၇. သောဘနသုတ္တံ

၇. ‘‘စတ္တာရောမေ၊ ဘိက္ခဝေ၊ ဝိယတ္တာ ဝိနီတာ ဝိသာရဒါ ဗဟုဿုတာ ဓမ္မဓရာ ဓမ္မာနုဓမ္မပ္ပဋိပန္နာ သံဃံ သောဘေန္တိ. ကတမေ စတ္တာရော? ဘိက္ခု၊ ဘိက္ခဝေ၊ ဝိယတ္တော ဝိနီတော ဝိသာရဒေါ ဗဟုဿုတော ဓမ္မဓရော ဓမ္မာနုဓမ္မပ္ပဋိပန္နော သံဃံ သောဘေတိ. ဘိက္ခုနီ၊ ဘိက္ခဝေ၊ ဝိယတ္တာ ဝိနီတာ ဝိသာရဒါ ဗဟုဿုတာ ဓမ္မဓရာ ဓမ္မာနုဓမ္မပ္ပဋိပန္နာ သံဃံ သောဘေတိ. ဥပါသကော၊ ဘိက္ခဝေ၊ ဝိယတ္တော ဝိနီတော ဝိသာရဒေါ ဗဟုဿုတော ဓမ္မဓရော ဓမ္မာနုဓမ္မပ္ပဋိပန္နော သံဃံ သောဘေတိ. ဥပါသိကာ၊ ဘိက္ခဝေ၊ ဝိယတ္တာ ဝိနီတာ ဝိသာရဒါ ဗဟုဿုတာ ဓမ္မဓရာ ဓမ္မာနုဓမ္မပ္ပဋိပန္နာ သံဃံ သောဘေတိ. ဣမေ ခေါ၊ ဘိက္ခဝေ၊ စတ္တာရော ဝိယတ္တာ ဝိနီတာ ဝိသာရဒါ ဗဟုဿုတာ ဓမ္မဓရာ ဓမ္မာနုဓမ္မပ္ပဋိပန္နာ သံဃံ သောဘေန္တီ’’တိ.

‘‘ယော ဟောတိ ဝိယတ္တော [ဝျတ္တော (သီ. ပီ.)၊ ဗျတ္တော (သျာ. ကံ.)] စ ဝိသာရဒေါ စ၊

ဗဟုဿုတော ဓမ္မဓရော စ ဟောတိ၊

ဓမ္မဿ ဟောတိ အနုဓမ္မစာရီ၊

သ တာဒိသော ဝုစ္စတိ သံဃသောဘနော [သံဃသောဘဏော (က.)].

‘‘ဘိက္ခု စ သီလသမ္ပန္နော၊ ဘိက္ခုနီ စ ဗဟုဿုတာ၊

ဥပါသကော စ ယော သဒ္ဓေါ၊ ယာ စ သဒ္ဓါ ဥပါသိကာ၊

ဧတေ ခေါ သံဃံ သောဘေန္တိ၊ ဧတေ ဟိ သံဃသောဘနာ’’တိ. သတ္တမံ၊