၁. သေခဗလဝဂ္ဂေါ

၁. သံခိတ္တသုတ္တံ

၁. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တတြ ခေါ ဘဂဝါ ဘိက္ခူ အာမန္တေသိ – ‘‘ဘိက္ခဝေါ’’တိ. ‘‘ဘဒန္တေ’’တိ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘ပဉ္စိမာနိ၊ ဘိက္ခဝေ၊ သေခဗလာနိ [သေက္ခဗလာနိ (က.)]. ကတမာနိ ပဉ္စ? သဒ္ဓါဗလံ၊ ဟိရီဗလံ [ဟိရိဗလံ (သီ. ပီ.)]၊ ဩတ္တပ္ပဗလံ၊ ဝီရိယဗလံ [ဝိရိယဗလံ (သီ. သျာ. ကံ. ပီ.)]၊ ပညာဗလံ – ဣမာနိ ခေါ၊ ဘိက္ခဝေ၊ ပဉ္စ သေခဗလာနိ.

‘‘တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘သဒ္ဓါဗလေန သမန္နာဂတာ ဘဝိဿာမ သေခဗလေန၊ ဟိရီဗလေန သမန္နာဂတာ ဘဝိဿာမ သေခဗလေန၊ ဩတ္တပ္ပဗလေန သမန္နာဂတာ ဘဝိဿာမ သေခဗလေန၊ ဝီရိယဗလေန သမန္နာဂတာ ဘဝိဿာမ သေခဗလေန၊ ပညာဗလေန သမန္နာဂတာ ဘဝိဿာမ သေခဗလေနာ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ဣဒမဝေါစ ဘဂဝါ. အတ္တမနာ တေ ဘိက္ခူ ဘဂဝတော ဘာသိတံ အဘိနန္ဒုန္တိ. ပဌမံ.

၂. ဝိတ္ထတသုတ္တံ

၂. ‘‘ပဉ္စိမာနိ၊ ဘိက္ခဝေ၊ သေခဗလာနိ. ကတမာနိ ပဉ္စ? သဒ္ဓါဗလံ၊ ဟိရီဗလံ၊ ဩတ္တပ္ပဗလံ၊ ဝီရိယဗလံ၊ ပညာဗလံ. ကတမဉ္စ၊ ဘိက္ခဝေ၊ သဒ္ဓါဗလံ? ဣဓ၊ ဘိက္ခဝေ၊ အရိယသာဝကော သဒ္ဓေါ ဟောတိ၊ သဒ္ဒဟတိ တထာဂတဿ ဗောဓိံ – ‘ဣတိပိ သော ဘဂဝါ အရဟံ သမ္မာသမ္ဗုဒ္ဓေါ ဝိဇ္ဇာစရဏသမ္ပန္နော သုဂတော လောကဝိဒူ အနုတ္တရော ပုရိသဒမ္မသာရထိ သတ္ထာ ဒေဝမနုဿာနံ ဗုဒ္ဓေါ ဘဂဝါ’တိ. ဣဒံ ဝုစ္စတိ၊ ဘိက္ခဝေ၊ သဒ္ဓါဗလံ.

‘‘ကတမဉ္စ၊ ဘိက္ခဝေ၊ ဟိရီဗလံ? ဣဓ၊ ဘိက္ခဝေ၊ အရိယသာဝကော ဟိရိမာ ဟောတိ၊ ဟိရီယတိ ကာယဒုစ္စရိတေန ဝစီဒုစ္စရိတေန မနောဒုစ္စရိတေန၊ ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ. ဣဒံ ဝုစ္စတိ၊ ဘိက္ခဝေ၊ ဟိရီဗလံ.

‘‘ကတမဉ္စ၊ ဘိက္ခဝေ၊ ဩတ္တပ္ပဗလံ? ဣဓ၊ ဘိက္ခဝေ၊ အရိယသာဝကော ဩတ္တပ္ပီ ဟောတိ၊ ဩတ္တပ္ပတိ ကာယဒုစ္စရိတေန ဝစီဒုစ္စရိတေန မနောဒုစ္စရိတေန၊ ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ. ဣဒံ ဝုစ္စတိ၊ ဘိက္ခဝေ၊ ဩတ္တပ္ပဗလံ.

‘‘ကတမဉ္စ၊ ဘိက္ခဝေ၊ ဝီရိယဗလံ? ဣဓ၊ ဘိက္ခဝေ၊ အရိယသာဝကော အာရဒ္ဓဝီရိယော ဝိဟရတိ အကုသလာနံ ဓမ္မာနံ ပဟာနာယ၊ ကုသလာနံ ဓမ္မာနံ ဥပသမ္ပဒါယ၊ ထာမဝါ ဒဠှပရက္ကမော အနိက္ခိတ္တဓုရော ကုသလေသု ဓမ္မေသု. ဣဒံ ဝုစ္စတိ၊ ဘိက္ခဝေ၊ ဝီရိယဗလံ.

‘‘ကတမဉ္စ၊ ဘိက္ခဝေ၊ ပညာဗလံ? ဣဓ၊ ဘိက္ခဝေ၊ အရိယသာဝကော ပညဝါ ဟောတိ ဥဒယတ္ထဂါမိနိယာ ပညာယ သမန္နာဂတော အရိယာယ နိဗ္ဗေဓိကာယ သမ္မာ ဒုက္ခက္ခယဂါမိနိယာ. ဣဒံ ဝုစ္စတိ၊ ဘိက္ခဝေ၊ ပညာဗလံ. ဣမာနိ ခေါ၊ ဘိက္ခဝေ၊ ပဉ္စ သေခဗလာနိ.

‘‘တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘သဒ္ဓါဗလေန သမန္နာဂတာ ဘဝိဿာမ သေခဗလေန၊ ဟိရီဗလေန။ ဩတ္တပ္ပဗလေန ။ ဝီရိယဗလေန။ ပညာဗလေန သမန္နာဂတာ ဘဝိဿာမ သေခဗလေနာ’တိ. ဧဝဉှိ ခေါ၊ ဘိက္ခဝေ၊ သိက္ခိတဗ္ဗ’’န္တိ. ဒုတိယံ.

၃. ဒုက္ခသုတ္တံ

၃. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ ဒုက္ခံ ဝိဟရတိ သဝိဃာတံ သဥပါယာသံ သပရိဠာဟံ၊ ကာယဿ စ ဘေဒါ ပရံ မရဏာ ဒုဂ္ဂတိ ပါဋိကင်္ခါ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု အဿဒ္ဓေါ ဟောတိ၊ အဟိရိကော ဟောတိ၊ အနောတ္တပ္ပီ ဟောတိ၊ ကုသီတော ဟောတိ၊ ဒုပ္ပညော ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ ဒုက္ခံ ဝိဟရတိ သဝိဃာတံ သဥပါယာသံ သပရိဠာဟံ၊ ကာယဿ စ ဘေဒါ ပရံ မရဏာ ဒုဂ္ဂတိ ပါဋိကင်္ခါ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခံ ဝိဟရတိ အဝိဃာတံ အနုပါယာသံ အပရိဠာဟံ၊ ကာယဿ စ ဘေဒါ ပရံ မရဏာ သုဂတိ ပါဋိကင်္ခါ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု သဒ္ဓေါ ဟောတိ၊ ဟိရီမာ ဟောတိ၊ ဩတ္တပ္ပီ ဟောတိ၊ အာရဒ္ဓဝီရိယော ဟောတိ၊ ပညဝါ ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခံ ဝိဟရတိ အဝိဃာတံ အနုပါယာသံ အပရိဠာဟံ၊ ကာယဿ စ ဘေဒါ ပရံ မရဏာ သုဂတိ ပါဋိကင်္ခါ’’တိ. တတိယံ.

၄. ယထာဘတသုတ္တံ

၄. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ယထာဘတံ နိက္ခိတ္တော ဧဝံ နိရယေ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု အဿဒ္ဓေါ ဟောတိ၊ အဟိရိကော ဟောတိ၊ အနောတ္တပ္ပီ ဟောတိ၊ ကုသီတော ဟောတိ၊ ဒုပ္ပညော ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု ယထာဘတံ နိက္ခိတ္တော ဧဝံ နိရယေ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ယထာဘတံ နိက္ခိတ္တော ဧဝံ သဂ္ဂေ. ကတမေဟိ ပဉ္စဟိ? ဣဓ၊ ဘိက္ခဝေ၊ ဘိက္ခု သဒ္ဓေါ ဟောတိ၊ ဟိရီမာ ဟောတိ၊ ဩတ္တပ္ပီ ဟောတိ၊ အာရဒ္ဓဝီရိယော ဟောတိ၊ ပညဝါ ဟောတိ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု ယထာဘတံ နိက္ခိတ္တော ဧဝံ သဂ္ဂေ’’တိ. စတုတ္ထံ.

၅. သိက္ခာသုတ္တံ

၅. ‘‘ယော ဟိ ကောစိ၊ ဘိက္ခဝေ၊ ဘိက္ခု ဝါ ဘိက္ခုနီ ဝါ သိက္ခံ ပစ္စက္ခာယ ဟီနာယာဝတ္တတိ၊ တဿ ဒိဋ္ဌေဝ [ဒိဋ္ဌေ စေဝ (သီ.)] ဓမ္မေ ပဉ္စ သဟဓမ္မိကာ ဝါဒါနုပါတာ [ဝါဒါနုဝါဒါ (အ. နိ. ၈.၁၂၊ အ. နိ. ၃.၅၈)] ဂါရယှာ ဌာနာ အာဂစ္ဆန္တိ. ကတမေ ပဉ္စ? သဒ္ဓါပိ နာမ တေ နာဟောသိ ကုသလေသု ဓမ္မေသု၊ ဟိရီပိ နာမ တေ နာဟောသိ ကုသလေသု ဓမ္မေသု၊ ဩတ္တပ္ပမ္ပိ နာမ တေ နာဟောသိ ကုသလေသု ဓမ္မေသု၊ ဝီရိယမ္ပိ နာမ တေ နာဟောသိ ကုသလေသု ဓမ္မေသု၊ ပညာပိ နာမ တေ နာဟောသိ ကုသလေသု ဓမ္မေသု. ယော ဟိ ကောစိ၊ ဘိက္ခဝေ၊ ဘိက္ခု ဝါ ဘိက္ခုနီ ဝါ သိက္ခံ ပစ္စက္ခာယ ဟီနာယာဝတ္တတိ၊ တဿ ဒိဋ္ဌေဝ ဓမ္မေ ဣမေ ပဉ္စ သဟဓမ္မိကာ ဝါဒါနုပါတာ ဂါရယှာ ဌာနာ အာဂစ္ဆန္တိ.

‘‘ယော ဟိ ကောစိ၊ ဘိက္ခဝေ၊ ဘိက္ခု ဝါ ဘိက္ခုနီ ဝါ သဟာပိ ဒုက္ခေန သဟာပိ ဒေါမနဿေန အဿုမုခေါ [အဿုမုခေါပိ (သျာ.)] ရုဒမာနော ပရိပုဏ္ဏံ ပရိသုဒ္ဓံ ဗြဟ္မစရိယံ စရတိ၊ တဿ ဒိဋ္ဌေဝ ဓမ္မေ ပဉ္စ သဟဓမ္မိကာ ပါသံသာ ဌာနာ [ပါသံသံ ဌာနံ (သျာ.)] အာဂစ္ဆန္တိ. ကတမေ ပဉ္စ? သဒ္ဓါပိ နာမ တေ အဟောသိ ကုသလေသု ဓမ္မေသု၊ ဟိရီပိ နာမ တေ အဟောသိ ကုသလေသု ဓမ္မေသု၊ ဩတ္တပ္ပမ္ပိ နာမ တေ အဟောသိ ကုသလေသု ဓမ္မေသု၊ ဝီရိယမ္ပိ နာမ တေ အဟောသိ ကုသလေသု ဓမ္မေသု၊ ပညာပိ နာမ တေ အဟောသိ ကုသလေသု ဓမ္မေသု. ယော ဟိ ကောစိ၊ ဘိက္ခဝေ၊ ဘိက္ခု ဝါ ဘိက္ခုနီ ဝါ သဟာပိ ဒုက္ခေန သဟာပိ ဒေါမနဿေန အဿုမုခေါ ရုဒမာနော ပရိပုဏ္ဏံ ပရိသုဒ္ဓံ ဗြဟ္မစရိယံ စရတိ၊ တဿ ဒိဋ္ဌေဝ ဓမ္မေ ဣမေ ပဉ္စ သဟဓမ္မိကာ ပါသံသာ ဌာနာ အာဂစ္ဆန္တီ’’တိ. ပဉ္စမံ.

၆. သမာပတ္တိသုတ္တံ

၆. ‘‘န တာဝ၊ ဘိက္ခဝေ၊ အကုသလဿ သမာပတ္တိ ဟောတိ ယာဝ သဒ္ဓါ ပစ္စုပဋ္ဌိတာ ဟောတိ ကုသလေသု ဓမ္မေသု. ယတော စ ခေါ၊ ဘိက္ခဝေ၊ သဒ္ဓါ အန္တရဟိတာ ဟောတိ၊ အသဒ္ဓိယံ ပရိယုဋ္ဌာယ တိဋ္ဌတိ၊ အထ အကုသလဿ သမာပတ္တိ ဟောတိ.

‘‘န တာဝ၊ ဘိက္ခဝေ၊ အကုသလဿ သမာပတ္တိ ဟောတိ ယာဝ ဟိရီ ပစ္စုပဋ္ဌိတာ ဟောတိ ကုသလေသု ဓမ္မေသု. ယတော စ ခေါ၊ ဘိက္ခဝေ၊ ဟိရီ အန္တရဟိတာ ဟောတိ၊ အဟိရိကံ ပရိယုဋ္ဌာယ တိဋ္ဌတိ၊ အထ အကုသလဿ သမာပတ္တိ ဟောတိ.

‘‘န တာဝ၊ ဘိက္ခဝေ၊ အကုသလဿ သမာပတ္တိ ဟောတိ ယာဝ ဩတ္တပ္ပံ ပစ္စုပဋ္ဌိတံ ဟောတိ ကုသလေသု ဓမ္မေသု. ယတော စ ခေါ၊ ဘိက္ခဝေ၊ ဩတ္တပ္ပံ အန္တရဟိတံ ဟောတိ၊ အနောတ္တပ္ပံ ပရိယုဋ္ဌာယ တိဋ္ဌတိ၊ အထ အကုသလဿ သမာပတ္တိ ဟောတိ.

‘‘န တာဝ၊ ဘိက္ခဝေ၊ အကုသလဿ သမာပတ္တိ ဟောတိ ယာဝ ဝီရိယံ ပစ္စုပဋ္ဌိတံ ဟောတိ ကုသလေသု ဓမ္မေသု. ယတော စ ခေါ၊ ဘိက္ခဝေ၊ ဝီရိယံ အန္တရဟိတံ ဟောတိ၊ ကောသဇ္ဇံ ပရိယုဋ္ဌာယ တိဋ္ဌတိ၊ အထ အကုသလဿ သမာပတ္တိ ဟောတိ.

‘‘န တာဝ၊ ဘိက္ခဝေ၊ အကုသလဿ သမာပတ္တိ ဟောတိ ယာဝ ပညာ ပစ္စုပဋ္ဌိတာ ဟောတိ ကုသလေသု ဓမ္မေသု. ယတော စ ခေါ၊ ဘိက္ခဝေ၊ ပညာ အန္တရဟိတာ ဟောတိ၊ ဒုပ္ပညာ [ဒုပ္ပညံ (က.)] ပရိယုဋ္ဌာယ တိဋ္ဌတိ၊ အထ အကုသလဿ သမာပတ္တိ ဟောတီ’’တိ. ဆဋ္ဌံ.

၇. ကာမသုတ္တံ

၇. ‘‘ယေဘုယျေန၊ ဘိက္ခဝေ၊ သတ္တာ ကာမေသု လဠိတာ [ပလာဠိတာ (သီ.)]. အသိတဗျာဘင်္ဂိံ [အသိတဗျာဘင်္ဂိ စေပိ (?)]၊ ဘိက္ခဝေ၊ ကုလပုတ္တော ဩဟာယ အဂါရသ္မာ အနဂါရိယံ ပဗ္ဗဇိတော ဟောတိ၊ ‘သဒ္ဓါပဗ္ဗဇိတော ကုလပုတ္တော’တိ အလံ ဝစနာယ. တံ ကိဿ ဟေတု? လဗ္ဘာ [လဗ္ဘာ ဟိ (သျာ.)]၊ ဘိက္ခဝေ၊ ယောဗ္ဗနေန ကာမာ တေ စ ခေါ ယာဒိသာ ဝါ တာဒိသာ ဝါ. ယေ စ၊ ဘိက္ခဝေ၊ ဟီနာ ကာမာ ယေ စ မဇ္ဈိမာ ကာမာ ယေ စ ပဏီတာ ကာမာ၊ သဗ္ဗေ ကာမာ ‘ကာမာ’တွေဝ သင်္ခံ ဂစ္ဆန္တိ. သေယျထာပိ၊ ဘိက္ခဝေ၊ ဒဟရော ကုမာရော မန္ဒော ဥတ္တာနသေယျကော ဓာတိယာ ပမာဒမနွာယ ကဋ္ဌံ ဝါ ကဌလံ [ကထလံ (က.)] ဝါ မုခေ အာဟရေယျ. တမေနံ ဓာတိ သီဃံ သီဃံ [သီဃသီဃံ (သီ.)] မနသိ ကရေယျ၊ သီဃံ သီဃံ မနသိ ကရိတွာ သီဃံ သီဃံ အာဟရေယျ. နော စေ သက္ကုဏေယျ သီဃံ သီဃံ အာဟရိတုံ၊ ဝါမေန ဟတ္ထေန သီသံ ပရိဂ္ဂဟေတွာ ဒက္ခိဏေန ဟတ္ထေန ဝင်္ကင်္ဂုလိံ ကရိတွာ သလောဟိတမ္ပိ အာဟရေယျ. တံ ကိဿ ဟေတု? ‘အတ္ထေသာ၊ ဘိက္ခဝေ၊ ကုမာရဿ ဝိဟေသာ၊ နေသာ နတ္ထီ’တိ ဝဒါမိ. ကရဏီယဉ္စ ခေါ ဧတံ [ဧဝံ (က.)]၊ ဘိက္ခဝေ၊ ဓာတိယာ အတ္ထကာမာယ ဟိတေသိနိယာ အနုကမ္ပိကာယ၊ အနုကမ္ပံ ဥပါဒါယ. ယတော စ ခေါ၊ ဘိက္ခဝေ၊ သော ကုမာရော ဝုဒ္ဓေါ ဟောတိ အလံပညော၊ အနပေက္ခာ ဒါနိ [အနပေက္ခာ ပန (သီ. သျာ. ကံ.)]၊ ဘိက္ခဝေ၊ ဓာတိ တသ္မိံ ကုမာရေ ဟောတိ – ‘အတ္တဂုတ္တော ဒါနိ ကုမာရော နာလံ ပမာဒါယာ’တိ.

‘‘ဧဝမေဝံ ခေါ၊ ဘိက္ခဝေ၊ ယာဝကီဝဉ္စ ဘိက္ခုနော သဒ္ဓါယ အကတံ ဟောတိ ကုသလေသု ဓမ္မေသု၊ ဟိရိယာ အကတံ ဟောတိ ကုသလေသု ဓမ္မေသု၊ ဩတ္တပ္ပေန အကတံ ဟောတိ ကုသလေသု ဓမ္မေသု၊ ဝီရိယေန အကတံ ဟောတိ ကုသလေသု ဓမ္မေသု၊ ပညာယ အကတံ ဟောတိ ကုသလေသု ဓမ္မေသု၊ အနုရက္ခိတဗ္ဗော တာဝ မေ သော၊ ဘိက္ခဝေ၊ ဘိက္ခု ဟောတိ. ယတော စ ခေါ၊ ဘိက္ခဝေ၊ ဘိက္ခုနော သဒ္ဓါယ ကတံ ဟောတိ ကုသလေသု ဓမ္မေသု၊ ဟိရိယာ ကတံ ဟောတိ ကုသလေသု ဓမ္မေသု၊ ဩတ္တပ္ပေန ကတံ ဟောတိ ကုသလေသု ဓမ္မေသု၊ ဝီရိယေန ကတံ ဟောတိ ကုသလေသု ဓမ္မေသု၊ ပညာယ ကတံ ဟောတိ ကုသလေသု ဓမ္မေသု၊ အနပေက္ခော ဒါနာဟံ၊ ဘိက္ခဝေ [ပနာဟံ (သီ. သျာ. ကံ.)]၊ တသ္မိံ ဘိက္ခုသ္မိံ ဟောမိ – ‘အတ္တဂုတ္တော ဒါနိ ဘိက္ခု နာလံ ပမာဒါယာ’’’တိ. သတ္တမံ.

၈. စဝနသုတ္တံ

၈. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. ကတမေဟိ ပဉ္စဟိ? အသဒ္ဓေါ၊ ဘိက္ခဝေ၊ ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. အဟိရိကော၊ ဘိက္ခဝေ၊ ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. အနောတ္တပ္ပီ၊ ဘိက္ခဝေ၊ ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. ကုသီတော၊ ဘိက္ခဝေ၊ ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. ဒုပ္ပညော၊ ဘိက္ခဝေ၊ ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု စဝတိ၊ နပ္ပတိဋ္ဌာတိ သဒ္ဓမ္မေ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု န စဝတိ၊ ပတိဋ္ဌာတိ သဒ္ဓမ္မေ. ကတမေဟိ ပဉ္စဟိ? သဒ္ဓေါ၊ ဘိက္ခဝေ၊ ဘိက္ခု န စဝတိ၊ ပတိဋ္ဌာတိ သဒ္ဓမ္မေ. ဟိရီမာ၊ ဘိက္ခဝေ၊ ဘိက္ခု န စဝတိ၊ ပတိဋ္ဌာတိ သဒ္ဓမ္မေ. ဩတ္တပ္ပီ၊ ဘိက္ခဝေ၊ ဘိက္ခု န စဝတိ၊ ပတိဋ္ဌာတိ သဒ္ဓမ္မေ. အာရဒ္ဓဝီရိယော၊ ဘိက္ခဝေ၊ ဘိက္ခု န စဝတိ၊ ပတိဋ္ဌာတိ သဒ္ဓမ္မေ. ပညဝါ၊ ဘိက္ခဝေ၊ ဘိက္ခု န စဝတိ၊ ပတိဋ္ဌာတိ သဒ္ဓမ္မေ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု န စဝတိ၊ ပတိဋ္ဌာတိ သဒ္ဓမ္မေ’’တိ. အဋ္ဌမံ.

၉. ပဌမအဂါရဝသုတ္တံ

၉. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. ကတမေဟိ ပဉ္စဟိ? အဿဒ္ဓေါ၊ ဘိက္ခဝေ၊ ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. အဟိရိကော၊ ဘိက္ခဝေ၊ ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. အနောတ္တပ္ပီ၊ ဘိက္ခဝေ၊ ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. ကုသီတော၊ ဘိက္ခဝေ၊ ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. ဒုပ္ပညော၊ ဘိက္ခဝေ၊ ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု အဂါရဝေါ အပ္ပတိဿော စဝတိ၊ နပ္ပတိဋ္ဌာတိ သဒ္ဓမ္မေ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. ကတမေဟိ ပဉ္စဟိ? သဒ္ဓေါ၊ ဘိက္ခဝေ၊ ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. ဟိရိမာ၊ ဘိက္ခဝေ၊ ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. ဩတ္တပ္ပီ၊ ဘိက္ခဝေ၊ ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. အာရဒ္ဓဝီရိယော၊ ဘိက္ခဝေ၊ ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. ပညဝါ၊ ဘိက္ခဝေ၊ ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု သဂါရဝေါ သပ္ပတိဿော န စဝတိ၊ ပတိဋ္ဌာတိ သဒ္ဓမ္မေ’’တိ. နဝမံ.

၁၀. ဒုတိယအဂါရဝသုတ္တံ

၁၀. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ကတမေဟိ ပဉ္စဟိ? အဿဒ္ဓေါ၊ ဘိက္ခဝေ၊ ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. အဟိရိကော၊ ဘိက္ခဝေ၊ ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. အနောတ္တပ္ပီ၊ ဘိက္ခဝေ၊ ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ကုသီတော၊ ဘိက္ခဝေ၊ ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ဒုပ္ပညော၊ ဘိက္ခဝေ၊ ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု အဂါရဝေါ အပ္ပတိဿော အဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု သဂါရဝေါ သပ္ပတိဿော ဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ကတမေဟိ ပဉ္စဟိ? သဒ္ဓေါ၊ ဘိက္ခဝေ၊ ဘိက္ခု သဂါရဝေါ သပ္ပတိဿော ဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ဟိရီမာ၊ ဘိက္ခဝေ၊ ဘိက္ခု။ပေ။ ဩတ္တပ္ပီ၊ ဘိက္ခဝေ၊ ဘိက္ခု။ပေ။ အာရဒ္ဓဝီရိယော၊ ဘိက္ခဝေ၊ ဘိက္ခု။ပေ။ ပညဝါ၊ ဘိက္ခဝေ၊ ဘိက္ခု သဂါရဝေါ သပ္ပတိဿော ဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတုံ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု သဂါရဝေါ သပ္ပတိဿော ဘဗ္ဗော ဣမသ္မိံ ဓမ္မဝိနယေ ဝုဒ္ဓိံ ဝိရူဠှိံ ဝေပုလ္လံ အာပဇ္ဇိတု’’န္တိ. ဒသမံ.

သေခဗလဝဂ္ဂေါ ပဌမော.