၈. သာရဇ္ဇသုတ္တံ

၁၅၈. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု သာရဇ္ဇံ ဩက္ကန္တော [ဩက္ကမန္တော (က.)] ဟောတိ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု အဿဒ္ဓေါ ဟောတိ၊ ဒုဿီလော ဟောတိ၊ အပ္ပဿုတော ဟောတိ၊ ကုသီတော ဟောတိ၊ ဒုပညော ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ၊ ဓမ္မေဟိ သမန္နာဂတော ဘိက္ခု သာရဇ္ဇံ ဩက္ကန္တော ဟောတိ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဝိသာရဒေါ ဟောတိ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု သဒ္ဓေါ ဟောတိ၊ သီလဝါ ဟောတိ၊ ဗဟုဿုတော ဟောတိ၊ အာရဒ္ဓဝီရိယော ဟောတိ၊ ပညဝါ ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု ဝိသာရဒေါ ဟောတီ’’တိ. အဋ္ဌမံ.