၆. သရာဂသုတ္တံ

၆၆. ‘‘စတ္တာရောမေ၊ ဘိက္ခဝေ၊ ပုဂ္ဂလာ သန္တော သံဝိဇ္ဇမာနာ လောကသ္မိံ. ကတမေ စတ္တာရော? သရာဂေါ၊ သဒေါသော၊ သမောဟော၊ သမာနော – ဣမေ ခေါ၊ ဘိက္ခဝေ၊ စတ္တာရော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ.

‘‘သာရတ္တာ ရဇနီယေသု၊ ပိယရူပါဘိနန္ဒိနော၊

မောဟေန အာဝုတာ [အဓမာ (သီ. သျာ. ကံ. ပီ.)] သတ္တာ၊ ဗဒ္ဓါ [ဗန္ဓာ (က.)] ဝဍ္ဎေန္တိ ဗန္ဓနံ.

‘‘ရာဂဇံ ဒေါသဇဉ္စာပိ၊ မောဟဇံ စာပဝိဒ္ဒသူ၊

ကရောန္တာကုသလံ ကမ္မံ [ဓမ္မံ (က.)]၊ သဝိဃာတံ ဒုခုဒြယံ.

‘‘အဝိဇ္ဇာနိဝုတာ ပေါသာ၊ အန္ဓဘူတာ အစက္ခုကာ၊

ယထာ ဓမ္မာ တထာ သန္တာ၊ န တဿေဝန္တိ [နဿေဝန္တိ (သီ.)] မညရေ’’တိ. ဆဋ္ဌံ၊