၁၀. ဂိဟိသာမီစိသုတ္တံ

၆၀. အထ ခေါ အနာထပိဏ္ဍိကော ဂဟပတိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အနာထပိဏ္ဍိကံ ဂဟပတိံ ဘဂဝါ ဧတဒဝေါစ –

‘‘စတူဟိ ခေါ၊ ဂဟပတိ၊ ဓမ္မေဟိ သမန္နာဂတော အရိယသာဝကော ဂိဟိသာမီစိပဋိပဒံ ပဋိပန္နော ဟောတိ ယသောပဋိလာဘိနိံ သဂ္ဂသံဝတ္တနိကံ. ကတမေဟိ စတူဟိ? ဣဓ၊ ဂဟပတိ၊ အရိယသာဝကော ဘိက္ခုသံဃံ ပစ္စုပဋ္ဌိတော ဟောတိ စီဝရေန၊ ဘိက္ခုသံဃံ ပစ္စုပဋ္ဌိတော ဟောတိ ပိဏ္ဍပါတေန၊ ဘိက္ခုသံဃံ ပစ္စုပဋ္ဌိတော ဟောတိ သေနာသနေန၊ ဘိက္ခုသံဃံ ပစ္စုပဋ္ဌိတော ဟောတိ ဂိလာနပ္ပစ္စယဘေသဇ္ဇပရိက္ခာရေန. ဣမေဟိ ခေါ၊ ဂဟပတိ၊ စတူဟိ ဓမ္မေဟိ သမန္နာဂတော အရိယသာဝကော ဂိဟိသာမီစိပဋိပဒံ ပဋိပန္နော ဟောတိ ယသောပဋိလာဘိနိံ သဂ္ဂသံဝတ္တနိက’’န္တိ.

‘‘ဂိဟိသာမီစိပဋိပဒံ၊ ပဋိပဇ္ဇန္တိ ပဏ္ဍိတာ၊

သမ္မဂ္ဂတေ သီလဝန္တေ၊ စီဝရေန ဥပဋ္ဌိတာ.

ပိဏ္ဍပါတသယနေန၊ ဂိလာနပ္ပစ္စယေန စ၊

တေသံ ဒိဝါ စ ရတ္တော စ၊ သဒါ ပုညံ ပဝဍ္ဎတိ၊

သဂ္ဂဉ္စ ကမတိဋ္ဌာနံ [သဂ္ဂဉ္စ သပ္ပတိဋ္ဌာနံ (က.)]၊ ကမ္မံ ကတွာန ဘဒ္ဒက’’န္တိ. ဒသမံ၊

ပုညာဘိသန္ဒဝဂ္ဂေါ ပဌမော.