၃. ပဌမဓမ္မဝိဟာရီသုတ္တံ

၇၃. အထ ခေါ အညတရော ဘိက္ခု ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ – ‘‘‘ဓမ္မဝိဟာရီ၊ ဓမ္မဝိဟာရီ’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ ဘိက္ခု ဓမ္မဝိဟာရီ ဟောတီ’’တိ?

‘‘ဣဓ၊ ဘိက္ခု၊ ဘိက္ခု ဓမ္မံ ပရိယာပုဏာတိ – သုတ္တံ၊ ဂေယျံ၊ ဝေယျာကရဏံ၊ ဂါထံ၊ ဥဒါနံ၊ ဣတိဝုတ္တကံ၊ ဇာတကံ၊ အဗ္ဘုတဓမ္မံ၊ ဝေဒလ္လံ. သော တာယ ဓမ္မပရိယတ္တိယာ ဒိဝသံ အတိနာမေတိ၊ ရိဉ္စတိ ပဋိသလ္လာနံ၊ နာနုယုဉ္ဇတိ အဇ္ဈတ္တံ စေတောသမထံ. အယံ ဝုစ္စတိ၊ ဘိက္ခု – ‘ဘိက္ခု ပရိယတ္တိဗဟုလော၊ နော ဓမ္မဝိဟာရီ’’’.

‘‘ပုန စပရံ၊ ဘိက္ခု၊ ဘိက္ခု ယထာသုတံ ယထာပရိယတ္တံ ဓမ္မံ ဝိတ္ထာရေန ပရေသံ ဒေသေတိ. သော တာယ ဓမ္မပညတ္တိယာ ဒိဝသံ အတိနာမေတိ၊ ရိဉ္စတိ ပဋိသလ္လာနံ၊ နာနုယုဉ္ဇတိ အဇ္ဈတ္တံ စေတောသမထံ. အယံ ဝုစ္စတိ၊ ဘိက္ခု – ‘ဘိက္ခု ပညတ္တိဗဟုလော၊ နော ဓမ္မဝိဟာရီ’’’.

‘‘ပုန စပရံ၊ ဘိက္ခု၊ ဘိက္ခု ယထာသုတံ ယထာပရိယတ္တံ ဓမ္မံ ဝိတ္ထာရေန သဇ္ဈာယံ ကရောတိ. သော တေန သဇ္ဈာယေန ဒိဝသံ အတိနာမေတိ၊ ရိဉ္စတိ ပဋိသလ္လာနံ၊ နာနုယုဉ္ဇတိ အဇ္ဈတ္တံ စေတောသမထံ. အယံ ဝုစ္စတိ၊ ဘိက္ခု – ‘ဘိက္ခု သဇ္ဈာယဗဟုလော၊ နော ဓမ္မဝိဟာရီ’’’.

‘‘ပုန စပရံ၊ ဘိက္ခု၊ ဘိက္ခု ယထာသုတံ ယထာပရိယတ္တံ ဓမ္မံ စေတသာ အနုဝိတက္ကေတိ အနုဝိစာရေတိ မနသာနုပေက္ခတိ. သော တေဟိ ဓမ္မဝိတက္ကေဟိ ဒိဝသံ အတိနာမေတိ၊ ရိဉ္စတိ ပဋိသလ္လာနံ၊ နာနုယုဉ္ဇတိ အဇ္ဈတ္တံ စေတောသမထံ. အယံ ဝုစ္စတိ၊ ဘိက္ခု – ‘ဘိက္ခု ဝိတက္ကဗဟုလော၊ နော ဓမ္မဝိဟာရီ’’’.

‘‘ဣဓ၊ ဘိက္ခု၊ ဘိက္ခု ဓမ္မံ ပရိယာပုဏာတိ – သုတ္တံ၊ ဂေယျံ၊ ဝေယျာကရဏံ၊ ဂါထံ၊ ဥဒါနံ၊ ဣတိဝုတ္တကံ၊ ဇာတကံ၊ အဗ္ဘုတဓမ္မံ၊ ဝေဒလ္လံ. သော တာယ ဓမ္မပရိယတ္တိယာ န ဒိဝသံ အတိနာမေတိ၊ နာပိ ရိဉ္စတိ ပဋိသလ္လာနံ၊ အနုယုဉ္ဇတိ အဇ္ဈတ္တံ စေတောသမထံ. ဧဝံ ခေါ၊ ဘိက္ခု၊ ဘိက္ခု ဓမ္မဝိဟာရီ ဟောတိ.

‘‘ဣတိ ခေါ၊ ဘိက္ခု၊ ဒေသိတော မယာ ပရိယတ္တိဗဟုလော၊ ဒေသိတော ပညတ္တိဗဟုလော၊ ဒေသိတော သဇ္ဈာယဗဟုလော၊ ဒေသိတော ဝိတက္ကဗဟုလော၊ ဒေသိတော ဓမ္မဝိဟာရီ. ယံ ခေါ၊ ဘိက္ခု [ယံ ဘိက္ခု (သျာ. ကံ. ပီ.)]၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ၊ ကတံ ဝေါ တံ မယာ. ဧတာနိ၊ ဘိက္ခု၊ ရုက္ခမူလာနိ၊ ဧတာနိ သုညာဂါရာနိ. ဈာယထ၊ ဘိက္ခု၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. တတိယံ.