၃. ပဌမသံဝါသသုတ္တံ

၅၃. ဧကံ သမယံ ဘဂဝါ အန္တရာ စ မဓုရံ အန္တရာ စ ဝေရဉ္ဇံ အဒ္ဓါနမဂ္ဂပ္ပဋိပန္နော ဟောတိ. သမ္ဗဟုလာပိ ခေါ ဂဟပတီ စ ဂဟပတာနိယော စ အန္တရာ စ မဓုရံ အန္တရာ စ ဝေရဉ္ဇံ အဒ္ဓါနမဂ္ဂပ္ပဋိပန္နာ ဟောန္တိ. အထ ခေါ ဘဂဝါ မဂ္ဂါ ဩက္ကမ္မ အညတရသ္မိံ ရုက္ခမူလေ ( ) [(ပညတ္တေ အာသနေ) (ပီ. က.)] နိသီဒိ. အဒ္ဒသံသု ခေါ ဂဟပတီ စ ဂဟပတာနိယော စ ဘဂဝန္တံ အညတရသ္မိံ ရုက္ခမူလေ နိသိန္နံ. ဒိသွာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. ဧကမန္တံ နိသိန္နေ ခေါ တေ ဂဟပတီ စ ဂဟပတာနိယော စ ဘဂဝါ ဧတဒဝေါစ –

‘‘စတ္တာရောမေ၊ ဂဟပတယော၊ သံဝါသာ. ကတမေ စတ္တာရော? ဆဝေါ ဆဝါယ သဒ္ဓိံ သံဝသတိ၊ ဆဝေါ ဒေဝိယာ သဒ္ဓိံ သံဝသတိ၊ ဒေဝေါ ဆဝါယ သဒ္ဓိံ သံဝသတိ၊ ဒေဝေါ ဒေဝိယာ သဒ္ဓိံ သံဝသတိ.

‘‘ကထဉ္စ၊ ဂဟပတယော၊ ဆဝေါ ဆဝါယ သဒ္ဓိံ သံဝသတိ? ဣဓ၊ ဂဟပတယော၊ သာမိကော ဟောတိ ပါဏာတိပါတီ အဒိန္နာဒါယီ ကာမေသုမိစ္ဆာစာရီ မုသာဝါဒီ သုရာမေရယမဇ္ဇပမာဒဋ္ဌာယီ ဒုဿီလော ပါပဓမ္မော မစ္ဆေရမလပရိယုဋ္ဌိတေန စေတသာ အဂါရံ အဇ္ဈာဝသတိ အက္ကောသကပရိဘာသကော သမဏဗြာဟ္မဏာနံ၊ ဘရိယာပိဿ ဟောတိ ပါဏာတိပါတိနီ အဒိန္နာဒါယိနီ ကာမေသုမိစ္ဆာစာရိနီ မုသာဝါဒိနီ သုရာမေရယမဇ္ဇပမာဒဋ္ဌာယိနီ ဒုဿီလာ ပါပဓမ္မာ မစ္ဆေရမလပရိယုဋ္ဌိတေန စေတသာ အဂါရံ အဇ္ဈာဝသတိ အက္ကောသိကပရိဘာသိကာ သမဏဗြာဟ္မဏာနံ. ဧဝံ ခေါ၊ ဂဟပတယော၊ ဆဝေါ ဆဝါယ သဒ္ဓိံ သံဝသတိ.

‘‘ကထဉ္စ၊ ဂဟပတယော၊ ဆဝေါ ဒေဝိယာ သဒ္ဓိံ သံဝသတိ? ဣဓ၊ ဂဟပတယော၊ သာမိကော ဟောတိ ပါဏာတိပါတီ အဒိန္နာဒါယီ ကာမေသုမိစ္ဆာစာရီ မုသာဝါဒီ သုရာမေရယမဇ္ဇပမာဒဋ္ဌာယီ ဒုဿီလော ပါပဓမ္မော မစ္ဆေရမလပရိယုဋ္ဌိတေန စေတသာ အဂါရံ အဇ္ဈာဝသတိ အက္ကောသကပရိဘာသကော သမဏဗြာဟ္မဏာနံ၊ ဘရိယာ ခွဿ ဟောတိ ပါဏာတိပါတာ ပဋိဝိရတာ အဒိန္နာဒါနာ ပဋိဝိရတာ ကာမေသုမိစ္ဆာစာရာ ပဋိဝိရတာ မုသာဝါဒါ ပဋိဝိရတာ သုရာမေရယမဇ္ဇပမာဒဋ္ဌာနာ ပဋိဝိရတာ သီလဝတီ ကလျာဏဓမ္မာ ဝိဂတမလမစ္ဆေရေန စေတသာ အဂါရံ အဇ္ဈာဝသတိ အနက္ကောသိကပရိဘာသိကာ သမဏဗြာဟ္မဏာနံ. ဧဝံ ခေါ၊ ဂဟပတယော၊ ဆဝေါ ဒေဝိယာ သဒ္ဓိံ သံဝသတိ.

‘‘ကထဉ္စ၊ ဂဟပတယော၊ ဒေဝေါ ဆဝါယ သဒ္ဓိံ သံဝသတိ? ဣဓ၊ ဂဟပတယော၊ သာမိကော ဟောတိ ပါဏာတိပါတာ ပဋိဝိရတော အဒိန္နာဒါနာ ပဋိဝိရတော ကာမေသုမိစ္ဆာစာရာ ပဋိဝိရတော မုသာဝါဒါ ပဋိဝိရတော သုရာမေရယမဇ္ဇပမာဒဋ္ဌာနာ ပဋိဝိရတော သီလဝါ ကလျာဏဓမ္မော ဝိဂတမလမစ္ဆေရေန စေတသာ အဂါရံ အဇ္ဈာဝသတိ အနက္ကောသကပရိဘာသကော သမဏဗြာဟ္မဏာနံ၊ ဘရိယာ ခွဿ ဟောတိ ပါဏာတိပါတိနီ။ပေ။ သုရာမေရယမဇ္ဇပမာဒဋ္ဌာယိနီ ဒုဿီလာ ပါပဓမ္မာ မစ္ဆေရမလပရိယုဋ္ဌိတေန စေတသာ အဂါရံ အဇ္ဈာဝသတိ အက္ကောသိကပရိဘာသိကာ သမဏဗြာဟ္မဏာနံ. ဧဝံ ခေါ၊ ဂဟပတယော၊ ဒေဝေါ ဆဝါယ သဒ္ဓိံ သံဝသတိ.

‘‘ကထဉ္စ၊ ဂဟပတယော၊ ဒေဝေါ ဒေဝိယာ သဒ္ဓိံ သံဝသတိ? ဣဓ၊ ဂဟပတယော၊ သာမိကော ဟောတိ ပါဏာတိပါတာ ပဋိဝိရတော။ပေ။ သီလဝါ ကလျာဏဓမ္မော ဝိဂတမလမစ္ဆေရေန စေတသာ အဂါရံ အဇ္ဈာဝသတိ အနက္ကောသကပရိဘာသကော သမဏဗြာဟ္မဏာနံ၊ ဘရိယာပိဿ ဟောတိ ပါဏာတိပါတာ ပဋိဝိရတာ။ပေ။ သုရာမေရယမဇ္ဇပမာဒဋ္ဌာနာ ပဋိဝိရတာ သီလဝတီ ကလျာဏဓမ္မာ ဝိဂတမလမစ္ဆေရေန စေတသာ အဂါရံ အဇ္ဈာဝသတိ အနက္ကောသိကပရိဘာသိကာ သမဏဗြာဟ္မဏာနံ. ဧဝံ ခေါ၊ ဂဟပတယော၊ ဒေဝေါ ဒေဝိယာ သဒ္ဓိံ သံဝသတိ. ဣမေ ခေါ၊ ဂဟပတယော၊ စတ္တာရော သံဝါသာ’’တိ.

‘‘ဥဘော စ ဟောန္တိ ဒုဿီလာ၊ ကဒရိယာ ပရိဘာသကာ၊

တေ ဟောန္တိ ဇာနိပတယော၊ ဆဝါ သံဝါသမာဂတာ.

‘‘သာမိကော ဟောတိ ဒုဿီလော၊ ကဒရိယော ပရိဘာသကော၊

ဘရိယာ သီလဝတီ ဟောတိ၊ ဝဒညူ ဝီတမစ္ဆရာ၊

သာပိ ဒေဝီ သံဝသတိ၊ ဆဝေန ပတိနာ သဟ.

‘‘သာမိကော သီလဝါ ဟောတိ၊ ဝဒညူ ဝီတမစ္ဆရော၊

ဘရိယာ ဟောတိ ဒုဿီလာ၊ ကဒရိယာ ပရိဘာသိကာ၊

သာပိ ဆဝါ သံဝသတိ၊ ဒေဝေန ပတိနာ သဟ.

‘‘ဥဘော သဒ္ဓါ ဝဒညူ စ၊ သညတာ ဓမ္မဇီဝိနော၊

တေ ဟောန္တိ ဇာနိပတယော၊ အညမညံ ပိယံဝဒါ.

‘‘အတ္ထာသံ ပစုရာ ဟောန္တိ၊ ဖာသုကံ [ဖာသတ္တံ (သီ.)၊ ဝါသတ္ထံ (ပီ.)] ဥပဇာယတိ၊

အမိတ္တာ ဒုမ္မနာ ဟောန္တိ၊ ဥဘိန္နံ သမသီလိနံ.

‘‘ဣဓ ဓမ္မံ စရိတွာန၊ သမသီလဗ္ဗတာ ဥဘော၊

နန္ဒိနော ဒေဝလောကသ္မိံ၊ မောဒန္တိ ကာမကာမိနော’’တိ. တတိယံ၊