၅. ဒါနာနိသံသသုတ္တံ

၃၅. ‘‘ပဉ္စိမေ၊ ဘိက္ခဝေ၊ ဒါနေ အာနိသံသာ. ကတမေ ပဉ္စ? ဗဟုနော ဇနဿ ပိယော ဟောတိ မနာပေါ၊ သန္တော သပ္ပုရိသာ ဘဇန္တိ၊ ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ၊ ဂိဟိဓမ္မာ အနပဂတော [ဂိဟိဓမ္မာ အနပေတော (သီ. ပီ.)၊ ဂိဟိဓမ္မမနုပဂတော (က.)] ဟောတိ၊ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ. ဣမေ ခေါ၊ ဘိက္ခဝေ၊ ပဉ္စ ဒါနေ အာနိသံသာ’’တိ.

‘‘ဒဒမာနော ပိယော ဟောတိ၊ သတံ ဓမ္မံ အနုက္ကမံ၊

သန္တော နံ သဒါ ဘဇန္တိ [သန္တော ဘဇန္တိ သပ္ပုရိသာ (သီ.)]၊ သညတာ ဗြဟ္မစာရယော.

‘‘တေ တဿ ဓမ္မံ ဒေသေန္တိ၊ သဗ္ဗဒုက္ခာပနူဒနံ၊

ယံ သော ဓမ္မံ ဣဓညာယ၊ ပရိနိဗ္ဗာတိ အနာသဝေါ’’တိ. ပဉ္စမံ၊