၃. ကုဟကသုတ္တံ

၈၃. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ထေရော ဘိက္ခု သဗြဟ္မစာရီနံ အပ္ပိယော စ ဟောတိ အမနာပေါ စ အဂရု စ အဘာဝနီယော စ. ကတမေဟိ ပဉ္စဟိ? ကုဟကော စ ဟောတိ၊ လပကော စ၊ နေမိတ္တိကော [နိမိတ္တိကော (သျာ. ကံ.)၊ နိမိတ္တကော (က.)] စ၊ နိပ္ပေသိကော စ၊ လာဘေန စ လာဘံ နိဇိဂီသိတာ [နိဇိဂိံသိတာ (သီ. သျာ. ကံ. ပီ.)] – ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ထေရော ဘိက္ခု သဗြဟ္မစာရီနံ အပ္ပိယော စ ဟောတိ အမနာပေါ စ အဂရု စ အဘာဝနီယော စ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ထေရော ဘိက္ခု သဗြဟ္မစာရီနံ ပိယော စ ဟောတိ မနာပေါ စ ဂရု စ ဘာဝနီယော စ. ကတမေဟိ ပဉ္စဟိ? န စ ကုဟကော ဟောတိ၊ န စ လပကော၊ န စ နေမိတ္တိကော၊ န စ နိပ္ပေသိကော၊ န စ လာဘေန လာဘံ နိဇိဂီသိတာ – ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ထေရော ဘိက္ခု သဗြဟ္မစာရီနံ ပိယော စ ဟောတိ မနာပေါ စ ဂရု စ ဘာဝနီယော စာ’’တိ. တတိယံ.