၅. ပညတ္တိသုတ္တံ

၁၅. ‘‘စတဿော ဣမာ၊ ဘိက္ခဝေ၊ အဂ္ဂပညတ္တိယော. ကတမာ စတဿော? ဧတဒဂ္ဂံ၊ ဘိက္ခဝေ၊ အတ္တဘာဝီနံ ယဒိဒံ – ရာဟု အသုရိန္ဒော. ဧတဒဂ္ဂံ၊ ဘိက္ခဝေ၊ ကာမဘောဂီနံ ယဒိဒံ – ရာဇာ မန္ဓာတာ. ဧတဒဂ္ဂံ၊ ဘိက္ခဝေ၊ အာဓိပတေယျာနံ ယဒိဒံ – မာရော ပါပိမာ. သဒေဝကေ၊ ဘိက္ခဝေ၊ လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ တထာဂတော အဂ္ဂမက္ခာယတိ အရဟံ သမ္မာသမ္ဗုဒ္ဓေါ. ဣမာ ခေါ၊ ဘိက္ခဝေ၊ စတဿော အဂ္ဂပညတ္တိယော’’တိ.

‘‘ရာဟုဂ္ဂံ အတ္တဘာဝီနံ၊ မန္ဓာတာ ကာမဘောဂိနံ၊

မာရော အာဓိပတေယျာနံ၊ ဣဒ္ဓိယာ ယသသာ ဇလံ.

‘‘ဥဒ္ဓံ တိရိယံ အပါစီနံ၊ ယာဝတာ ဇဂတော ဂတိ၊

သဒေဝကဿ လောကဿ၊ ဗုဒ္ဓေါ အဂ္ဂေါ ပဝုစ္စတီ’’တိ. ပဉ္စမံ၊