၁၀. စတုတ္ထအနာဂတဘယသုတ္တံ

၈၀. ‘‘ပဉ္စိမာနိ၊ ဘိက္ခဝေ၊ အနာဂတဘယာနိ ဧတရဟိ အသမုပ္ပန္နာနိ အာယတိံ သမုပ္ပဇ္ဇိဿန္တိ. တာနိ ဝေါ ပဋိဗုဇ္ဈိတဗ္ဗာနိ၊ ပဋိဗုဇ္ဈိတွာ စ တေသံ ပဟာနာယ ဝါယမိတဗ္ဗံ.

‘‘ကတမာနိ ပဉ္စ? ဘဝိဿန္တိ၊ ဘိက္ခဝေ၊ ဘိက္ခူ အနာဂတမဒ္ဓါနံ စီဝရေ ကလျာဏကာမာ. တေ စီဝရေ ကလျာဏကာမာ သမာနာ ရိဉ္စိဿန္တိ ပံသုကူလိကတ္တံ၊ ရိဉ္စိဿန္တိ အရညဝနပတ္ထာနိ ပန္တာနိ သေနာသနာနိ၊ ဂါမနိဂမရာဇဓာနီသု ဩသရိတွာ ဝါသံ ကပ္ပေဿန္တိ၊ စီဝရဟေတု စ အနေကဝိဟိတံ အနေသနံ အပ္ပတိရူပံ အာပဇ္ဇိဿန္တိ. ဣဒံ၊ ဘိက္ခဝေ၊ ပဌမံ အနာဂတဘယံ ဧတရဟိ အသမုပ္ပန္နံ အာယတိံ သမုပ္ပဇ္ဇိဿတိ. တံ ဝေါ ပဋိဗုဇ္ဈိတဗ္ဗံ၊ ပဋိဗုဇ္ဈိတွာ စ တဿ ပဟာနာယ ဝါယမိတဗ္ဗံ.

‘‘ပုန စပရံ၊ ဘိက္ခဝေ၊ ဘဝိဿန္တိ ဘိက္ခူ အနာဂတမဒ္ဓါနံ ပိဏ္ဍပါတေ ကလျာဏကာမာ. တေ ပိဏ္ဍပါတေ ကလျာဏကာမာ သမာနာ ရိဉ္စိဿန္တိ ပိဏ္ဍပါတိကတ္တံ၊ ရိဉ္စိဿန္တိ အရညဝနပတ္ထာနိ ပန္တာနိ သေနာသနာနိ၊ ဂါမနိဂမရာဇဓာနီသု ဩသရိတွာ ဝါသံ ကပ္ပေဿန္တိ ဇိဝှဂ္ဂေန ရသဂ္ဂါနိ ပရိယေသမာနာ၊ ပိဏ္ဍပါတဟေတု စ အနေကဝိဟိတံ အနေသနံ အပ္ပတိရူပံ အာပဇ္ဇိဿန္တိ. ဣဒံ၊ ဘိက္ခဝေ၊ ဒုတိယံ အနာဂတဘယံ ဧတရဟိ အသမုပ္ပန္နံ အာယတိံ သမုပ္ပဇ္ဇိဿတိ. တံ ဝေါ ပဋိဗုဇ္ဈိတဗ္ဗံ၊ ပဋိဗုဇ္ဈိတွာ စ တဿ ပဟာနာယ ဝါယမိတဗ္ဗံ.

‘‘ပုန စပရံ၊ ဘိက္ခဝေ၊ ဘဝိဿန္တိ ဘိက္ခူ အနာဂတမဒ္ဓါနံ သေနာသနေ ကလျာဏကာမာ. တေ သေနာသနေ ကလျာဏကာမာ သမာနာ ရိဉ္စိဿန္တိ ရုက္ခမူလိကတ္တံ [အာရညကတ္တံ (သျာ. ကံ.)]၊ ရိဉ္စိဿန္တိ အရညဝနပတ္ထာနိ ပန္တာနိ သေနာသနာနိ၊ ဂါမနိဂမရာဇဓာနီသု ဩသရိတွာ ဝါသံ ကပ္ပေဿန္တိ၊ သေနာသနဟေတု စ အနေကဝိဟိတံ အနေသနံ အပ္ပတိရူပံ အာပဇ္ဇိဿန္တိ. ဣဒံ၊ ဘိက္ခဝေ၊ တတိယံ အနာဂတဘယံ ဧတရဟိ အသမုပ္ပန္နံ အာယတိံ သမုပ္ပဇ္ဇိဿတိ. တံ ဝေါ ပဋိဗုဇ္ဈိတဗ္ဗံ၊ ပဋိဗုဇ္ဈိတွာ စ တဿ ပဟာနာယ ဝါယမိတဗ္ဗံ.

‘‘ပုန စပရံ၊ ဘိက္ခဝေ၊ ဘဝိဿန္တိ ဘိက္ခူ အနာဂတမဒ္ဓါနံ ဘိက္ခုနီသိက္ခမာနာသမဏုဒ္ဒေသေဟိ သံသဋ္ဌာ ဝိဟရိဿန္တိ. ဘိက္ခုနီသိက္ခမာနာသမဏုဒ္ဒေသေဟိ သံသဂ္ဂေ ခေါ ပန၊ ဘိက္ခဝေ၊ သတိ ဧတံ ပါဋိကင်္ခံ – ‘အနဘိရတာ ဝါ ဗြဟ္မစရိယံ စရိဿန္တိ၊ အညတရံ ဝါ သံကိလိဋ္ဌံ အာပတ္တိံ အာပဇ္ဇိဿန္တိ၊ သိက္ခံ ဝါ ပစ္စက္ခာယ ဟီနာယာဝတ္တိဿန္တိ’. ဣဒံ၊ ဘိက္ခဝေ၊ စတုတ္ထံ အနာဂတဘယံ ဧတရဟိ အသမုပ္ပန္နံ အာယတိံ သမုပ္ပဇ္ဇိဿတိ. တံ ဝေါ ပဋိဗုဇ္ဈိတဗ္ဗံ၊ ပဋိဗုဇ္ဈိတွာ စ တဿ ပဟာနာယ ဝါယမိတဗ္ဗံ.

‘‘ပုန စပရံ၊ ဘိက္ခဝေ၊ ဘဝိဿန္တိ ဘိက္ခူ အနာဂတမဒ္ဓါနံ အာရာမိကသမဏုဒ္ဒေသေဟိ သံသဋ္ဌာ ဝိဟရိဿန္တိ. အာရာမိကသမဏုဒ္ဒေသေဟိ သံသဂ္ဂေ ခေါ ပန၊ ဘိက္ခဝေ၊ သတိ ဧတံ ပါဋိကင်္ခံ – ‘အနေကဝိဟိတံ သန္နိဓိကာရပရိဘောဂံ အနုယုတ္တာ ဝိဟရိဿန္တိ၊ ဩဠာရိကမ္ပိ နိမိတ္တံ ကရိဿန္တိ၊ ပထဝိယာပိ ဟရိတဂ္ဂေပိ’. ဣဒံ၊ ဘိက္ခဝေ၊ ပဉ္စမံ အနာဂတဘယံ ဧတရဟိ အသမုပ္ပန္နံ အာယတိံ သမုပ္ပဇ္ဇိဿတိ. တံ ဝေါ ပဋိဗုဇ္ဈိတဗ္ဗံ၊ ပဋိဗုဇ္ဈိတွာ စ တဿ ပဟာနာယ ဝါယမိတဗ္ဗံ.

‘‘ဣမာနိ ခေါ၊ ဘိက္ခဝေ၊ ပဉ္စ အနာဂတဘယာနိ ဧတရဟိ အသမုပ္ပန္နာနိ အာယတိံ သမုပ္ပဇ္ဇိဿန္တိ. တာနိ ဝေါ ပဋိဗုဇ္ဈိတဗ္ဗာနိ၊ ပဋိဗုဇ္ဈိတွာ စ တေသံ ပဟာနာယ ဝါယမိတဗ္ဗ’’န္တိ. ဒသမံ.

ယောဓာဇီဝဝဂ္ဂေါ တတိယော.