၁၀. ဘဒ္ဒဇိသုတ္တံ

၁၇၀. ဧကံ သမယံ အာယသ္မာ အာနန္ဒော ကောသမ္ဗိယံ ဝိဟရတိ ဃောသိတာရာမေ. အထ ခေါ အာယသ္မာ ဘဒ္ဒဇိ ယေနာယသ္မာ အာနန္ဒော တေနုပသင်္ကမိ၊ ဥပသင်္ကမိတွာ အာယသ္မတာ အာနန္ဒေန သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ ဘဒ္ဒဇိံ အာယသ္မာ အာနန္ဒော ဧတဒဝေါစ – ‘‘ကိံ နု ခေါ၊ အာဝုသော ဘဒ္ဒဇိ၊ ဒဿနာနံ အဂ္ဂံ၊ ကိံ သဝနာနံ အဂ္ဂံ၊ ကိံ သုခါနံ အဂ္ဂံ၊ ကိံ သညာနံ အဂ္ဂံ၊ ကိံ ဘဝါနံ အဂ္ဂ’’န္တိ?

‘‘အတ္ထာဝုသော၊ ဗြဟ္မာ အဘိဘူ အနဘိဘူတော အညဒတ္ထုဒသော ဝသဝတ္တီ၊ ယော တံ ဗြဟ္မာနံ ပဿတိ၊ ဣဒံ ဒဿနာနံ အဂ္ဂံ. အတ္ထာဝုသော၊ အာဘဿရာ နာမ ဒေဝါ သုခေန အဘိသန္နာ ပရိသန္နာ. တေ ကဒါစိ ကရဟစိ ဥဒါနံ ဥဒါနေန္တိ – ‘အဟော သုခံ၊ အဟော သုခ’န္တိ! ယော တံ သဒ္ဒံ သုဏာတိ၊ ဣဒံ သဝနာနံ အဂ္ဂံ. အတ္ထာဝုသော၊ သုဘကိဏှာ နာမ ဒေဝါ. တေ သန္တံယေဝ တုသိတာ သုခံ ပဋိဝေဒေန္တိ၊ ဣဒံ သုခါနံ အဂ္ဂံ. အတ္ထာဝုသော၊ အာကိဉ္စညာယတနူပဂါ ဒေဝါ၊ ဣဒံ သညာနံ အဂ္ဂံ. အတ္ထာဝုသော၊ နေဝသညာနာသညာယတနူပဂါ ဒေဝါ၊ ဣဒံ ဘဝါနံ အဂ္ဂ’’န္တိ. ‘‘သမေတိ ခေါ ဣဒံ အာယသ္မတော ဘဒ္ဒဇိဿ၊ ယဒိဒံ ဗဟုနာ ဇနေနာ’’တိ?

‘‘အာယသ္မာ ခေါ၊ အာနန္ဒော၊ ဗဟုဿုတော. ပဋိဘာတု အာယသ္မန္တံယေဝ အာနန္ဒ’’န္တိ. ‘‘တေနဟာဝုသော ဘဒ္ဒဇိ၊ သုဏာဟိ၊ သာဓုကံ မနသိ ကရောဟိ၊ ဘာသိဿာမီ’’တိ. ‘‘ဧဝမာဝုသော’’တိ ခေါ အာယသ္မာ ဘဒ္ဒဇိ အာယသ္မတော အာနန္ဒဿ ပစ္စဿောသိ. အာယသ္မာ အာနန္ဒော ဧတဒဝေါစ –

‘‘ယထာ ပဿတော ခေါ၊ အာဝုသော၊ အနန္တရာ အာသဝါနံ ခယော ဟောတိ၊ ဣဒံ ဒဿနာနံ အဂ္ဂံ. ယထာ သုဏတော အနန္တရာ အာသဝါနံ ခယော ဟောတိ၊ ဣဒံ သဝနာနံ အဂ္ဂံ. ယထာ သုခိတဿ အနန္တရာ အာသဝါနံ ခယော ဟောတိ၊ ဣဒံ သုခါနံ အဂ္ဂံ. ယထာ သညိဿ အနန္တရာ အာသဝါနံ ခယော ဟောတိ၊ ဣဒံ သညာနံ အဂ္ဂံ. ယထာ ဘူတဿ အနန္တရာ အာသဝါနံ ခယော ဟောတိ၊ ဣဒံ ဘဝါနံ အဂ္ဂ’’န္တိ. ဒသမံ.

အာဃာတဝဂ္ဂေါ ဒုတိယော.