိယသာဝကော ပဝိဝေကံ ပီတိံ ဥပသမ္ပဇ္ဇ ဝိဟရတိ၊ ဣမာနိဿ [ဣမာနေတ္ထ (သီ.)] ပဉ္စ ဌာနာနိ တသ္မိံ သမယေ န ဟောန္တီ’’တိ. ဆဋ္ဌံ.