၇. သန္တုဋ္ဌိသုတ္တံ

၂၇. ‘‘စတ္တာရိမာနိ၊ ဘိက္ခဝေ၊ အပ္ပါနိ စ [စေဝ (က.)] သုလဘာနိ စ၊ တာနိ စ အနဝဇ္ဇာနိ. ကတမာနိ စတ္တာရိ? ပံသုကူလံ၊ ဘိက္ခဝေ၊ စီဝရာနံ အပ္ပဉ္စ သုလဘဉ္စ၊ တဉ္စ အနဝဇ္ဇံ. ပိဏ္ဍိယာလောပေါ၊ ဘိက္ခဝေ၊ ဘောဇနာနံ အပ္ပဉ္စ သုလဘဉ္စ၊ တဉ္စ အနဝဇ္ဇံ. ရုက္ခမူလံ၊ ဘိက္ခဝေ၊ သေနာသနာနံ အပ္ပဉ္စ သုလဘဉ္စ၊ တဉ္စ အနဝဇ္ဇံ. ပူတိမုတ္တံ၊ ဘိက္ခဝေ၊ ဘေသဇ္ဇာနံ အပ္ပဉ္စ သုလဘဉ္စ၊ တဉ္စ အနဝဇ္ဇံ. ဣမာနိ ခေါ၊ ဘိက္ခဝေ၊ စတ္တာရိ အပ္ပါနိ စ သုလဘာနိ စ၊ တာနိ စ အနဝဇ္ဇာနိ. ယတော ခေါ၊ ဘိက္ခဝေ၊ ဘိက္ခု အပ္ပေန စ တုဋ္ဌော ဟောတိ သုလဘေန စ၊ ဣဒမဿာဟံ အညတရံ သာမညင်္ဂန္တိ [သာမညန္တိ (က.)] ဝဒါမီ’’တိ.

‘‘အနဝဇ္ဇေန တုဋ္ဌဿ၊ အပ္ပေန သုလဘေန စ၊

န သေနာသနမာရဗ္ဘ၊ စီဝရံ ပါနဘောဇနံ၊

ဝိဃာတော ဟောတိ စိတ္တဿ၊ ဒိသာ နပ္ပဋိဟညတိ.

‘‘ယေ စဿ ဓမ္မာ အက္ခာတာ၊ သာမညဿာနုလောမိကာ၊

အဓိဂ္ဂဟိတာ တုဋ္ဌဿ၊ အပ္ပမတ္တဿ သိက္ခတော’’တိ. သတ္တမံ၊