၅. ပဉှပုစ္ဆာသုတ္တံ

၁၆၅. တတြ ခေါ အာယသ္မာ သာရိပုတ္တော ဘိက္ခူ အာမန္တေသိ။ပေ။ ‘‘ယော ဟိ ကောစိ၊ အာဝုသော၊ ပရံ ပဉှံ ပုစ္ဆတိ၊ သဗ္ဗော သော ပဉ္စဟိ ဌာနေဟိ၊ ဧတေသံ ဝါ အညတရေန. ကတမေဟိ ပဉ္စဟိ? မန္ဒတ္တာ မောမူဟတ္တာ [မောမုဟတ္တာ (သီ.)] ပရံ ပဉှံ ပုစ္ဆတိ၊ ပါပိစ္ဆော ဣစ္ဆာပကတော ပရံ ပဉှံ ပုစ္ဆတိ၊ ပရိဘဝံ ပရံ ပဉှံ ပုစ္ဆတိ၊ အညာတုကာမော ပရံ ပဉှံ ပုစ္ဆတိ၊ အထ ဝါ ပနေဝံစိတ္တော [အထ ဝါ ပကုပ္ပန္တော (သီ. ပီ.)] ပရံ ပဉှံ ပုစ္ဆတိ – ‘သစေ မေ ပဉှံ ပုဋ္ဌော သမ္မဒေဝ ဗျာကရိဿတိ ဣစ္စေတံ ကုသလံ၊ နော စေ [နော စ (သျာ.)] မေ ပဉှံ ပုဋ္ဌော သမ္မဒေဝ ဗျာကရိဿတိ အဟမဿ သမ္မဒေဝ ဗျာကရိဿာမီ’တိ. ယော ဟိ ကောစိ၊ အာဝုသော၊ ပရံ ပဉှံ ပုစ္ဆတိ၊ သဗ္ဗော သော ဣမေဟိ ပဉ္စဟိ ဌာနေဟိ၊ ဧတေသံ ဝါ အညတရေန. အဟံ ခေါ ပနာဝုသော၊ ဧဝံစိတ္တော ပရံ ပဉှံ ပုစ္ဆာမိ – ‘သစေ မေ ပဉှံ ပုဋ္ဌော သမ္မဒေဝ ဗျာကရိဿတိ ဣစ္စေတံ ကုသလံ၊ နော စေ မေ ပဉှံ ပုဋ္ဌော သမ္မဒေဝ ဗျာကရိဿတိ၊ အဟမဿ သမ္မဒေဝ ဗျာကရိဿာမီ’’တိ. ပဉ္စမံ.