၉. ဘောဇနသုတ္တံ

၃၇. ‘‘ဘောဇနံ၊ ဘိက္ခဝေ၊ ဒဒမာနော ဒါယကော ပဋိဂ္ဂါဟကာနံ ပဉ္စ ဌာနာနိ ဒေတိ. ကတမာနိ ပဉ္စ? အာယုံ ဒေတိ၊ ဝဏ္ဏံ ဒေတိ၊ သုခံ ဒေတိ၊ ဗလံ ဒေတိ၊ ပဋိဘာနံ [ပဋိဘာဏံ (သီ.)] ဒေတိ. အာယုံ ခေါ ပန ဒတွာ အာယုဿ ဘာဂီ ဟောတိ ဒိဗ္ဗဿ ဝါ မာနုသဿ ဝါ၊ ဝဏ္ဏံ ဒတွာ ဝဏ္ဏဿ ဘာဂီ ဟောတိ ဒိဗ္ဗဿ ဝါ မာနုသဿ ဝါ၊ သုခံ ဒတွာ သုခဿ ဘာဂီ ဟောတိ ဒိဗ္ဗဿ ဝါ မာနုသဿ ဝါ၊ ဗလံ ဒတွာ ဗလဿ ဘာဂီ ဟောတိ ဒိဗ္ဗဿ ဝါ မာနုသဿ ဝါ၊ ပဋိဘာနံ ဒတွာ ပဋိဘာနဿ ဘာဂီ ဟောတိ ဒိဗ္ဗဿ ဝါ မာနုသဿ ဝါ. ဘောဇနံ၊ ဘိက္ခဝေ၊ ဒဒမာနော ဒါယကော ပဋိဂ္ဂါဟကာနံ ဣမာနိ ပဉ္စ ဌာနာနိ ဒေတီ’’တိ.

‘‘အာယုဒေါ ဗလဒေါ ဓီရော၊ ဝဏ္ဏဒေါ ပဋိဘာနဒေါ၊

သုခဿ ဒါတာ မေဓာဝီ၊ သုခံ သော အဓိဂစ္ဆတိ.

‘‘အာယုံ ဒတွာ ဗလံ ဝဏ္ဏံ၊ သုခဉ္စ ပဋိဘာနကံ [ပဋိဘာဏကံ (သီ.)၊ ပဋိဘာနဒေါ (သျာ. ကံ. ပီ. က.)]၊

ဒီဃာယု ယသဝါ ဟောတိ၊ ယတ္ထ ယတ္ထူပပဇ္ဇတီ’’တိ. သတ္တမံ၊